Bhagavata Purana · Chapter 10.06

BhP_10.06.001/0 śrī-śuka uvāca
nandaḥ pathi vacaḥ śaurer na mṛṣeti vicintayan /
hariṃ jagāma śaraṇam utpātāgama-śaṅkitaḥ

kaṃsena prahitā ghorā pūtanā bāla-ghātinī /
śiśūṃś cacāra nighnantī pura-grāma-vrajādiṣu

na yatra śravaṇādīni rakṣo-ghnāni sva-karmasu /
kurvanti sātvatāṃ bhartur yātudhānyaś ca tatra hi

sā khe-cary ekadotpatya pūtanā nanda-gokulam /
yoṣitvā māyayātmānaṃ prāviśat kāma-cāriṇī

tāṃ keśa-bandha-vyatiṣakta-mallikāṃ $ bṛhan-nitamba-stana-kṛcchra-madhyamām &
suvāsasaṃ kalpita-karṇa-bhūṣaṇa- % tviṣollasat-kuntala-maṇḍitānanām // BhP_10.06.005* //
valgu-smitāpāṅga-visarga-vīkṣitair $ mano harantīṃ vanitāṃ vrajaukasām &
valgu-smitāpāṅga-visarga-vīkṣitair $ mano harantīṃ vanitāṃ vrajaukasām &
amaṃsatāmbhoja-kareṇa rūpiṇīṃ % gopyaḥ śriyaṃ draṣṭum ivāgatāṃ patim // BhP_10.06.006* //
bāla-grahas tatra vicinvatī śiśūn yadṛcchayā nanda-gṛhe 'sad-antakam /
bālaṃ praticchanna-nijoru-tejasaṃ dadarśa talpe 'gnim ivāhitaṃ bhasi

vibudhya tāṃ bālaka-mārikā-grahaṃ carācarātmā sa nimīlitekṣaṇaḥ /
anantam āropayad aṅkam antakaṃ yathoragaṃ suptam abuddhi-rajju-dhīḥ

tāṃ tīkṣṇa-cittām ativāma-ceṣṭitāṃ vīkṣyāntarā koṣa-paricchadāsivat /
vara-striyaṃ tat-prabhayā ca dharṣite nirīkṣyamāṇe jananī hy atiṣṭhatām

tasmin stanaṃ durjara-vīryam ulbaṇaṃ $ ghorāṅkam ādāya śiśor dadāv atha &
gāḍhaṃ karābhyāṃ bhagavān prapīḍya tat- % prāṇaiḥ samaṃ roṣa-samanvito 'pibat // BhP_10.06.010* //
sā muñca muñcālam iti prabhāṣiṇī niṣpīḍyamānākhila-jīva-marmaṇi /
vivṛtya netre caraṇau bhujau muhuḥ prasvinna-gātrā kṣipatī ruroda ha

tasyāḥ svanenātigabhīra-raṃhasā sādrir mahī dyauś ca cacāla sa-grahā /
rasā diśaś ca pratinedire janāḥ petuḥ kṣitau vajra-nipāta-śaṅkayā

niśā-carītthaṃ vyathita-stanā vyasur $ vyādāya keśāṃś caraṇau bhujāv api &
prasārya goṣṭhe nija-rūpam āsthitā % vajrāhato vṛtra ivāpatan nṛpa // BhP_10.06.013* //
patamāno 'pi tad-dehas tri-gavyūty-antara-drumān /
cūrṇayām āsa rājendra mahad āsīt tad adbhutam

īṣā-mātrogra-daṃṣṭrāsyaṃ giri-kandara-nāsikam /
gaṇḍa-śaila-stanaṃ raudraṃ prakīrṇāruṇa-mūrdhajam

andha-kūpa-gabhīrākṣaṃ pulināroha-bhīṣaṇam /
baddha-setu-bhujorv-aṅghri śūnya-toya-hradodaram

santatrasuḥ sma tad vīkṣya gopā gopyaḥ kalevaram /
pūrvaṃ tu tan-niḥsvanita- bhinna-hṛt-karṇa-mastakāḥ

bālaṃ ca tasyā urasi krīḍantam akutobhayam /
gopyas tūrṇaṃ samabhyetya jagṛhur jāta-sambhramāḥ

yaśodā-rohiṇībhyāṃ tāḥ samaṃ bālasya sarvataḥ /
rakṣāṃ vidadhire samyag go-puccha-bhramaṇādibhiḥ

go-mūtreṇa snāpayitvā punar go-rajasārbhakam /
rakṣāṃ cakruś ca śakṛtā dvādaśāṅgeṣu nāmabhiḥ

gopyaḥ saṃspṛṣṭa-salilā aṅgeṣu karayoḥ pṛthak /
nyasyātmany atha bālasya bīja-nyāsam akurvata

avyād ajo 'ṅghri maṇimāṃs tava jānv athorū $ yajño 'cyutaḥ kaṭi-taṭaṃ jaṭharaṃ hayāsyaḥ &
hṛt keśavas tvad-ura īśa inas tu kaṇṭhaṃ % viṣṇur bhujaṃ mukham urukrama īśvaraḥ kam // BhP_10.06.022* //
cakry agrataḥ saha-gado harir astu paścāt $ tvat-pārśvayor dhanur-asī madhu-hājanaś ca &
cakry agrataḥ saha-gado harir astu paścāt $ tvat-pārśvayor dhanur-asī madhu-hājanaś ca &
koṇeṣu śaṅkha urugāya upary upendras % tārkṣyaḥ kṣitau haladharaḥ puruṣaḥ samantāt // BhP_10.06.023* //
indriyāṇi hṛṣīkeśaḥ prāṇān nārāyaṇo 'vatu /
śvetadvīpa-patiś cittaṃ mano yogeśvaro 'vatu

pṛśnigarbhas tu te buddhim ātmānaṃ bhagavān paraḥ /
krīḍantaṃ pātu govindaḥ śayānaṃ pātu mādhavaḥ

vrajantam avyād vaikuṇṭha āsīnaṃ tvāṃ śriyaḥ patiḥ /
bhuñjānaṃ yajñabhuk pātu sarva-graha-bhayaṅkaraḥ

ḍākinyo yātudhānyaś ca kuṣmāṇḍā ye 'rbhaka-grahāḥ /
bhūta-preta-piśācāś ca yakṣa-rakṣo-vināyakāḥ

koṭarā revatī jyeṣṭhā pūtanā mātṛkādayaḥ /
unmādā ye hy apasmārā deha-prāṇendriya-druhaḥ

svapna-dṛṣṭā mahotpātā vṛddhā bāla-grahāś ca ye /
sarve naśyantu te viṣṇor nāma-grahaṇa-bhīravaḥ

BhP_10.06.030/0 śrī-śuka uvāca
iti praṇaya-baddhābhir gopībhiḥ kṛta-rakṣaṇam /
pāyayitvā stanaṃ mātā sannyaveśayad ātmajam

tāvan nandādayo gopā mathurāyā vrajaṃ gatāḥ /
vilokya pūtanā-dehaṃ babhūvur ativismitāḥ

nūnaṃ batarṣiḥ sañjāto yogeśo vā samāsa saḥ /
sa eva dṛṣṭo hy utpāto yad āhānakadundubhiḥ

kalevaraṃ paraśubhiś chittvā tat te vrajaukasaḥ /
dūre kṣiptvāvayavaśo nyadahan kāṣṭha-veṣṭitam

dahyamānasya dehasya dhūmaś cāguru-saurabhaḥ /
utthitaḥ kṛṣṇa-nirbhukta- sapady āhata-pāpmanaḥ

pūtanā loka-bāla-ghnī rākṣasī rudhirāśanā /
jighāṃsayāpi haraye stanaṃ dattvāpa sad-gatim

kiṃ punaḥ śraddhayā bhaktyā kṛṣṇāya paramātmane /
yacchan priyatamaṃ kiṃ nu raktās tan-mātaro yathā

padbhyāṃ bhakta-hṛdi-sthābhyāṃ vandyābhyāṃ loka-vanditaiḥ /
aṅgaṃ yasyāḥ samākramya bhagavān api tat-stanam

yātudhāny api sā svargam avāpa jananī-gatim /
kṛṣṇa-bhukta-stana-kṣīrāḥ kim u gāvo 'numātaraḥ

payāṃsi yāsām apibat putra-sneha-snutāny alam /
bhagavān devakī-putraḥ kaivalyādy-akhila-pradaḥ

tāsām avirataṃ kṛṣṇe kurvatīnāṃ sutekṣaṇam /
na punaḥ kalpate rājan saṃsāro 'jñāna-sambhavaḥ

kaṭa-dhūmasya saurabhyam avaghrāya vrajaukasaḥ /
kim idaṃ kuta eveti vadanto vrajam āyayuḥ

te tatra varṇitaṃ gopaiḥ pūtanāgamanādikam /
śrutvā tan-nidhanaṃ svasti śiśoś cāsan suvismitāḥ

nandaḥ sva-putram ādāya pretyāgatam udāra-dhīḥ /
mūrdhny upāghrāya paramāṃ mudaṃ lebhe kurūdvaha

ya etat pūtanā-mokṣaṃ kṛṣṇasyārbhakam adbhutam /
śṛṇuyāc chraddhayā martyo govinde labhate ratim