Bhagavata Purana · Chapter 08.11

BhP_08.11.001/0 śrīśuka uvāca
atho surāḥ pratyupalabdhacetasaḥ parasya puṃsaḥ parayānukampayā /
jaghnurbhṛśaṃ śakrasamīraṇādayas tāṃstān raṇe yairabhisaṃhatāḥ purā

vairocanāya saṃrabdho bhagavān pākaśāsanaḥ /
udayacchadyadā vajraṃ prajā hā heti cukruśuḥ

vajrapāṇistamāhedaṃ tiraskṛtya puraḥsthitam /
manasvinaṃ susampannaṃ vicarantaṃ mahāmṛdhe

naṭavan mūḍha māyābhirmāyeśān no jigīṣasi /
jitvā bālān nibaddhākṣān naṭo harati taddhanam

ārurukṣanti māyābhirutsisṛpsanti ye divam /
tān dasyūn vidhunomy ajñān pūrvasmāc ca padādadhaḥ

so 'haṃ durmāyinaste 'dya vajreṇa śataparvaṇā /
śiro hariṣye mandātmanghaṭasva jñātibhiḥ saha

BhP_08.11.007/0 śrībaliruvāca
saṅgrāme vartamānānāṃ kālacoditakarmaṇām /
kīrtirjayo 'jayo mṛtyuḥ sarveṣāṃ syuranukramāt

tadidaṃ kālaraśanaṃ jagat paśyanti sūrayaḥ /
na hṛṣyanti na śocanti tatra yūyamapaṇḍitāḥ

na vayaṃ manyamānānāmātmānaṃ tatra sādhanam /
giro vaḥ sādhuśocyānāṃ gṛhṇīmo marmatāḍanāḥ

BhP_08.11.010/0 śrīśuka uvāca
ity ākṣipya vibhuṃ vīro nārācairvīramardanaḥ /
ākarṇapūrṇairahanadākṣepairāha taṃ punaḥ

evaṃ nirākṛto devo vairiṇā tathyavādinā /
nāmṛṣyat tadadhikṣepaṃ totrāhata iva dvipaḥ

prāharat kuliśaṃ tasmā amoghaṃ paramardanaḥ /
sayāno nyapatadbhūmau chinnapakṣa ivācalaḥ

sakhāyaṃ patitaṃ dṛṣṭvā jambho balisakhaḥ suhṛt /
abhyayāt sauhṛdaṃ sakhyurhatasyāpi samācaran

sa siṃhavāha āsādya gadāmudyamya raṃhasā /
jatrāvatāḍayac chakraṃ gajaṃ ca sumahābalaḥ

gadāprahāravyathito bhṛśaṃ vihvalito gajaḥ /
jānubhyāṃ dharaṇīṃ spṛṣṭvā kaśmalaṃ paramaṃ yayau

tato ratho mātalinā haribhirdaśaśatairvṛtaḥ /
ānīto dvipamutsṛjya rathamāruruhe vibhuḥ

tasya tat pūjayan karma yanturdānavasattamaḥ /
śūlena jvalatā taṃ tu smayamāno 'hanan mṛdhe

sehe rujaṃ sudurmarṣāṃ sattvamālambya mātaliḥ /
indro jambhasya saṅkruddho vajreṇāpāharac chiraḥ

jambhaṃ śrutvā hataṃ tasya jñātayo nāradādṛṣeḥ /
namuciśca balaḥ pākastatrāpetustvarānvitāḥ

vacobhiḥ paruṣairindramardayanto 'sya marmasu /
śarairavākiran meghā dhārābhiriva parvatam

harīn daśaśatāny ājau haryaśvasya balaḥ śaraiḥ /
tāvadbhirardayāmāsa yugapal laghuhastavān

śatābhyāṃ mātaliṃ pāko rathaṃ sāvayavaṃ pṛthak /
sakṛt sandhānamokṣeṇa tadadbhutamabhūdraṇe

namuciḥ pañcadaśabhiḥ svarṇapuṅkhairmaheṣubhiḥ /
āhatya vyanadat saṅkhye satoya iva toyadaḥ

sarvataḥ śarakūṭena śakraṃ sarathasārathim /
chādayāmāsurasurāḥ prāvṛṭsūryamivāmbudāḥ

alakṣayantastamatīva vihvalā vicukruśurdevagaṇāḥ sahānugāḥ /
anāyakāḥ śatrubalena nirjitā vaṇikpathā bhinnanavo yathārṇave

tatasturāṣāḍ iṣubaddhapañjarād vinirgataḥ sāśvarathadhvajāgraṇīḥ /
babhau diśaḥ khaṃ pṛthivīṃ ca rocayan svatejasā sūrya iva kṣapātyaye

nirīkṣya pṛtanāṃ devaḥ parairabhyarditāṃ raṇe /
udayacchadripuṃ hantuṃ vajraṃ vajradharo ruṣā

sa tenaivāṣṭadhāreṇa śirasī balapākayoḥ /
jñātīnāṃ paśyatāṃ rājan jahāra janayan bhayam

namucistadvadhaṃ dṛṣṭvā śokāmarṣaruṣānvitaḥ /
jighāṃsurindraṃ nṛpate cakāra paramodyamam

aśmasāramayaṃ śūlaṃ ghaṇṭāvaddhemabhūṣaṇam /
pragṛhyābhyadravat kruddho hato 'sīti vitarjayan /
prāhiṇoddevarājāya ninadan mṛgarāḍ iva

tadāpatadgaganatale mahājavaṃ vicicchide haririṣubhiḥ sahasradhā /
tamāhanan nṛpa kuliśena kandhare ruṣānvitastridaśapatiḥ śiro haran

na tasya hi tvacamapi vajra ūrjito bibheda yaḥ surapatinaujaseritaḥ /
tadadbhutaṃ paramativīryavṛtrabhit tiraskṛto namuciśirodharatvacā

tasmādindro 'bibhec chatrorvajraḥ pratihato yataḥ /
kimidaṃ daivayogena bhūtaṃ lokavimohanam

yena me pūrvamadrīṇāṃ pakṣacchedaḥ prajātyaye /
kṛto niviśatāṃ bhāraiḥ patattraiḥ patatāṃ bhuvi

tapaḥsāramayaṃ tvāṣṭraṃ vṛtro yena vipāṭitaḥ /
anye cāpi balopetāḥ sarvāstrairakṣatatvacaḥ

so 'yaṃ pratihato vajro mayā mukto 'sure 'lpake /
nāhaṃ tadādade daṇḍaṃ brahmatejo 'py akāraṇam

iti śakraṃ viṣīdantamāha vāg aśarīriṇī /
nāyaṃ śuṣkairatho nārdrairvadhamarhati dānavaḥ

mayāsmai yadvaro datto mṛtyurnaivārdraśuṣkayoḥ /
ato 'nyaścintanīyaste upāyo maghavan ripoḥ

tāṃ daivīṃ giramākarṇya maghavān susamāhitaḥ /
dhyāyan phenamathāpaśyadupāyamubhayātmakam

na śuṣkeṇa na cārdreṇa jahāra namuceḥ śiraḥ /
taṃ tuṣṭuvurmunigaṇā mālyaiścāvākiran vibhum

gandharvamukhyau jagaturviśvāvasuparāvasū /
devadundubhayo nedurnartakyo nanṛturmudā

anye 'py evaṃ pratidvandvān vāyvagnivaruṇādayaḥ /
sūdayāmāsurasurān mṛgān kesariṇo yathā

brahmaṇā preṣito devān devarṣirnārado nṛpa /
vārayāmāsa vibudhān dṛṣṭvā dānavasaṅkṣayam

BhP_08.11.044/0 śrīnārada uvāca
bhavadbhiramṛtaṃ prāptaṃ nārāyaṇabhujāśrayaiḥ /
śriyā samedhitāḥ sarva upāramata vigrahāt

BhP_08.11.045/0 śrīśuka uvāca
saṃyamya manyusaṃrambhaṃ mānayanto munervacaḥ /
upagīyamānānucarairyayuḥ sarve triviṣṭapam

ye 'vaśiṣṭā raṇe tasmin nāradānumatena te /
baliṃ vipannamādāya astaṃ girimupāgaman

tatrāvinaṣṭāvayavān vidyamānaśirodharān /
uśanā jīvayāmāsa saṃjīvanyā svavidyayā

baliścośanasā spṛṣṭaḥ pratyāpannendriyasmṛtiḥ /
parājito 'pi nākhidyal lokatattvavicakṣaṇaḥ