Bhagavata Purana · Chapter 09.03

BhP_09.03.001/0 śrīśuka uvāca
śaryātirmānavo rājā brahmiṣṭhaḥ sambabhūva ha /
yo vā aṅgirasāṃ satre dvitīyamaharūcivān

sukanyā nāma tasyāsīt kanyā kamalalocanā /
tayā sārdhaṃ vanagato hyagamac cyavanāśramam

sā sakhībhiḥ parivṛtā vicinvantyaṅghripān vane /
valmīkarandhre dadṛśe khadyote iva jyotiṣī

te daivacoditā bālā jyotiṣī kaṇṭakena vai /
avidhyan mugdhabhāvena susrāvāsṛk tato bahiḥ

śakṛnmūtranirodho 'bhūt sainikānāṃ ca tatkṣaṇāt /
rājarṣistamupālakṣya puruṣān vismito 'bravīt

apyabhadraṃ na yuṣmābhirbhārgavasya viceṣṭitam /
vyaktaṃ kenāpi nastasya kṛtamāśramadūṣaṇam

sukanyā prāha pitaraṃ bhītā kiñcit kṛtaṃ mayā /
dve jyotiṣī ajānantyā nirbhinne kaṇṭakena vai

duhitustadvacaḥ śrutvā śaryātirjātasādhvasaḥ /
muniṃ prasādayāmāsa valmīkāntarhitaṃ śanaiḥ

tadabhiprāyamājñāya prādādduhitaraṃ muneḥ /
kṛcchrān muktastamāmantrya puraṃ prāyāt samāhitaḥ

sukanyā cyavanaṃ prāpya patiṃ paramakopanam /
prīṇayāmāsa cittajñā apramattānuvṛttibhiḥ

kasyacit tv atha kālasya nāsatyāv āśramāgatau /
tau pūjayitvā provāca vayo me dattamīśvarau

grahaṃ grahīṣye somasya yajñe vāmapyasomapoḥ /
kriyatāṃ me vayorūpaṃ pramadānāṃ yadīpsitam

bāḍhamityūcaturvipramabhinandya bhiṣaktamau /
nimajjatāṃ bhavān asmin hrade siddhavinirmite

ityukto jarayā grasta deho dhamanisantataḥ /
hradaṃ praveśito 'śvibhyāṃ valīpalitavigrahaḥ

puruṣāstraya uttasthurapīvyā vanitāpriyāḥ /
padmasrajaḥ kuṇḍalinastulyarūpāḥ suvāsasaḥ

tān nirīkṣya varārohā sarūpān sūryavarcasaḥ /
ajānatī patiṃ sādhvī aśvinau śaraṇaṃ yayau

darśayitvā patiṃ tasyai pātivratyena toṣitau /
ṛṣimāmantrya yayaturvimānena triviṣṭapam

yakṣyamāṇo 'tha śaryātiścyavanasyāśramaṃ gataḥ /
dadarśa duhituḥ pārśve puruṣaṃ sūryavarcasam

rājā duhitaraṃ prāha kṛtapādābhivandanām /
āśiṣaścāprayuñjāno nātiprītimanā iva

cikīrṣitaṃ te kimidaṃ patistvayā pralambhito lokanamaskṛto muniḥ /
yat tvaṃ jarāgrastamasatyasammataṃ vihāya jāraṃ bhajase 'mumadhvagam

kathaṃ matiste 'vagatānyathā satāṃ kulaprasūte kuladūṣaṇaṃ tv idam /
bibharṣi jāraṃ yadapatrapā kulaṃ pituśca bhartuśca nayasyadhastamaḥ

evaṃ bruvāṇaṃ pitaraṃ smayamānā śucismitā /
uvāca tāta jāmātā tavaiṣa bhṛgunandanaḥ

śaśaṃsa pitre tat sarvaṃ vayorūpābhilambhanam /
vismitaḥ paramaprītastanayāṃ pariṣasvaje

somena yājayan vīraṃ grahaṃ somasya cāgrahīt /
asomaporapyaśvinoścyavanaḥ svena tejasā

hantuṃ tamādade vajraṃ sadyo manyuramarṣitaḥ /
savajraṃ stambhayāmāsa bhujamindrasya bhārgavaḥ

anvajānaṃstataḥ sarve grahaṃ somasya cāśvinoḥ /
bhiṣajāv iti yat pūrvaṃ somāhutyā bahiṣkṛtau

uttānabarhirānarto bhūriṣeṇa iti trayaḥ /
śaryāterabhavan putrā ānartādrevato 'bhavat

so 'ntaḥsamudre nagarīṃ vinirmāya kuśasthalīm /
āsthito 'bhuṅkta viṣayān ānartādīn arindama

tasya putraśataṃ jajñe kakudmijyeṣṭhamuttamam /
kakudmī revatīṃ kanyāṃ svāmādāya vibhuṃ gataḥ

putryā varaṃ paripraṣṭuṃ brahmalokamapāvṛtam /
āvartamāne gāndharve sthito 'labdhakṣaṇaḥ kṣaṇam

tadanta ādyamānamya svābhiprāyaṃ nyavedayat /
tac chrutvā bhagavān brahmā prahasya tamuvāca ha

aho rājan niruddhāste kālena hṛdi ye kṛtāḥ /
tat putrapautranapt-ṇāṃ gotrāṇi ca na śṛṇmahe

kālo 'bhiyātastriṇava caturyugavikalpitaḥ /
tadgaccha devadevāṃśo baladevo mahābalaḥ

kanyāratnamidaṃ rājan nararatnāya dehi bhoḥ /
bhuvo bhārāvatārāya bhagavān bhūtabhāvanaḥ

avatīrṇo nijāṃśena puṇyaśravaṇakīrtanaḥ /
ityādiṣṭo 'bhivandyājaṃ nṛpaḥ svapuramāgataḥ /
tyaktaṃ puṇyajanatrāsādbhrātṛbhirdikṣv avasthitaiḥ

sutāṃ dattvānavadyāṅgīṃ balāya balaśāline /
badaryākhyaṃ gato rājā taptuṃ nārāyaṇāśramam