Bhagavata Purana · Chapter 09.02

BhP_09.02.001/0 śrīśuka uvāca
evaṃ gate 'tha sudyumne manurvaivasvataḥ sute /
putrakāmastapastepe yamunāyāṃ śataṃ samāḥ

tato 'yajan manurdevamapatyārthaṃ hariṃ prabhum /
ikṣvākupūrvajān putrān lebhe svasadṛśān daśa

pṛṣadhrastu manoḥ putro gopālo guruṇā kṛtaḥ /
pālayāmāsa gā yatto rātryāṃ vīrāsanavrataḥ

ekadā prāviśadgoṣṭhaṃ śārdūlo niśi varṣati /
śayānā gāva utthāya bhītāstā babhramurvraje

ekāṃ jagrāha balavān sā cukrośa bhayāturā /
tasyāstu kranditaṃ śrutvā pṛṣadhro 'nusasāra ha

khaḍgamādāya tarasā pralīnoḍugaṇe niśi /
ajānannacchinodbabhroḥ śiraḥ śārdūlaśaṅkayā

vyāghro 'pi vṛkṇaśravaṇo nistriṃśāgrāhatastataḥ /
niścakrāma bhṛśaṃ bhīto raktaṃ pathi samutsṛjan

manyamāno hataṃ vyāghraṃ pṛṣadhraḥ paravīrahā /
adrākṣīt svahatāṃ babhruṃ vyuṣṭāyāṃ niśi duḥkhitaḥ

taṃ śaśāpa kulācāryaḥ kṛtāgasamakāmataḥ /
na kṣatrabandhuḥ śūdrastvaṃ karmaṇā bhavitāmunā

evaṃ śaptastu guruṇā pratyagṛhṇāt kṛtāñjaliḥ /
adhārayadvrataṃ vīra ūrdhvaretā munipriyam

vāsudeve bhagavati sarvātmani pare 'male /
ekāntitvaṃ gato bhaktyā sarvabhūtasuhṛt samaḥ

vimuktasaṅgaḥ śāntātmā saṃyatākṣo 'parigrahaḥ /
yadṛcchayopapannena kalpayan vṛttimātmanaḥ

ātmanyātmānamādhāya jñānatṛptaḥ samāhitaḥ /
vicacāra mahīmetāṃ jaḍāndhabadhirākṛtiḥ

evaṃ vṛtto vanaṃ gatvā dṛṣṭvā dāvāgnimutthitam /
tenopayuktakaraṇo brahma prāpa paraṃ muniḥ

kaviḥ kanīyān viṣayeṣu niḥspṛho visṛjya rājyaṃ saha bandhubhirvanam /
niveśya citte puruṣaṃ svarociṣaṃ viveśa kaiśoravayāḥ paraṃ gataḥ

karūṣān mānavādāsan kārūṣāḥ kṣatrajātayaḥ /
uttarāpathagoptāro brahmaṇyā dharmavatsalāḥ

dhṛṣṭāddhārṣṭamabhūt kṣatraṃ brahmabhūyaṃ gataṃ kṣitau /
nṛgasya vaṃśaḥ sumatirbhūtajyotistato vasuḥ

vasoḥ pratīkastatputra oghavān oghavatpitā /
kanyā caughavatī nāma sudarśana uvāha tām

citraseno nariṣyantādṛkṣastasya suto 'bhavat /
tasya mīḍhvāṃstataḥ pūrṇa indrasenastu tatsutaḥ

vītihotrastv indrasenāt tasya satyaśravā abhūt /
uruśravāḥ sutastasya devadattastato 'bhavat

tato 'gniveśyo bhagavān agniḥ svayamabhūt sutaḥ /
kānīna iti vikhyāto jātūkarṇyo mahān ṛṣiḥ

tato brahmakulaṃ jātamāgniveśyāyanaṃ nṛpa /
nariṣyantānvayaḥ prokto diṣṭavaṃśamataḥ śṛṇu

nābhāgo diṣṭaputro 'nyaḥ karmaṇā vaiśyatāṃ gataḥ /
bhalandanaḥ sutastasya vatsaprītirbhalandanāt

vatsaprīteḥ sutaḥ prāṃśustatsutaṃ pramatiṃ viduḥ /
khanitraḥ pramatestasmāc cākṣuṣo 'tha viviṃśatiḥ

viviṃśateḥ suto rambhaḥ khanīnetro 'sya dhārmikaḥ /
karandhamo mahārāja tasyāsīdātmajo nṛpa

tasyāvīkṣit suto yasya maruttaścakravartyabhūt /
saṃvarto 'yājayadyaṃ vai mahāyogyaṅgiraḥsutaḥ

maruttasya yathā yajño na tathānyo 'sti kaścana /
sarvaṃ hiraṇmayaṃ tv āsīdyat kiñcic cāsya śobhanam

amādyadindraḥ somena dakṣiṇābhirdvijātayaḥ /
marutaḥ pariveṣṭāro viśvedevāḥ sabhāsadaḥ

maruttasya damaḥ putrastasyāsīdrājyavardhanaḥ /
sudhṛtistatsuto jajñe saudhṛteyo naraḥ sutaḥ

tatsutaḥ kevalastasmāddhundhumān vegavāṃstataḥ /
budhastasyābhavadyasya tṛṇabindurmahīpatiḥ

taṃ bheje 'lambuṣā devī bhajanīyaguṇālayam /
varāpsarā yataḥ putrāḥ kanyā celavilābhavat

yasyāmutpādayāmāsa viśravā dhanadaṃ sutam /
prādāya vidyāṃ paramāmṛṣiryogeśvaraḥ pituḥ

viśālaḥ śūnyabandhuśca dhūmraketuśca tatsutāḥ /
viśālo vaṃśakṛdrājā vaiśālīṃ nirmame purīm

hemacandraḥ sutastasya dhūmrākṣastasya cātmajaḥ /
tatputrāt saṃyamādāsīt kṛśāśvaḥ sahadevajaḥ

kṛśāśvāt somadatto 'bhūdyo 'śvamedhairiḍaspatim /
iṣṭvā puruṣamāpāgryāṃ gatiṃ yogeśvarāśritām

saumadattistu sumatistatputro janamejayaḥ /
ete vaiśālabhūpālāstṛṇabindoryaśodharāḥ