Bhagavata Purana · Chapter 08.09

BhP_08.09.001/0 śrīśuka uvāca
te 'nyonyato 'surāḥ pātraṃ harantastyaktasauhṛdāḥ /
kṣipanto dasyudharmāṇa āyāntīṃ dadṛśuḥ striyam

aho rūpamaho dhāma aho asyā navaṃ vayaḥ /
iti te tāmabhidrutya papracchurjātahṛcchayāḥ

kā tvaṃ kañjapalāśākṣi kuto vā kiṃ cikīrṣasi /
kasyāsi vada vāmoru mathnatīva manāṃsi naḥ

na vayaṃ tvāmarairdaityaiḥ siddhagandharvacāraṇaiḥ /
nāspṛṣṭapūrvāṃ jānīmo lokeśaiśca kuto nṛbhiḥ

nūnaṃ tvaṃ vidhinā subhrūḥ preṣitāsi śarīriṇām /
sarvendriyamanaḥprītiṃ vidhātuṃ saghṛṇena kim

sā tvaṃ naḥ spardhamānānāmekavastuni mānini /
jñātīnāṃ baddhavairāṇāṃ śaṃ vidhatsva sumadhyame

vayaṃ kaśyapadāyādā bhrātaraḥ kṛtapauruṣāḥ /
vibhajasva yathānyāyaṃ naiva bhedo yathā bhavet

ity upāmantrito daityairmāyāyoṣidvapurhariḥ /
prahasya rucirāpāṅgairnirīkṣannidamabravīt

BhP_08.09.009/0 śrībhagavān uvāca
kathaṃ kaśyapadāyādāḥ puṃścalyāṃ mayi saṅgatāḥ /
viśvāsaṃ paṇḍito jātu kāminīṣu na yāti hi

sālāvṛkāṇāṃ strīṇāṃ ca svairiṇīnāṃ suradviṣaḥ /
sakhyāny āhuranityāni nūtnaṃ nūtnaṃ vicinvatām

BhP_08.09.011/0 śrīśuka uvāca
iti te kṣvelitaistasyā āśvastamanaso 'surāḥ /
jahasurbhāvagambhīraṃ daduścāmṛtabhājanam

tato gṛhītvāmṛtabhājanaṃ harir babhāṣa īṣatsmitaśobhayā girā /
yady abhyupetaṃ kva ca sādhvasādhu vā kṛtaṃ mayā vo vibhaje sudhāmimām

ity abhivyāhṛtaṃ tasyā ākarṇyāsurapuṅgavāḥ /
apramāṇavidastasyāstat tathety anvamaṃsata

athopoṣya kṛtasnānā hutvā ca haviṣānalam /
dattvā goviprabhūtebhyaḥ kṛtasvastyayanā dvijaiḥ

yathopajoṣaṃ vāsāṃsi paridhāyāhatāni te /
kuśeṣu prāviśan sarve prāgagreṣvabhibhūṣitāḥ

prāṅmukheṣūpaviṣṭeṣu sureṣu ditijeṣu ca /
dhūpāmoditaśālāyāṃjuṣṭāyāṃ mālyadīpakaiḥ

tasyāṃ narendra karabhoruruśaddukūla śroṇītaṭālasagatirmadavihvalākṣī /
sā kūjatī kanakanūpuraśiñjitena kumbhastanī kalasapāṇirathāviveśa

tāṃ śrīsakhīṃ kanakakuṇḍalacārukarṇa nāsākapolavadanāṃ paradevatākhyām /
saṃvīkṣya sammumuhurutsmitavīkṣaṇena devāsurā vigalitastanapaṭṭikāntām

asurāṇāṃ sudhādānaṃ sarpāṇāmiva durnayam /
matvā jātinṛśaṃsānāṃ na tāṃ vyabhajadacyutaḥ

kalpayitvā pṛthak paṅktīrubhayeṣāṃ jagatpatiḥ /
tāṃścopaveśayāmāsa sveṣu sveṣu ca paṅktiṣu

daityān gṛhītakalaso vañcayannupasañcaraiḥ /
dūrasthān pāyayāmāsajarāmṛtyuharāṃ sudhām

te pālayantaḥ samayamasurāḥ svakṛtaṃ nṛpa /
tūṣṇīmāsan kṛtasnehāḥ strīvivādajugupsayā

tasyāṃ kṛtātipraṇayāḥ praṇayāpāyakātarāḥ /
bahumānena cābaddhā nocuḥ kiñcana vipriyam

devaliṅgapraticchannaḥ svarbhānurdevasaṃsadi /
praviṣṭaḥ somamapibac candrārkābhyāṃ ca sūcitaḥ

cakreṇa kṣuradhāreṇa jahāra pibataḥ śiraḥ /
haristasya kabandhastu sudhayāplāvito 'patat

śirastvamaratāṃ nītamajo grahamacīkḷpat /
yastu parvaṇi candrārkāvabhidhāvati vairadhīḥ

pītaprāye 'mṛte devairbhagavān lokabhāvanaḥ /
paśyatāmasurendrāṇāṃ svaṃ rūpaṃ jagṛhe hariḥ