Bhagavata Purana · Chapter 08.13

asadaviṣayamaṅghriṃ bhāvagamyaṃ prapannān $ amṛtamamaravaryān āśayat sindhumathyam &
kapaṭayuvativeṣo mohayan yaḥ surārīṃs % tamahamupasṛtānāṃ kāmapūraṃ nato 'smi // BhP_08.12.047*
0 śrīśuka uvāca
manurvivasvataḥ putraḥ śrāddhadeva iti śrutaḥ /
saptamo vartamāno yastadapatyāni me śṛṇu

ikṣvākurnabhagaścaiva dhṛṣṭaḥ śaryātireva ca /
nariṣyanto 'tha nābhāgaḥ saptamo diṣṭa ucyate

tarūṣaśca pṛṣadhraśca daśamo vasumān smṛtaḥ /
manorvaivasvatasyaite daśaputrāḥ parantapa

ādityā vasavo rudrā viśvedevā marudgaṇāḥ /
aśvināvṛbhavo rājannindrasteṣāṃ purandaraḥ

kaśyapo 'trirvasiṣṭhaśca viśvāmitro 'tha gautamaḥ /
jamadagnirbharadvāja iti saptarṣayaḥ smṛtāḥ

atrāpi bhagavajjanma kaśyapādaditerabhūt /
ādityānāmavarajo viṣṇurvāmanarūpadhṛk

saṅkṣepato mayoktāni saptamanvantarāṇi te /
bhaviṣyāṇy atha vakṣyāmi viṣṇoḥ śaktyānvitāni ca

vivasvataśca dve jāye viśvakarmasute ubhe /
saṃjñā chāyā ca rājendra ye prāg abhihite tava

tṛtīyāṃ vaḍavāmeke tāsāṃ saṃjñāsutāstrayaḥ /
yamo yamī śrāddhadevaśchāyāyāśca sutān chṛṇu

sāvarṇistapatī kanyā bhāryā saṃvaraṇasya yā /
śanaiścarastṛtīyo 'bhūdaśvinau vaḍavātmajau

aṣṭame 'ntara āyāte sāvarṇirbhavitā manuḥ /
nirmokavirajaskādyāḥ sāvarṇitanayā nṛpa

tatra devāḥ sutapaso virajā amṛtaprabhāḥ /
teṣāṃ virocanasuto balirindro bhaviṣyati

dattvemāṃ yācamānāya viṣṇave yaḥ padatrayam /
rāddhamindrapadaṃ hitvā tataḥ siddhimavāpsyati

yo 'sau bhagavatā baddhaḥ prītena sutale punaḥ /
niveśito 'dhike svargādadhunāste svarāḍ iva

gālavo dīptimān rāmo droṇaputraḥ kṛpastathā /
ṛṣyaśṛṅgaḥ pitāsmākaṃ bhagavān bādarāyaṇaḥ

ime saptarṣayastatra bhaviṣyanti svayogataḥ /
idānīmāsate rājan sve sva āśramamaṇḍale

devaguhyāt sarasvatyāṃ sārvabhauma iti prabhuḥ /
sthānaṃ purandarāddhṛtvā balaye dāsyatīśvaraḥ

navamo dakṣasāvarṇirmanurvaruṇasambhavaḥ /
bhūtaketurdīptaketurity ādyāstatsutā nṛpa

pārāmarīcigarbhādyā devā indro 'dbhutaḥ smṛtaḥ /
dyutimatpramukhāstatra bhaviṣyanty ṛṣayastataḥ

āyuṣmato 'mbudhārāyāmṛṣabho bhagavatkalā /
bhavitā yena saṃrāddhāṃ trilokīṃ bhokṣyate 'dbhutaḥ

daśamo brahmasāvarṇirupaślokasuto manuḥ /
tatsutā bhūriṣeṇādyā haviṣmat pramukhā dvijāḥ

haviṣmān sukṛtaḥ satyo jayo mūrtistadā dvijāḥ /
suvāsanaviruddhādyā devāḥ śambhuḥ sureśvaraḥ

viṣvakseno viṣūcyāṃ tu śambhoḥ sakhyaṃ kariṣyati /
jātaḥ svāṃśena bhagavān gṛhe viśvasṛjo vibhuḥ

manurvai dharmasāvarṇirekādaśama ātmavān /
anāgatāstatsutāśca satyadharmādayo daśa

vihaṅgamāḥ kāmagamā nirvāṇarucayaḥ surāḥ /
indraśca vaidhṛtasteṣāmṛṣayaścāruṇādayaḥ

āryakasya sutastatra dharmaseturiti smṛtaḥ /
vaidhṛtāyāṃ hareraṃśastrilokīṃ dhārayiṣyati

bhavitā rudrasāvarṇī rājan dvādaśamo manuḥ /
devavān upadevaśca devaśreṣṭhādayaḥ sutāḥ

ṛtadhāmā ca tatrendro devāśca haritādayaḥ /
ṛṣayaśca tapomūrtistapasvy āgnīdhrakādayaḥ

svadhāmākhyo hareraṃśaḥ sādhayiṣyati tanmanoḥ /
antaraṃ satyasahasaḥ sunṛtāyāḥ suto vibhuḥ

manustrayodaśo bhāvyo devasāvarṇirātmavān /
citrasenavicitrādyā devasāvarṇidehajāḥ

devāḥ sukarmasutrāma saṃjñā indro divaspatiḥ /
nirmokatattvadarśādyā bhaviṣyanty ṛṣayastadā

devahotrasya tanaya upahartā divaspateḥ /
yogeśvaro hareraṃśo bṛhatyāṃ sambhaviṣyati

manurvā indrasāvarṇiścaturdaśama eṣyati /
urugambhīrabudhādyā indrasāvarṇivīryajāḥ

pavitrāścākṣuṣā devāḥ śucirindro bhaviṣyati /
agnirbāhuḥ śuciḥ śuddho māgadhādyāstapasvinaḥ

satrāyaṇasya tanayo bṛhadbhānustadā hariḥ /
vitānāyāṃ mahārāja kriyātantūn vitāyitā

rājaṃścaturdaśaitāni trikālānugatāni te /
proktāny ebhirmitaḥ kalpo yugasāhasraparyayaḥ