Bhagavata Purana · Chapter 10.07

BhP_10.07.001/0 śrī-rājovāca
yena yenāvatāreṇa bhagavān harir īśvaraḥ /
karoti karṇa-ramyāṇi mano-jñāni ca naḥ prabho

yac-chṛṇvato 'paity aratir vitṛṣṇā sattvaṃ ca śuddhyaty acireṇa puṃsaḥ /
bhaktir harau tat-puruṣe ca sakhyaṃ tad eva hāraṃ vada manyase cet

athānyad api kṛṣṇasya tokācaritam adbhutam /
mānuṣaṃ lokam āsādya taj-jātim anurundhataḥ

BhP_10.07.004/0 śrī-śuka uvāca
kadācid autthānika-kautukāplave janmarkṣa-yoge samaveta-yoṣitām /
vāditra-gīta-dvija-mantra-vācakaiś cakāra sūnor abhiṣecanaṃ satī

nandasya patnī kṛta-majjanādikaṃ vipraiḥ kṛta-svastyayanaṃ supūjitaiḥ /
annādya-vāsaḥ-srag-abhīṣṭa-dhenubhiḥ sañjāta-nidrākṣam aśīśayac chanaiḥ

autthānikautsukya-manā manasvinī samāgatān pūjayatī vrajaukasaḥ /
naivāśṛṇod vai ruditaṃ sutasya sā rudan stanārthī caraṇāv udakṣipat

adhaḥ-śayānasya śiśor ano 'lpaka- pravāla-mṛdv-aṅghri-hataṃ vyavartata /
vidhvasta-nānā-rasa-kupya-bhājanaṃ vyatyasta-cakrākṣa-vibhinna-kūbaram

dṛṣṭvā yaśodā-pramukhā vraja-striya $ autthānike karmaṇi yāḥ samāgatāḥ &
nandādayaś cādbhuta-darśanākulāḥ % kathaṃ svayaṃ vai śakaṭaṃ viparyagāt // BhP_10.07.008* //
ūcur avyavasita-matīn gopān gopīś ca bālakāḥ /
rudatānena pādena kṣiptam etan na saṃśayaḥ

na te śraddadhire gopā bāla-bhāṣitam ity uta /
aprameyaṃ balaṃ tasya bālakasya na te viduḥ

rudantaṃ sutam ādāya yaśodā graha-śaṅkitā /
kṛta-svastyayanaṃ vipraiḥ sūktaiḥ stanam apāyayat

pūrvavat sthāpitaṃ gopair balibhiḥ sa-paricchadam /
viprā hutvārcayāṃ cakrur dadhy-akṣata-kuśāmbubhiḥ

ye 'sūyānṛta-dambherṣā- hiṃsā-māna-vivarjitāḥ /
na teṣāṃ satya-śīlānām āśiṣo viphalāḥ kṛtāḥ

iti bālakam ādāya sāmarg-yajur-upākṛtaiḥ /
jalaiḥ pavitrauṣadhibhir abhiṣicya dvijottamaiḥ

vācayitvā svastyayanaṃ nanda-gopaḥ samāhitaḥ /
hutvā cāgniṃ dvijātibhyaḥ prādād annaṃ mahā-guṇam

gāvaḥ sarva-guṇopetā vāsaḥ-srag-rukma-mālinīḥ /
ātmajābhyudayārthāya prādāt te cānvayuñjata

viprā mantra-vido yuktās tair yāḥ proktās tathāśiṣaḥ /
tā niṣphalā bhaviṣyanti na kadācid api sphuṭam

ekadāroham ārūḍhaṃ lālayantī sutaṃ satī /
garimāṇaṃ śiśor voḍhuṃ na sehe giri-kūṭavat

bhūmau nidhāya taṃ gopī vismitā bhāra-pīḍitā /
mahā-puruṣam ādadhyau jagatām āsa karmasu

daityo nāmnā tṛṇāvartaḥ kaṃsa-bhṛtyaḥ praṇoditaḥ /
cakravāta-svarūpeṇa jahārāsīnam arbhakam

gokulaṃ sarvam āvṛṇvan muṣṇaṃś cakṣūṃṣi reṇubhiḥ /
īrayan sumahā-ghora- śabdena pradiśo diśaḥ

muhūrtam abhavad goṣṭhaṃ rajasā tamasāvṛtam /
sutaṃ yaśodā nāpaśyat tasmin nyastavatī yataḥ

nāpaśyat kaścanātmānaṃ paraṃ cāpi vimohitaḥ /
tṛṇāvarta-nisṛṣṭābhiḥ śarkarābhir upadrutaḥ

iti khara-pavana-cakra-pāṃśu-varṣe suta-padavīm abalāvilakṣya mātā /
atikaruṇam anusmaranty aśocad bhuvi patitā mṛta-vatsakā yathā gauḥ

ruditam anuniśamya tatra gopyo bhṛśam anutapta-dhiyo 'śru-pūrṇa-mukhyaḥ /
rurudur anupalabhya nanda-sūnuṃ pavana upārata-pāṃśu-varṣa-vege

tṛṇāvartaḥ śānta-rayo vātyā-rūpa-dharo haran /
kṛṣṇaṃ nabho-gato gantuṃ nāśaknod bhūri-bhāra-bhṛt

tam aśmānaṃ manyamāna ātmano guru-mattayā /
gale gṛhīta utsraṣṭuṃ nāśaknod adbhutārbhakam

gala-grahaṇa-niśceṣṭo daityo nirgata-locanaḥ /
avyakta-rāvo nyapatat saha-bālo vyasur vraje

tam antarikṣāt patitaṃ śilāyāṃ viśīrṇa-sarvāvayavaṃ karālam /
puraṃ yathā rudra-śareṇa viddhaṃ striyo rudatyo dadṛśuḥ sametāḥ

prādāya mātre pratihṛtya vismitāḥ kṛṣṇaṃ ca tasyorasi lambamānam /
taṃ svastimantaṃ puruṣāda-nītaṃ vihāyasā mṛtyu-mukhāt pramuktam /
gopyaś ca gopāḥ kila nanda-mukhyā labdhvā punaḥ prāpur atīva modam

aho batāty-adbhutam eṣa rakṣasā bālo nivṛttiṃ gamito 'bhyagāt punaḥ /
hiṃsraḥ sva-pāpena vihiṃsitaḥ khalaḥ sādhuḥ samatvena bhayād vimucyate

kiṃ nas tapaś cīrṇam adhokṣajārcanaṃ $ pūrteṣṭa-dattam uta bhūta-sauhṛdam &
yat samparetaḥ punar eva bālako % diṣṭyā sva-bandhūn praṇayann upasthitaḥ // BhP_10.07.032* //
dṛṣṭvādbhutāni bahuśo nanda-gopo bṛhadvane /
vasudeva-vaco bhūyo mānayām āsa vismitaḥ

ekadārbhakam ādāya svāṅkam āropya bhāminī /
prasnutaṃ pāyayām āsa stanaṃ sneha-pariplutā

pīta-prāyasya jananī sutasya rucira-smitam /
mukhaṃ lālayatī rājañ jṛmbhato dadṛśe idam

khaṃ rodasī jyotir-anīkam āśāḥ sūryendu-vahni-śvasanāmbudhīṃś ca /
dvīpān nagāṃs tad-duhitṝr vanāni bhūtāni yāni sthira-jaṅgamāni

sā vīkṣya viśvaṃ sahasā rājan sañjāta-vepathuḥ /
sammīlya mṛgaśāvākṣī netre āsīt suvismitā