Bhagavata Purana · Chapter 08.02

BhP_08.02.001/0 śrīśuka uvāca
āsīdgirivaro rājaṃstrikūṭa iti viśrutaḥ /
kṣīrodenāvṛtaḥ śrīmān yojanāyutamucchritaḥ

tāvatā vistṛtaḥ paryak tribhiḥ śṛṅgaiḥ payonidhim /
diśaḥ khaṃ rocayannāste raupyāyasahiraṇmayaiḥ

anyaiśca kakubhaḥ sarvā ratnadhātuvicitritaiḥ /
nānādrumalatāgulmairnirghoṣairnirjharāmbhasām

sa cāvanijyamānāṅghriḥ samantāt payaūrmibhiḥ /
karoti śyāmalāṃ bhūmiṃ harinmarakatāśmabhiḥ

siddhacāraṇagandharvairvidyādharamahoragaiḥ /
kinnarairapsarobhiśca krīḍadbhirjuṣṭakandaraḥ

yatra saṅgītasannādairnadadguhamamarṣayā /
abhigarjanti harayaḥ ślāghinaḥ paraśaṅkayā

nānāraṇyapaśuvrāta saṅkuladroṇyalaṅkṛtaḥ /
citradrumasurodyāna kalakaṇṭhavihaṅgamaḥ

saritsarobhiracchodaiḥ pulinairmaṇivālukaiḥ /
devastrīmajjanāmoda saurabhāmbvanilairyutaḥ

tasya droṇyāṃ bhagavato varuṇasya mahātmanaḥ /
udyānamṛtuman nāma ākrīḍaṃ surayoṣitām

sarvato 'laṅkṛtaṃ divyairnityapuṣpaphaladrumaiḥ /
mandāraiḥ pārijātaiśca pāṭalāśokacampakaiḥ

cūtaiḥ piyālaiḥ panasairāmrairāmrātakairapi /
kramukairnārikelaiśca kharjūrairbījapūrakaiḥ

madhukaiḥ śālatālaiśca tamālairasanārjunaiḥ /
ariṣṭoḍumbaraplakṣairvaṭaiḥ kiṃśukacandanaiḥ

picumardaiḥ kovidāraiḥ saralaiḥ suradārubhiḥ /
drākṣekṣurambhājambubhirbadaryakṣābhayāmalaiḥ

bilvaiḥ kapitthairjambīrairvṛto bhallātakādibhiḥ /
tasmin saraḥ suvipulaṃ lasatkāñcanapaṅkajam

kumudotpalakahlāra śatapatraśriyorjitam /
mattaṣaṭpadanirghuṣṭaṃ śakuntaiśca kalasvanaiḥ

haṃsakāraṇḍavākīrṇaṃ cakrāhvaiḥ sārasairapi /
jalakukkuṭakoyaṣṭi dātyūhakulakūjitam

matsyakacchapasañcāra calatpadmarajaḥpayaḥ /
kadambavetasanala nīpavañjulakairvṛtam

kundaiḥ kurubakāśokaiḥ śirīṣaiḥ kūṭajeṅgudaiḥ /
kubjakaiḥ svarṇayūthībhirnāgapunnāgajātibhiḥ

mallikāśatapatraiśca mādhavījālakādibhiḥ /
śobhitaṃ tīrajaiścānyairnityartubhiralaṃ drumaiḥ

tatraikadā tadgirikānanāśrayaḥ kareṇubhirvāraṇayūthapaścaran /
sakaṇṭakaṃ kīcakaveṇuvetravad viśālagulmaṃ prarujan vanaspatīn

yadgandhamātrāddharayo gajendrā vyāghrādayo vyālamṛgāḥ sakhaḍgāḥ /
mahoragāścāpi bhayāddravanti sagaurakṛṣṇāḥ sarabhāścamaryaḥ

vṛkā varāhā mahiṣarkṣaśalyā gopucchaśālāvṛkamarkaṭāśca /
anyatra kṣudrā hariṇāḥ śaśādayaś caranty abhītā yadanugraheṇa

sa gharmataptaḥ karibhiḥ kareṇubhir vṛto madacyutkarabhairanudrutaḥ /
giriṃ garimṇā paritaḥ prakampayan niṣevyamāṇo 'likulairmadāśanaiḥ

saro 'nilaṃ paṅkajareṇurūṣitaṃ jighran vidūrān madavihvalekṣaṇaḥ /
vṛtaḥ svayūthena tṛṣārditena tat sarovarābhyāsamathāgamaddrutam

vigāhya tasminnamṛtāmbu nirmalaṃ hemāravindotpalareṇurūṣitam /
papau nikāmaṃ nijapuṣkaroddhṛtam ātmānamadbhiḥ snapayan gataklamaḥ

sa puṣkareṇoddhṛtaśīkarāmbubhir nipāyayan saṃsnapayan yathā gṛhī /
ghṛṇī kareṇuḥ karabhāṃśca durmado nācaṣṭa kṛcchraṃ kṛpaṇo 'jamāyayā

taṃ tatra kaścin nṛpa daivacodito grāho balīyāṃścaraṇe ruṣāgrahīt /
yadṛcchayaivaṃ vyasanaṃ gato gajo yathābalaṃ so 'tibalo vicakrame

tathāturaṃ yūthapatiṃ kareṇavo vikṛṣyamāṇaṃ tarasā balīyasā /
vicukruśurdīnadhiyo 'pare gajāḥ pārṣṇigrahāstārayituṃ na cāśakan

niyudhyatorevamibhendranakrayor vikarṣatorantarato bahirmithaḥ /
samāḥ sahasraṃ vyagaman mahīpate saprāṇayościtramamaṃsatāmarāḥ

tato gajendrasya manobalaujasāṃ kālena dīrgheṇa mahān abhūdvyayaḥ /
vikṛṣyamāṇasya jale 'vasīdato viparyayo 'bhūt sakalaṃ jalaukasaḥ

itthaṃ gajendraḥ sa yadāpa saṅkaṭaṃ prāṇasya dehī vivaśo yadṛcchayā /
apārayannātmavimokṣaṇe ciraṃ dadhyāvimāṃ buddhimathābhyapadyata

na māmime jñātaya āturaṃ gajāḥ kutaḥ kariṇyaḥ prabhavanti mocitum /
grāheṇa pāśena vidhāturāvṛto 'py ahaṃ ca taṃ yāmi paraṃ parāyaṇam

yaḥ kaścaneśo balino 'ntakoragāt pracaṇḍavegādabhidhāvato bhṛśam /
bhītaṃ prapannaṃ paripāti yadbhayān mṛtyuḥ pradhāvaty araṇaṃ tamīmahi