Bhagavata Purana · Chapter 08.03

BhP_08.03.001/0 śrībādarāyaṇiruvāca
evaṃ vyavasito buddhyā samādhāya mano hṛdi /
jajāpa paramaṃ jāpyaṃ prāgjanmany anuśikṣitam

BhP_08.03.003/0 śrīgajendra uvāca
oṃ namo bhagavate tasmai yata etac cidātmakam /
puruṣāyādibījāya pareśāyābhidhīmahi

yasminnidaṃ yataścedaṃ yenedaṃ ya idaṃ svayam /
yo 'smāt parasmāc ca parastaṃ prapadye svayambhuvam

yaḥ svātmanīdaṃ nijamāyayārpitaṃ kvacidvibhātaṃ kva ca tat tirohitam /
aviddhadṛk sākṣy ubhayaṃ tadīkṣate sa ātmamūlo 'vatu māṃ parātparaḥ

kālena pañcatvamiteṣu kṛtsnaśo lokeṣu pāleṣu ca sarvahetuṣu /
tamastadāsīdgahanaṃ gabhīraṃ yastasya pāre 'bhivirājate vibhuḥ

na yasya devā ṛṣayaḥ padaṃ vidur jantuḥ punaḥ ko 'rhati gantumīritum /
yathā naṭasyākṛtibhirviceṣṭato duratyayānukramaṇaḥ sa māvatu

didṛkṣavo yasya padaṃ sumaṅgalaṃ vimuktasaṅgā munayaḥ susādhavaḥ /
caranty alokavratamavraṇaṃ vane bhūtātmabhūtāḥ suhṛdaḥ sa me gatiḥ

na vidyate yasya ca janma karma vā na nāmarūpe guṇadoṣa eva vā /
tathāpi lokāpyayasambhavāya yaḥ svamāyayā tāny anukālamṛcchati

tasmai namaḥ pareśāya brahmaṇe 'nantaśaktaye /
arūpāyorurūpāya nama āścaryakarmaṇe

nama ātmapradīpāya sākṣiṇe paramātmane /
namo girāṃ vidūrāya manasaścetasāmapi

sattvena pratilabhyāya naiṣkarmyeṇa vipaścitā /
namaḥ kaivalyanāthāya nirvāṇasukhasaṃvide

namaḥ śāntāya ghorāya mūḍhāya guṇadharmiṇe /
nirviśeṣāya sāmyāya namo jñānaghanāya ca

kṣetrajñāya namastubhyaṃ sarvādhyakṣāya sākṣiṇe /
puruṣāyātmamūlāya mūlaprakṛtaye namaḥ

sarvendriyaguṇadraṣṭre sarvapratyayahetave /
asatā cchāyayoktāya sadābhāsāya te namaḥ

namo namaste 'khilakāraṇāya niṣkāraṇāyādbhutakāraṇāya /
sarvāgamāmnāyamahārṇavāya namo 'pavargāya parāyaṇāya

guṇāraṇicchannaciduṣmapāya tatkṣobhavisphūrjitamānasāya /
naiṣkarmyabhāvena vivarjitāgama svayaṃprakāśāya namas karomi

mādṛk prapannapaśupāśavimokṣaṇāya muktāya bhūrikaruṇāya namo 'layāya /
svāṃśena sarvatanubhṛnmanasi pratīta pratyagdṛśe bhagavate bṛhate namaste

ātmātmajāptagṛhavittajaneṣu saktair duṣprāpaṇāya guṇasaṅgavivarjitāya /
muktātmabhiḥ svahṛdaye paribhāvitāya jñānātmane bhagavate nama īśvarāya

yaṃ dharmakāmārthavimuktikāmā bhajanta iṣṭāṃ gatimāpnuvanti /
kiṃ cāśiṣo rāty api dehamavyayaṃ karotu me 'dabhradayo vimokṣaṇam

ekāntino yasya na kañcanārthaṃ vāñchanti ye vai bhagavatprapannāḥ /
atyadbhutaṃ taccaritaṃ sumaṅgalaṃ gāyanta ānandasamudramagnāḥ

tamakṣaraṃ brahma paraṃ pareśam avyaktamādhyātmikayogagamyam /
atīndriyaṃ sūkṣmamivātidūram anantamādyaṃ paripūrṇamīḍe

yasya brahmādayo devā vedā lokāścarācarāḥ /
nāmarūpavibhedena phalgvyā ca kalayā kṛtāḥ

yathārciṣo 'gneḥ saviturgabhastayo niryānti saṃyānty asakṛt svarociṣaḥ /
tathā yato 'yaṃ guṇasampravāho buddhirmanaḥ khāni śarīrasargāḥ

sa vai na devāsuramartyatiryaṅ na strī na ṣaṇḍho na pumān na jantuḥ /
nāyaṃ guṇaḥ karma na san na cāsan niṣedhaśeṣo jayatādaśeṣaḥ

jijīviṣe nāhamihāmuyā kim antarbahiścāvṛtayebhayonyā /
icchāmi kālena na yasya viplavas tasyātmalokāvaraṇasya mokṣam

so 'haṃ viśvasṛjaṃ viśvamaviśvaṃ viśvavedasam /
viśvātmānamajaṃ brahma praṇato 'smi paraṃ padam

yogarandhitakarmāṇo hṛdi yogavibhāvite /
yogino yaṃ prapaśyanti yogeśaṃ taṃ nato 'smy aham

namo namastubhyamasahyavega śaktitrayāyākhiladhīguṇāya /
prapannapālāya durantaśaktaye kadindriyāṇāmanavāpyavartmane

nāyaṃ veda svamātmānaṃ yacchaktyāhaṃdhiyā hatam /
taṃ duratyayamāhātmyaṃ bhagavantamito 'smy aham