Bhagavata Purana · Chapter 08.15

BhP_08.15.001/0 śrīrājovāca
baleḥ padatrayaṃ bhūmeḥ kasmāddharirayācata /
bhūteśvaraḥ kṛpaṇaval labdhārtho 'pi babandha tam

etadveditumicchāmo mahat kautūhalaṃ hi naḥ /
yajñeśvarasya pūrṇasya bandhanaṃ cāpy anāgasaḥ

BhP_08.15.003/0 śrīśuka uvāca
parājitaśrīrasubhiśca hāpito hīndreṇa rājan bhṛgubhiḥ sa jīvitaḥ /
sarvātmanā tān abhajadbhṛgūn baliḥ śiṣyo mahātmārthanivedanena

taṃ brāhmaṇā bhṛgavaḥ prīyamāṇā ayājayan viśvajitā triṇākam /
jigīṣamāṇaṃ vidhinābhiṣicya mahābhiṣekeṇa mahānubhāvāḥ

tato rathaḥ kāñcanapaṭṭanaddho hayāśca haryaśvaturaṅgavarṇāḥ /
dhvajaśca siṃhena virājamāno hutāśanādāsa havirbhiriṣṭāt

dhanuśca divyaṃ puraṭopanaddhaṃ tūṇāvariktau kavacaṃ ca divyam /
pitāmahastasya dadau ca mālām amlānapuṣpāṃ jalajaṃ ca śukraḥ

evaṃ sa viprārjitayodhanārthas taiḥ kalpitasvastyayano 'tha viprān /
pradakṣiṇīkṛtya kṛtapraṇāmaḥ prahrādamāmantrya namaścakāra

athāruhya rathaṃ divyaṃ bhṛgudattaṃ mahārathaḥ /
susragdharo 'tha sannahya dhanvī khaḍgī dhṛteṣudhiḥ

hemāṅgadalasadbāhuḥ sphuranmakarakuṇḍalaḥ /
rarāja rathamārūḍho dhiṣṇyastha iva havyavāṭ

tulyaiśvaryabalaśrībhiḥ svayūthairdaityayūthapaiḥ /
pibadbhiriva khaṃ dṛgbhirdahadbhiḥ paridhīn iva

vṛto vikarṣan mahatīmāsurīṃ dhvajinīṃ vibhuḥ /
yayāvindrapurīṃ svṛddhāṃ kampayanniva rodasī

ramyāmupavanodyānaiḥ śrīmadbhirnandanādibhiḥ /
kūjadvihaṅgamithunairgāyanmattamadhuvrataiḥ

pravālaphalapuṣporu bhāraśākhāmaradrumaiḥ /
haṃsasārasacakrāhva kāraṇḍavakulākulāḥ /
nalinyo yatra krīḍanti pramadāḥ surasevitāḥ

ākāśagaṅgayā devyā vṛtāṃ parikhabhūtayā /
prākāreṇāgnivarṇena sāṭṭālenonnatena ca

rukmapaṭṭakapāṭaiśca dvāraiḥ sphaṭikagopuraiḥ /
juṣṭāṃ vibhaktaprapathāṃ viśvakarmavinirmitām

sabhācatvararathyāḍhyāṃ vimānairnyarbudairyutām /
śṛṅgāṭakairmaṇimayairvajravidrumavedibhiḥ

yatra nityavayorūpāḥ śyāmā virajavāsasaḥ /
bhrājante rūpavannāryo hy arcirbhiriva vahnayaḥ

surastrīkeśavibhraṣṭa navasaugandhikasrajām /
yatrāmodamupādāya mārga āvāti mārutaḥ

hemajālākṣanirgacchad dhūmenāgurugandhinā /
pāṇḍureṇa praticchanna mārge yānti surapriyāḥ

muktāvitānairmaṇihemaketubhir nānāpatākāvalabhībhirāvṛtām /
śikhaṇḍipārāvatabhṛṅganāditāṃ vaimānikastrīkalagītamaṅgalām

mṛdaṅgaśaṅkhānakadundubhisvanaiḥ satālavīṇāmurajeṣṭaveṇubhiḥ /
nṛtyaiḥ savādyairupadevagītakair manoramāṃ svaprabhayā jitaprabhām

yāṃ na vrajanty adharmiṣṭhāḥ khalā bhūtadruhaḥ śaṭhāḥ /
māninaḥ kāmino lubdhā ebhirhīnā vrajanti yat

tāṃ devadhānīṃ sa varūthinīpatir bahiḥ samantādrurudhe pṛtanyayā /
ācāryadattaṃ jalajaṃ mahāsvanaṃ dadhmau prayuñjan bhayamindrayoṣitām

maghavāṃstamabhipretya baleḥ paramamudyamam /
sarvadevagaṇopeto gurumetaduvāca ha

bhagavannudyamo bhūyān balernaḥ pūrvavairiṇaḥ /
aviṣahyamimaṃ manye kenāsīt tejasorjitaḥ

nainaṃ kaścit kuto vāpi prativyoḍhumadhīśvaraḥ /
pibanniva mukhenedaṃ lihanniva diśo daśa /
dahanniva diśo dṛgbhiḥ saṃvartāgnirivotthitaḥ

brūhi kāraṇametasya durdharṣatvasya madripoḥ /
ojaḥ saho balaṃ tejo yata etat samudyamaḥ

BhP_08.15.028/0 śrīgururuvāca
jānāmi maghavan chatrorunnaterasya kāraṇam /
śiṣyāyopabhṛtaṃ tejo bhṛgubhirbrahmavādibhiḥ

ojasvinaṃ baliṃ jetuṃ na samartho 'sti kaścana /
bhavadvidho bhavān vāpi varjayitveśvaraṃ harim

vijeṣyati na ko 'py enaṃ brahmatejaḥsamedhitam /
nāsya śaktaḥ puraḥ sthātuṃ kṛtāntasya yathā janāḥ

tasmān nilayamutsṛjya yūyaṃ sarve triviṣṭapam /
yāta kālaṃ pratīkṣanto yataḥ śatrorviparyayaḥ

eṣa viprabalodarkaḥ sampraty ūrjitavikramaḥ /
teṣāmevāpamānena sānubandho vinaṅkṣyati

evaṃ sumantritārthāste guruṇārthānudarśinā /
hitvā triviṣṭapaṃ jagmurgīrvāṇāḥ kāmarūpiṇaḥ

deveṣvatha nilīneṣu balirvairocanaḥ purīm /
devadhānīmadhiṣṭhāya vaśaṃ ninye jagattrayam

taṃ viśvajayinaṃ śiṣyaṃ bhṛgavaḥ śiṣyavatsalāḥ /
śatena hayamedhānāmanuvratamayājayan

tatastadanubhāvena bhuvanatrayaviśrutām /
kīrtiṃ dikṣuvitanvānaḥ sa reja uḍurāḍ iva

bubhuje ca śriyaṃ svṛddhāṃ dvijadevopalambhitām /
kṛtakṛtyamivātmānaṃ manyamāno mahāmanāḥ