Bhagavata Purana · Chapter 08.20

BhP_08.20.001/0 śrīśuka uvāca
balirevaṃ gṛhapatiḥ kulācāryeṇa bhāṣitaḥ /
tūṣṇīṃ bhūtvā kṣaṇaṃ rājannuvācāvahito gurum

BhP_08.20.002/0 śrībaliruvāca
satyaṃ bhagavatā proktaṃ dharmo 'yaṃ gṛhamedhinām /
arthaṃ kāmaṃ yaśo vṛttiṃ yo na bādheta karhicit

sa cāhaṃ vittalobhena pratyācakṣe kathaṃ dvijam /
pratiśrutya dadāmīti prāhrādiḥ kitavo yathā

na hy asatyāt paro 'dharma iti hovāca bhūriyam /
sarvaṃ soḍhumalaṃ manye ṛte 'līkaparaṃ naram

nāhaṃ bibhemi nirayān nādhanyādasukhārṇavāt /
na sthānacyavanān mṛtyoryathā viprapralambhanāt

yadyaddhāsyati loke 'smin samparetaṃ dhanādikam /
tasya tyāge nimittaṃ kiṃ viprastuṣyen na tena cet

śreyaḥ kurvanti bhūtānāṃ sādhavo dustyajāsubhiḥ /
dadhyaṅśibiprabhṛtayaḥ ko vikalpo dharādiṣu

yairiyaṃ bubhuje brahman daityendrairanivartibhiḥ /
teṣāṃ kālo 'grasīl lokān na yaśo 'dhigataṃ bhuvi

sulabhā yudhi viprarṣe hy anivṛttāstanutyajaḥ /
na tathā tīrtha āyāte śraddhayā ye dhanatyajaḥ

manasvinaḥ kāruṇikasya śobhanaṃ yadarthikāmopanayena durgatiḥ /
kutaḥ punarbrahmavidāṃ bhavādṛśāṃ tato vaṭorasya dadāmi vāñchitam

yajanti yajñaṃ kratubhiryamādṛtā bhavanta āmnāyavidhānakovidāḥ /
sa eva viṣṇurvarado 'stu vā paro dāsyāmy amuṣmai kṣitimīpsitāṃ mune

yadyapy asāvadharmeṇa māṃ badhnīyādanāgasam /
tathāpy enaṃ na hiṃsiṣye bhītaṃ brahmatanuṃ ripum

eṣa vā uttamaśloko na jihāsati yadyaśaḥ /
hatvā maināṃ haredyuddhe śayīta nihato mayā

BhP_08.20.014/0 śrīśuka uvāca
evamaśraddhitaṃ śiṣyamanādeśakaraṃ guruḥ /
śaśāpa daivaprahitaḥ satyasandhaṃ manasvinam

dṛḍhaṃ paṇḍitamāny ajñaḥ stabdho 'sy asmadupekṣayā /
macchāsanātigo yastvamacirādbhraśyase śriyaḥ

evaṃ śaptaḥ svaguruṇā satyān na calito mahān /
vāmanāya dadāvenāmarcitvodakapūrvakam

vindhyāvalistadāgatya patnī jālakamālinī /
āninye kalaśaṃ haimamavanejanyapāṃ bhṛtam

yajamānaḥ svayaṃ tasya śrīmat pādayugaṃ mudā /
avanijyāvahan mūrdhni tadapo viśvapāvanīḥ

tadāsurendraṃ divi devatāgaṇā gandharvavidyādharasiddhacāraṇāḥ /
tat karma sarve 'pi gṛṇanta ārjavaṃ prasūnavarṣairvavṛṣurmudānvitāḥ

nedurmuhurdundubhayaḥ sahasraśo gandharvakimpūruṣakinnarā jaguḥ /
manasvinānena kṛtaṃ suduṣkaraṃ vidvān adādyadripave jagattrayam

tadvāmanaṃ rūpamavardhatādbhutaṃ hareranantasya guṇatrayātmakam /
bhūḥ khaṃ diśo dyaurvivarāḥ payodhayas tiryaṅnṛdevā ṛṣayo yadāsata

kāye balistasya mahāvibhūteḥ sahartvigācāryasadasya etat /
dadarśa viśvaṃ triguṇaṃ guṇātmake bhūtendriyārthāśayajīvayuktam

rasāmacaṣṭāṅghritale 'tha pādayor mahīṃ mahīdhrān puruṣasya jaṅghayoḥ /
patattriṇo jānuni viśvamūrter ūrvorgaṇaṃ mārutamindrasenaḥ

sandhyāṃ vibhorvāsasi guhya aikṣat prajāpatīn jaghane ātmamukhyān /
nābhyāṃ nabhaḥ kukṣiṣu saptasindhūn urukramasyorasi carkṣamālām

hṛdy aṅga dharmaṃ stanayormurārer ṛtaṃ ca satyaṃ ca manasy athendum /
śriyaṃ ca vakṣasy aravindahastāṃ kaṇṭhe ca sāmāni samastarephān

indrapradhānān amarān bhujeṣu tatkarṇayoḥ kakubho dyauśca mūrdhni /
keśeṣu meghān chvasanaṃ nāsikāyām akṣṇośca sūryaṃ vadane ca vahnim

vāṇyāṃ ca chandāṃsi rase jaleśaṃ bhruvorniṣedhaṃ ca vidhiṃ ca pakṣmasu /
ahaśca rātriṃ ca parasya puṃso manyuṃ lalāṭe 'dhara eva lobham

sparśe ca kāmaṃ nṛpa retasāmbhaḥ pṛṣṭhe tvadharmaṃ kramaṇeṣu yajñam /
chāyāsu mṛtyuṃ hasite ca māyāṃ tanūruheṣvoṣadhijātayaśca

nadīśca nāḍīṣu śilā nakheṣu buddhāvajaṃ devagaṇān ṛṣīṃśca /
prāṇeṣu gātre sthirajaṅgamāni sarvāṇi bhūtāni dadarśa vīraḥ

sarvātmanīdaṃ bhuvanaṃ nirīkṣya sarve 'surāḥ kaśmalamāpuraṅga /
sudarśanaṃ cakramasahyatejo dhanuśca śārṅgaṃ stanayitnughoṣam

parjanyaghoṣo jalajaḥ pāñcajanyaḥ kaumodakī viṣṇugadā tarasvinī /
vidyādharo 'siḥ śatacandrayuktas tūṇottamāvakṣayasāyakau ca

sunandamukhyā upatasthurīśaṃ pārṣadamukhyāḥ sahalokapālāḥ /
sphuratkirīṭāṅgadamīnakuṇḍalaḥ śrīvatsaratnottamamekhalāmbaraiḥ

madhuvratasragvanamālayāvṛto rarāja rājan bhagavān urukramaḥ /
kṣitiṃ padaikena balervicakrame nabhaḥ śarīreṇa diśaśca bāhubhiḥ

padaṃ dvitīyaṃ kramatastriviṣṭapaṃ na vai tṛtīyāya tadīyamaṇvapi /
urukramasyāṅghrirupary upary atho maharjanābhyāṃ tapasaḥ paraṃ gataḥ