Bhagavata Purana · Chapter 08.10

evaṃ surāsuragaṇāḥ samadeśakāla $ hetvarthakarmamatayo 'pi phale vikalpāḥ &
tatrāmṛtaṃ suragaṇāḥ phalamañjasāpur % yatpādapaṅkajarajaḥśrayaṇān na daityāḥ // BhP_08.09.028* //
yadyujyate 'suvasukarmamanovacobhir $ dehātmajādiṣu nṛbhistadasat pṛthaktvāt &
yadyujyate 'suvasukarmamanovacobhir $ dehātmajādiṣu nṛbhistadasat pṛthaktvāt &
taireva sadbhavati yat kriyate 'pṛthaktvāt % sarvasya tadbhavati mūlaniṣecanaṃ yat // BhP_08.09.029*
0 śrīśuka uvāca
iti dānavadaiteyā nāvindannamṛtaṃ nṛpa /
yuktāḥ karmaṇi yattāśca vāsudevaparāṅmukhāḥ

sādhayitvāmṛtaṃ rājan pāyayitvā svakān surān /
paśyatāṃ sarvabhūtānāṃ yayau garuḍavāhanaḥ

sapatnānāṃ parāmṛddhiṃ dṛṣṭvā te ditinandanāḥ /
amṛṣyamāṇā utpeturdevān pratyudyatāyudhāḥ

tataḥ suragaṇāḥ sarve sudhayā pītayaidhitāḥ /
pratisaṃyuyudhuḥ śastrairnārāyaṇapadāśrayāḥ

tatra daivāsuro nāma raṇaḥ paramadāruṇaḥ /
rodhasy udanvato rājaṃstumulo romaharṣaṇaḥ

tatrānyonyaṃ sapatnāste saṃrabdhamanaso raṇe /
samāsādyāsibhirbāṇairnijaghnurvividhāyudhaiḥ

śaṅkhatūryamṛdaṅgānāṃ bherīḍamariṇāṃ mahān /
hastyaśvarathapattīnāṃ nadatāṃ nisvano 'bhavat

rathino rathibhistatra pattibhiḥ saha pattayaḥ /
hayā hayairibhāścebhaiḥ samasajjanta saṃyuge

uṣṭraiḥ kecidibhaiḥ kecidapare yuyudhuḥ kharaiḥ /
kecidgauramukhairṛkṣairdvīpibhirharibhirbhaṭāḥ

gṛdhraiḥ kaṅkairbakairanye śyenabhāsaistimiṅgilaiḥ /
śarabhairmahiṣaiḥ khaḍgairgovṛṣairgavayāruṇaiḥ

śivābhirākhubhiḥ kecit kṛkalāsaiḥ śaśairnaraiḥ /
bastaireke kṛṣṇasārairhaṃsairanye ca sūkaraiḥ

anye jalasthalakhagaiḥ sattvairvikṛtavigrahaiḥ /
senayorubhayo rājan viviśuste 'grato 'grataḥ

citradhvajapaṭai rājannātapatraiḥ sitāmalaiḥ /
mahādhanairvajradaṇḍairvyajanairbārhacāmaraiḥ

vātoddhūtottaroṣṇīṣairarcirbhirvarmabhūṣaṇaiḥ /
sphuradbhirviśadaiḥ śastraiḥ sutarāṃ sūryaraśmibhiḥ

devadānavavīrāṇāṃ dhvajinyau pāṇḍunandana /
rejaturvīramālābhiryādasāmiva sāgarau

vairocano baliḥ saṅkhye so 'surāṇāṃ camūpatiḥ /
yānaṃ vaihāyasaṃ nāma kāmagaṃ mayanirmitam

sarvasāṅgrāmikopetaṃ sarvāścaryamayaṃ prabho /
apratarkyamanirdeśyaṃ dṛśyamānamadarśanam

āsthitastadvimānāgryaṃ sarvānīkādhipairvṛtaḥ /
bālavyajanachatrāgryai reje candra ivodaye

tasyāsan sarvato yānairyūthānāṃ patayo 'surāḥ /
namuciḥ śambaro bāṇo vipracittirayomukhaḥ

dvimūrdhā kālanābho 'tha prahetirhetirilvalaḥ /
śakunirbhūtasantāpo vajradaṃṣṭro virocanaḥ

hayagrīvaḥ śaṅkuśirāḥ kapilo meghadundubhiḥ /
tārakaścakradṛk śumbho niśumbho jambha utkalaḥ

ariṣṭo 'riṣṭanemiśca mayaśca tripurādhipaḥ /
anye paulomakāleyā nivātakavacādayaḥ

alabdhabhāgāḥ somasya kevalaṃ kleśabhāginaḥ /
sarva ete raṇamukhe bahuśo nirjitāmarāḥ

siṃhanādān vimuñcantaḥ śaṅkhān dadhmurmahāravān /
dṛṣṭvā sapatnān utsiktān balabhit kupito bhṛśam

airāvataṃ dikkariṇamārūḍhaḥ śuśubhe svarāṭ /
yathā sravatprasravaṇamudayādrimaharpatiḥ

tasyāsan sarvato devā nānāvāhadhvajāyudhāḥ /
lokapālāḥ sahagaṇairvāyvagnivaruṇādayaḥ

te 'nyonyamabhisaṃsṛtya kṣipanto marmabhirmithaḥ /
āhvayanto viśanto 'gre yuyudhurdvandvayodhinaḥ

yuyodha balirindreṇa tārakeṇa guho 'syata /
varuṇo hetināyudhyan mitro rājan prahetinā

yamastu kālanābhena viśvakarmā mayena vai /
śambaro yuyudhe tvaṣṭrā savitrā tu virocanaḥ

aparājitena namuciraśvinau vṛṣaparvaṇā /
sūryo balisutairdevo bāṇajyeṣṭhaiḥ śatena ca

rāhuṇā ca tathā somaḥ pulomnā yuyudhe 'nilaḥ /
niśumbhaśumbhayordevī bhadrakālī tarasvinī

vṛṣākapistu jambhena mahiṣeṇa vibhāvasuḥ /
ilvalaḥ saha vātāpirbrahmaputrairarindama

kāmadevena durmarṣa utkalo mātṛbhiḥ saha /
bṛhaspatiścośanasā narakeṇa śanaiścaraḥ

maruto nivātakavacaiḥ kāleyairvasavo 'marāḥ /
viśvedevāstu paulomai rudrāḥ krodhavaśaiḥ saha

ta evamājāvasurāḥ surendrā dvandvena saṃhatya ca yudhyamānāḥ /
anyonyamāsādya nijaghnurojasā jigīṣavastīkṣṇaśarāsitomaraiḥ

bhuśuṇḍibhiścakragadarṣṭipaṭṭiśaiḥ śaktyulmukaiḥ prāsaparaśvadhairapi /
nistriṃśabhallaiḥ parighaiḥ samudgaraiḥ sabhindipālaiśca śirāṃsi cicchiduḥ

gajāsturaṅgāḥ sarathāḥ padātayaḥ sārohavāhā vividhā vikhaṇḍitāḥ /
nikṛttabāhūruśirodharāṅghrayaś chinnadhvajeṣvāsatanutrabhūṣaṇāḥ

teṣāṃ padāghātarathāṅgacūrṇitād āyodhanādulbaṇa utthitastadā /
reṇurdiśaḥ khaṃ dyumaṇiṃ ca chādayan nyavartatāsṛksrutibhiḥ pariplutāt

śirobhiruddhūtakirīṭakuṇḍalaiḥ saṃrambhadṛgbhiḥ paridaṣṭadacchadaiḥ /
mahābhujaiḥ sābharaṇaiḥ sahāyudhaiḥ sā prāstṛtā bhūḥ karabhorubhirbabhau

kabandhāstatra cotpetuḥ patitasvaśiro 'kṣibhiḥ /
udyatāyudhadordaṇḍairādhāvanto bhaṭān mṛdhe

balirmahendraṃ daśabhistribhirairāvataṃ śaraiḥ /
caturbhiścaturo vāhān ekenārohamārcchayat

sa tān āpatataḥ śakrastāvadbhiḥ śīghravikramaḥ /
ciccheda niśitairbhallairasamprāptān hasanniva

tasya karmottamaṃ vīkṣya durmarṣaḥ śaktimādade /
tāṃ jvalantīṃ maholkābhāṃ hastasthāmacchinaddhariḥ

tataḥ śūlaṃ tataḥ prāsaṃ tatastomaramṛṣṭayaḥ /
yadyac chastraṃ samādadyāt sarvaṃ tadacchinadvibhuḥ

sasarjāthāsurīṃ māyāmantardhānagato 'suraḥ /
tataḥ prādurabhūc chailaḥ surānīkopari prabho

tato nipetustaravo dahyamānā davāgninā /
śilāḥ saṭaṅkaśikharāścūrṇayantyo dviṣadbalam

mahoragāḥ samutpeturdandaśūkāḥ savṛścikāḥ /
siṃhavyāghravarāhāśca mardayanto mahāgajāḥ

yātudhānyaśca śataśaḥ śūlahastā vivāsasaḥ /
chindhi bhindhīti vādinyastathā rakṣogaṇāḥ prabho

tato mahāghanā vyomni gambhīraparuṣasvanāḥ /
aṅgārān mumucurvātairāhatāḥ stanayitnavaḥ

sṛṣṭo daityena sumahān vahniḥ śvasanasārathiḥ /
sāṃvartaka ivātyugro vibudhadhvajinīmadhāk

tataḥ samudra udvelaḥ sarvataḥ pratyadṛśyata /
pracaṇḍavātairuddhūta taraṅgāvartabhīṣaṇaḥ

evaṃ daityairmahāmāyairalakṣyagatibhī raṇe /
sṛjyamānāsu māyāsu viṣeduḥ surasainikāḥ

na tatpratividhiṃ yatra vidurindrādayo nṛpa /
dhyātaḥ prādurabhūt tatra bhagavān viśvabhāvanaḥ

tataḥ suparṇāṃsakṛtāṅghripallavaḥ piśaṅgavāsā navakañjalocanaḥ /
adṛśyatāṣṭāyudhabāhurullasac chrīkaustubhānarghyakirīṭakuṇḍalaḥ

tasmin praviṣṭe 'surakūṭakarmajā māyā vineśurmahinā mahīyasaḥ /
svapno yathā hi pratibodha āgate harismṛtiḥ sarvavipadvimokṣaṇam

dṛṣṭvā mṛdhe garuḍavāhamibhārivāha āvidhya śūlamahinodatha kālanemiḥ /
tal līlayā garuḍamūrdhni patadgṛhītvā tenāhanan nṛpa savāhamariṃ tryadhīśaḥ

mālī sumāly atibalau yudhi petaturyac cakreṇa kṛttaśirasāvatha mālyavāṃstam /
āhatya tigmagadayāhanadaṇḍajendraṃ tāvac chiro 'cchinadarernadato 'riṇādyaḥ