Bhagavata Purana · Chapter 08.21

BhP_08.21.001/0 śrīśuka uvāca
satyaṃ samīkṣyābjabhavo nakhendubhir hatasvadhāmadyutirāvṛto 'bhyagāt /
marīcimiśrā ṛṣayo bṛhadvratāḥ sanandanādyā naradeva yoginaḥ

vedopavedā niyamā yamānvitās tarketihāsāṅgapurāṇasaṃhitāḥ /
ye cāpare yogasamīradīpita jñānāgninā randhitakarmakalmaṣāḥ /
vavandire yatsmaraṇānubhāvataḥ svāyambhuvaṃ dhāma gatā akarmakam

athāṅghraye pronnamitāya viṣṇor upāharat padmabhavo 'rhaṇodakam /
samarcya bhaktyābhyagṛṇāc chuciśravā yannābhipaṅkeruhasambhavaḥ svayam

dhātuḥ kamaṇḍalujalaṃ tadurukramasya pādāvanejanapavitratayā narendra /
svardhuny abhūn nabhasi sā patatī nimārṣṭi lokatrayaṃ bhagavato viśadeva kīrtiḥ

brahmādayo lokanāthāḥ svanāthāya samādṛtāḥ /
sānugā balimājahruḥ saṅkṣiptātmavibhūtaye

toyaiḥ samarhaṇaiḥ sragbhirdivyagandhānulepanaiḥ /
dhūpairdīpaiḥ surabhibhirlājākṣataphalāṅkuraiḥ

stavanairjayaśabdaiśca tadvīryamahimāṅkitaiḥ /
nṛtyavāditragītaiśca śaṅkhadundubhiniḥsvanaiḥ

jāmbavān ṛkṣarājastu bherīśabdairmanojavaḥ /
vijayaṃ dikṣu sarvāsu mahotsavamaghoṣayat

mahīṃ sarvāṃ hṛtāṃ dṛṣṭvā tripadavyājayācñayā /
ūcuḥ svabharturasurā dīkṣitasyātyamarṣitāḥ

na vāyaṃ brahmabandhurviṣṇurmāyāvināṃ varaḥ /
dvijarūpapraticchanno devakāryaṃ cikīrṣati

anena yācamānena śatruṇā vaṭurūpiṇā /
sarvasvaṃ no hṛtaṃ bharturnyastadaṇḍasya barhiṣi

satyavratasya satataṃ dīkṣitasya viśeṣataḥ /
nānṛtaṃ bhāṣituṃ śakyaṃ brahmaṇyasya dayāvataḥ

tasmādasya vadho dharmo bhartuḥ śuśrūṣaṇaṃ ca naḥ /
ity āyudhāni jagṛhurbaleranucarāsurāḥ

te sarve vāmanaṃ hantuṃ śūlapaṭṭiśapāṇayaḥ /
anicchanto bale rājan prādravan jātamanyavaḥ

tān abhidravato dṛṣṭvā ditijānīkapān nṛpa /
prahasyānucarā viṣṇoḥ pratyaṣedhannudāyudhāḥ

nandaḥ sunando 'tha jayo vijayaḥ prabalo balaḥ /
kumudaḥ kumudākṣaśca viṣvaksenaḥ patattrirāṭ

jayantaḥ śrutadevaśca puṣpadanto 'tha sātvataḥ /
sarve nāgāyutaprāṇāścamūṃ te jaghnurāsurīm

hanyamānān svakān dṛṣṭvā puruṣānucarairbaliḥ /
vārayāmāsa saṃrabdhān kāvyaśāpamanusmaran

he vipracitte he rāho he neme śrūyatāṃ vacaḥ /
mā yudhyata nivartadhvaṃ na naḥ kālo 'yamarthakṛt

yaḥ prabhuḥ sarvabhūtānāṃ sukhaduḥkhopapattaye /
taṃ nātivartituṃ daityāḥ pauruṣairīśvaraḥ pumān

yo no bhavāya prāg āsīdabhavāya divaukasām /
sa eva bhagavān adya vartate tadviparyayam

balena sacivairbuddhyā durgairmantrauṣadhādibhiḥ /
sāmādibhirupāyaiśca kālaṃ nātyeti vai janaḥ

bhavadbhirnirjitā hy ete bahuśo 'nucarā hareḥ /
daivenarddhaista evādya yudhi jitvā nadanti naḥ

etān vayaṃ vijeṣyāmo yadi daivaṃ prasīdati /
tasmāt kālaṃ pratīkṣadhvaṃ yo no 'rthatvāya kalpate

BhP_08.21.025/0 śrīśuka uvāca
patyurnigaditaṃ śrutvā daityadānavayūthapāḥ /
rasāṃ nirviviśū rājan viṣṇupārṣada tāḍitāḥ

atha tārkṣyasuto jñātvā virāṭ prabhucikīrṣitam /
babandha vāruṇaiḥ pāśairbaliṃ sūtye 'hani kratau

hāhākāro mahān āsīdrodasyoḥ sarvato diśam /
nigṛhyamāṇe 'surapatau viṣṇunā prabhaviṣṇunā

taṃ baddhaṃ vāruṇaiḥ pāśairbhagavān āha vāmanaḥ /
naṣṭaśriyaṃ sthiraprajñamudārayaśasaṃ nṛpa

padāni trīṇi dattāni bhūmermahyaṃ tvayāsura /
dvābhyāṃ krāntā mahī sarvā tṛtīyamupakalpaya

yāvat tapaty asau gobhiryāvadinduḥ sahoḍubhiḥ /
yāvadvarṣati parjanyastāvatī bhūriyaṃ tava

padaikena mayākrānto bhūrlokaḥ khaṃ diśastanoḥ /
svarlokaste dvitīyena paśyataste svamātmanā

pratiśrutamadātuste niraye vāsa iṣyate /
viśa tvaṃ nirayaṃ tasmādguruṇā cānumoditaḥ

vṛthā manorathastasya dūraḥ svargaḥ pataty adhaḥ /
pratiśrutasyādānena yo 'rthinaṃ vipralambhate

vipralabdho dadāmīti tvayāhaṃ cāḍhyamāninā /
tadvyalīkaphalaṃ bhuṅkṣva nirayaṃ katicit samāḥ