Bhagavata Purana · Chapter 08.16

BhP_08.16.001/0 śrīśuka uvāca
evaṃ putreṣu naṣṭeṣu devamātāditistadā /
hṛte triviṣṭape daityaiḥ paryatapyadanāthavat

ekadā kaśyapastasyā āśramaṃ bhagavān agāt /
nirutsavaṃ nirānandaṃ samādhervirataścirāt

sa patnīṃ dīnavadanāṃ kṛtāsanaparigrahaḥ /
sabhājito yathānyāyamidamāha kurūdvaha

apy abhadraṃ na viprāṇāṃ bhadre loke 'dhunāgatam /
na dharmasya na lokasya mṛtyośchandānuvartinaḥ

api vākuśalaṃ kiñcidgṛheṣu gṛhamedhini /
dharmasyārthasya kāmasya yatra yogo hy ayoginām

api vātithayo 'bhyetya kuṭumbāsaktayā tvayā /
gṛhādapūjitā yātāḥ pratyutthānena vā kvacit

gṛheṣu yeṣvatithayo nārcitāḥ salilairapi /
yadi niryānti te nūnaṃ pherurājagṛhopamāḥ

apy agnayastu velāyāṃ na hutā haviṣā sati /
tvayodvignadhiyā bhadre proṣite mayi karhicit

yatpūjayā kāmadughān yāti lokān gṛhānvitaḥ /
brāhmaṇo 'gniśca vai viṣṇoḥ sarvadevātmano mukham

api sarve kuśalinastava putrā manasvini /
lakṣaye 'svasthamātmānaṃ bhavatyā lakṣaṇairaham

BhP_08.16.011/0 śrīaditiruvāca
bhadraṃ dvijagavāṃ brahman dharmasyāsya janasya ca /
trivargasya paraṃ kṣetraṃ gṛhamedhin gṛhā ime

agnayo 'tithayo bhṛtyā bhikṣavo ye ca lipsavaḥ /
sarvaṃ bhagavato brahmannanudhyānān na riṣyati

ko nu me bhagavan kāmo na sampadyeta mānasaḥ /
yasyā bhavān prajādhyakṣa evaṃ dharmān prabhāṣate

tavaiva mārīca manaḥśarīrajāḥ prajā imāḥ sattvarajastamojuṣaḥ /
samo bhavāṃstāsvasurādiṣu prabho tathāpi bhaktaṃ bhajate maheśvaraḥ

tasmādīśa bhajantyā me śreyaścintaya suvrata /
hṛtaśriyo hṛtasthānān sapatnaiḥ pāhi naḥ prabho

parairvivāsitā sāhaṃ magnā vyasanasāgare /
aiśvaryaṃ śrīryaśaḥ sthānaṃ hṛtāni prabalairmama

yathā tāni punaḥ sādho prapadyeran mamātmajāḥ /
tathā vidhehi kalyāṇaṃ dhiyā kalyāṇakṛttama

BhP_08.16.018/0 śrīśuka uvāca
evamabhyarthito 'dityā kastāmāha smayanniva /
aho māyābalaṃ viṣṇoḥ snehabaddhamidaṃ jagat

kva deho bhautiko 'nātmā kva cātmā prakṛteḥ paraḥ /
kasya ke patiputrādyā moha eva hi kāraṇam

upatiṣṭhasva puruṣaṃ bhagavantaṃ janārdanam /
sarvabhūtaguhāvāsaṃ vāsudevaṃ jagadgurum

sa vidhāsyati te kāmān harirdīnānukampanaḥ /
amoghā bhagavadbhaktirnetareti matirmama

BhP_08.16.022/0 śrīaditiruvāca
kenāhaṃ vidhinā brahmannupasthāsye jagatpatim /
yathā me satyasaṅkalpo vidadhyāt sa manoratham

ādiśa tvaṃ dvijaśreṣṭha vidhiṃ tadupadhāvanam /
āśu tuṣyati me devaḥ sīdantyāḥ saha putrakaiḥ

BhP_08.16.024/0 śrīkaśyapa uvāca
etan me bhagavān pṛṣṭaḥ prajākāmasya padmajaḥ /
yadāha te pravakṣyāmi vrataṃ keśavatoṣaṇam

phālgunasyāmale pakṣe dvādaśāhaṃ payovratam /
arcayedaravindākṣaṃ bhaktyā paramayānvitaḥ

sinīvālyāṃ mṛdālipya snāyāt kroḍavidīrṇayā /
yadi labhyeta vai srotasy etaṃ mantramudīrayet

tvaṃ devy ādivarāheṇa rasāyāḥ sthānamicchatā /
uddhṛtāsi namastubhyaṃ pāpmānaṃ me praṇāśaya

nirvartitātmaniyamo devamarcet samāhitaḥ /
arcāyāṃ sthaṇḍile sūrye jale vahnau gurāvapi

namastubhyaṃ bhagavate puruṣāya mahīyase /
sarvabhūtanivāsāya vāsudevāya sākṣiṇe

namo 'vyaktāya sūkṣmāya pradhānapuruṣāya ca /
caturviṃśadguṇajñāya guṇasaṅkhyānahetave

namo dviśīrṣṇe tripade catuḥśṛṅgāya tantave /
saptahastāya yajñāya trayīvidyātmane namaḥ

namaḥ śivāya rudrāya namaḥ śaktidharāya ca /
sarvavidyādhipataye bhūtānāṃ pataye namaḥ

namo hiraṇyagarbhāya prāṇāya jagadātmane /
yogaiśvaryaśarīrāya namaste yogahetave

namasta ādidevāya sākṣibhūtāya te namaḥ /
nārāyaṇāya ṛṣaye narāya haraye namaḥ

namo marakataśyāma vapuṣe 'dhigataśriye /
keśavāya namastubhyaṃ namaste pītavāsase

tvaṃ sarvavaradaḥ puṃsāṃ vareṇya varadarṣabha /
ataste śreyase dhīrāḥ pādareṇumupāsate

anvavartanta yaṃ devāḥ śrīśca tatpādapadmayoḥ /
spṛhayanta ivāmodaṃ bhagavān me prasīdatām

etairmantrairhṛṣīkeśamāvāhanapuraskṛtam /
arcayec chraddhayā yuktaḥ pādyopasparśanādibhiḥ

arcitvā gandhamālyādyaiḥ payasā snapayedvibhum /
vastropavītābharaṇa pādyopasparśanaistataḥ /
gandhadhūpādibhiścārceddvādaśākṣaravidyayā

śṛtaṃ payasi naivedyaṃ śālyannaṃ vibhave sati /
sasarpiḥ saguḍaṃ dattvā juhuyān mūlavidyayā

niveditaṃ tadbhaktāya dadyādbhuñjīta vā svayam /
dattvācamanamarcitvā tāmbūlaṃ ca nivedayet

japedaṣṭottaraśataṃ stuvīta stutibhiḥ prabhum /
kṛtvā pradakṣiṇaṃ bhūmau praṇameddaṇḍavan mudā

kṛtvā śirasi taccheṣāṃ devamudvāsayet tataḥ /
dvyavarān bhojayedviprān pāyasena yathocitam

bhuñjīta tairanujñātaḥ seṣṭaḥ śeṣaṃ sabhājitaiḥ /
brahmacāry atha tadrātryāṃ śvo bhūte prathame 'hani

snātaḥ śuciryathoktena vidhinā susamāhitaḥ /
payasā snāpayitvārcedyāvadvratasamāpanam

payobhakṣo vratamidaṃ caredviṣṇvarcanādṛtaḥ /
pūrvavaj juhuyādagniṃ brāhmaṇāṃścāpi bhojayet

evaṃ tvaharahaḥ kuryāddvādaśāhaṃ payovratam /
harerārādhanaṃ homamarhaṇaṃ dvijatarpaṇam

pratipaddinamārabhya yāvac chuklatrayodaśīm /
brahmacaryamadhaḥsvapnaṃ snānaṃ triṣavaṇaṃ caret

varjayedasadālāpaṃ bhogān uccāvacāṃstathā /
ahiṃsraḥ sarvabhūtānāṃ vāsudevaparāyaṇaḥ

trayodaśyāmatho viṣṇoḥ snapanaṃ pañcakairvibhoḥ /
kārayec chāstradṛṣṭena vidhinā vidhikovidaiḥ

pūjāṃ ca mahatīṃ kuryādvittaśāṭhyavivarjitaḥ /
caruṃ nirūpya payasi śipiviṣṭāya viṣṇave

sūktena tena puruṣaṃ yajeta susamāhitaḥ /
naivedyaṃ cātiguṇavaddadyāt puruṣatuṣṭidam

ācāryaṃ jñānasampannaṃ vastrābharaṇadhenubhiḥ /
toṣayedṛtvijaścaiva tadviddhy ārādhanaṃ hareḥ

bhojayet tān guṇavatā sadannena śucismite /
anyāṃśca brāhmaṇān chaktyā ye ca tatra samāgatāḥ

dakṣiṇāṃ gurave dadyādṛtvigbhyaśca yathārhataḥ /
annādyenāśvapākāṃśca prīṇayet samupāgatān

bhuktavatsu ca sarveṣu dīnāndhakṛpaṇādiṣu /
viṣṇostat prīṇanaṃ vidvān bhuñjīta saha bandhubhiḥ

nṛtyavāditragītaiśca stutibhiḥ svastivācakaiḥ /
kārayet tatkathābhiśca pūjāṃ bhagavato 'nvaham

etat payovrataṃ nāma puruṣārādhanaṃ param /
pitāmahenābhihitaṃ mayā te samudāhṛtam

tvaṃ cānena mahābhāge samyak cīrṇena keśavam /
ātmanā śuddhabhāvena niyatātmā bhajāvyayam

ayaṃ vai sarvayajñākhyaḥ sarvavratamiti smṛtam /
tapaḥsāramidaṃ bhadre dānaṃ ceśvaratarpaṇam

ta eva niyamāḥ sākṣāt ta eva ca yamottamāḥ /
tapo dānaṃ vrataṃ yajño yena tuṣyaty adhokṣajaḥ

tasmādetadvrataṃ bhadre prayatā śraddhayācara /
bhagavān parituṣṭaste varān āśu vidhāsyati