Bhagavata Purana · Chapter 10.05

BhP_10.05.001/0 śrī-śuka uvāca
nandas tv ātmaja utpanne jātāhlādo mahā-manāḥ /
āhūya viprān veda-jñān snātaḥ śucir alaṅkṛtaḥ

vācayitvā svastyayanaṃ jāta-karmātmajasya vai /
kārayām āsa vidhivat pitṛ-devārcanaṃ tathā

dhenūnāṃ niyute prādād viprebhyaḥ samalaṅkṛte /
tilādrīn sapta ratnaugha- śātakaumbhāmbarāvṛtān

kālena snāna-śaucābhyāṃ saṃskārais tapasejyayā /
śudhyanti dānaiḥ santuṣṭyā dravyāṇy ātmātma-vidyayā

saumaṅgalya-giro viprāḥ sūta-māgadha-vandinaḥ /
gāyakāś ca jagur nedur bheryo dundubhayo muhuḥ

vrajaḥ sammṛṣṭa-saṃsikta- dvārājira-gṛhāntaraḥ /
citra-dhvaja-patākā-srak- caila-pallava-toraṇaiḥ

gāvo vṛṣā vatsatarā haridrā-taila-rūṣitāḥ /
vicitra-dhātu-barhasrag- vastra-kāñcana-mālinaḥ

mahārha-vastrābharaṇa- kañcukoṣṇīṣa-bhūṣitāḥ /
gopāḥ samāyayū rājan nānopāyana-pāṇayaḥ

gopyaś cākarṇya muditā yaśodāyāḥ sutodbhavam /
ātmānaṃ bhūṣayāṃ cakrur vastrākalpāñjanādibhiḥ

nava-kuṅkuma-kiñjalka- mukha-paṅkaja-bhūtayaḥ /
balibhis tvaritaṃ jagmuḥ pṛthu-śroṇyaś calat-kucāḥ

gopyaḥ sumṛṣṭa-maṇi-kuṇḍala-niṣka-kaṇṭhyaś $ citrāmbarāḥ pathi śikhā-cyuta-mālya-varṣāḥ &
nandālayaṃ sa-valayā vrajatīr virejur % vyālola-kuṇḍala-payodhara-hāra-śobhāḥ // BhP_10.05.011* //
tā āśiṣaḥ prayuñjānāś ciraṃ pāhīti bālake /
haridrā-cūrṇa-tailādbhiḥ siñcantyo 'janam ujjaguḥ

avādyanta vicitrāṇi vāditrāṇi mahotsave /
kṛṣṇe viśveśvare 'nante nandasya vrajam āgate

gopāḥ parasparaṃ hṛṣṭā dadhi-kṣīra-ghṛtāmbubhiḥ /
āsiñcanto vilimpanto navanītaiś ca cikṣipuḥ

nando mahā-manās tebhyo vāso 'laṅkāra-go-dhanam /
sūta-māgadha-vandibhyo ye 'nye vidyopajīvinaḥ

tais taiḥ kāmair adīnātmā yathocitam apūjayat /
viṣṇor ārādhanārthāya sva-putrasyodayāya ca

rohiṇī ca mahā-bhāgā nanda-gopābhinanditā /
vyacarad divya-vāsa-srak- kaṇṭhābharaṇa-bhūṣitā

tata ārabhya nandasya vrajaḥ sarva-samṛddhimān /
harer nivāsātma-guṇai ramākrīḍam abhūn nṛpa

gopān gokula-rakṣāyāṃ nirūpya mathurāṃ gataḥ /
nandaḥ kaṃsasya vārṣikyaṃ karaṃ dātuṃ kurūdvaha

vasudeva upaśrutya bhrātaraṃ nandam āgatam /
jñātvā datta-karaṃ rājñe yayau tad-avamocanam

taṃ dṛṣṭvā sahasotthāya dehaḥ prāṇam ivāgatam /
prītaḥ priyatamaṃ dorbhyāṃ sasvaje prema-vihvalaḥ

pūjitaḥ sukham āsīnaḥ pṛṣṭvānāmayam ādṛtaḥ /
prasakta-dhīḥ svātmajayor idam āha viśāmpate

diṣṭyā bhrātaḥ pravayasa idānīm aprajasya te /
prajāśāyā nivṛttasya prajā yat samapadyata

diṣṭyā saṃsāra-cakre 'smin vartamānaḥ punar-bhavaḥ /
upalabdho bhavān adya durlabhaṃ priya-darśanam

naikatra priya-saṃvāsaḥ suhṛdāṃ citra-karmaṇām /
oghena vyūhyamānānāṃ plavānāṃ srotaso yathā

kaccit paśavyaṃ nirujaṃ bhūry-ambu-tṛṇa-vīrudham /
bṛhad vanaṃ tad adhunā yatrāsse tvaṃ suhṛd-vṛtaḥ

bhrātar mama sutaḥ kaccin mātrā saha bhavad-vraje /
tātaṃ bhavantaṃ manvāno bhavadbhyām upalālitaḥ

puṃsas tri-vargo vihitaḥ suhṛdo hy anubhāvitaḥ /
na teṣu kliśyamāneṣu tri-vargo 'rthāya kalpate

BhP_10.05.029/0 śrī-nanda uvāca
aho te devakī-putrāḥ kaṃsena bahavo hatāḥ /
ekāvaśiṣṭāvarajā kanyā sāpi divaṃ gatā

nūnaṃ hy adṛṣṭa-niṣṭho 'yam adṛṣṭa-paramo janaḥ /
adṛṣṭam ātmanas tattvaṃ yo veda na sa muhyati

BhP_10.05.031/0 śrī-vasudeva uvāca
karo vai vārṣiko datto rājñe dṛṣṭā vayaṃ ca vaḥ /
neha stheyaṃ bahu-tithaṃ santy utpātāś ca gokule

BhP_10.05.032/0 śrī-śuka uvāca
iti nandādayo gopāḥ proktās te śauriṇā yayuḥ /
anobhir anaḍud-yuktais tam anujñāpya gokulam