ભાગવત પુરાણ · અધ્યાય 08.14

ભ્પ્_08.14.001।0 શ્રીરાજોવાચ
મન્વન્તરેષુ ભગવન્ યથા મન્વાદયસ્ત્વિમે ।
યસ્મિન્ કર્મણિ યે યેન નિયુક્તાસ્તદ્વદસ્વ મે

ભ્પ્_08.14.002।0 શ્રીઋષિરુવાચ
મનવો મનુપુત્રાશ્ચ મુનયશ્ચ મહીપતે ।
ઇન્દ્રાઃ સુરગણાશ્ચૈવ સર્વે પુરુષશાસનાઃ

યજ્ઞાદયો યાઃ કથિતાઃ પૌરુષ્યસ્તનવો નૃપ ।
મન્વાદયો જગદ્યાત્રાં નયન્ત્ય્ આભિઃ પ્રચોદિતાઃ

ચતુર્યુગાન્તે કાલેન ગ્રસ્તાન્ છ્રુતિગણાન્ યથા ।
તપસા ઋષયો ઽપશ્યન્ યતો ધર્મઃ સનાતનઃ

તતો ધર્મં ચતુષ્પાદં મનવો હરિણોદિતાઃ ।
યુક્તાઃ સઞ્ચારયન્ત્ય્ અદ્ધા સ્વે સ્વે કાલે મહીં નૃપ

પાલયન્તિ પ્રજાપાલા યાવદન્તં વિભાગશઃ ।
યજ્ઞભાગભુજો દેવા યે ચ તત્રાન્વિતાશ્ચ તૈઃ

ઇન્દ્રો ભગવતા દત્તાં ત્રૈલોક્યશ્રિયમૂર્જિતામ્ ।
ભુઞ્જાનઃ પાતિ લોકાંસ્ત્રીન્ કામં લોકે પ્રવર્ષતિ

જ્ઞાનં ચાનુયુગં બ્રૂતે હરિઃ સિદ્ધસ્વરૂપધૃક્ ।
ઋષિરૂપધરઃ કર્મ યોગં યોગેશરૂપધૃક્

સર્ગં પ્રજેશરૂપેણ દસ્યૂન્ હન્યાત્ સ્વરાડ્વપુઃ ।
કાલરૂપેણ સર્વેષામભાવાય પૃથગ્ ગુણઃ

સ્તૂયમાનો જનૈરેભિર્માયયા નામરૂપયા ।
વિમોહિતાત્મભિર્નાના દર્શનૈર્ન ચ દૃશ્યતે

એતત્ કલ્પવિકલ્પસ્ય પ્રમાણં પરિકીર્તિતમ્ ।
યત્ર મન્વન્તરાણ્ય્ આહુશ્ચતુર્દશ પુરાવિદઃ