Bhagavata Purana · Chapter 08.14

BhP_08.14.001/0 śrīrājovāca
manvantareṣu bhagavan yathā manvādayastvime /
yasmin karmaṇi ye yena niyuktāstadvadasva me

BhP_08.14.002/0 śrīṛṣiruvāca
manavo manuputrāśca munayaśca mahīpate /
indrāḥ suragaṇāścaiva sarve puruṣaśāsanāḥ

yajñādayo yāḥ kathitāḥ pauruṣyastanavo nṛpa /
manvādayo jagadyātrāṃ nayanty ābhiḥ pracoditāḥ

caturyugānte kālena grastān chrutigaṇān yathā /
tapasā ṛṣayo 'paśyan yato dharmaḥ sanātanaḥ

tato dharmaṃ catuṣpādaṃ manavo hariṇoditāḥ /
yuktāḥ sañcārayanty addhā sve sve kāle mahīṃ nṛpa

pālayanti prajāpālā yāvadantaṃ vibhāgaśaḥ /
yajñabhāgabhujo devā ye ca tatrānvitāśca taiḥ

indro bhagavatā dattāṃ trailokyaśriyamūrjitām /
bhuñjānaḥ pāti lokāṃstrīn kāmaṃ loke pravarṣati

jñānaṃ cānuyugaṃ brūte hariḥ siddhasvarūpadhṛk /
ṛṣirūpadharaḥ karma yogaṃ yogeśarūpadhṛk

sargaṃ prajeśarūpeṇa dasyūn hanyāt svarāḍvapuḥ /
kālarūpeṇa sarveṣāmabhāvāya pṛthag guṇaḥ

stūyamāno janairebhirmāyayā nāmarūpayā /
vimohitātmabhirnānā darśanairna ca dṛśyate

etat kalpavikalpasya pramāṇaṃ parikīrtitam /
yatra manvantarāṇy āhuścaturdaśa purāvidaḥ