Ashtanga Sangraha · Chapter 6.38

athāto guhyarogavijñānīyaṃ nāmādhyāyaṃ vyākhyāsyāmaḥ /
iti ha smāhurātreyādayo maharṣayaḥ //

strīvyavāyanivṛttasya sahasā bhajatothavā /
doṣādhyuṣitasaṅkīrṇamalināṇurajaḥpathām //

anyayonimanicchantīmagamyāṃ navasūtikām /
tṛṣitaṃ spṛśatastoyaṃ ratānteṣvapi naiva vā //

vivardhayiṣayā tīkṣṇān pralepādīn prayacchataḥ /
muṣṭidantanakhotpīḍāviṣavacchūkapātanaiḥ //

veganigrahadīrghātikharaśaṣpavighaṭṭanaiḥ /
doṣā duṣṭā gatā guhyaṃ trayoviṃśatimāmayān //

janayantyupadaṃśādīn upadaṃśo 'tra pañcadhā /
pṛthagdoṣaiḥ sarudhiraiḥ samastaiśca atra mārutāt /
meḍhraśopho rujaścitrāḥ stambhastvakparipoṭanam //

pakvodumbarasaṅkāśaṃ pittena śvayathurjvaraḥ //

śleṣmaṇā kaṭhinaḥ snigdhaḥ kaṇḍūmāñchītalo guruḥ //

śoṇitenāsitasphoṭasambhavosrasrutirjvaraḥ //

tīvrārugāśupacanaṃ daraṇaṃ kṛmisambhavaḥ //

yāpyo raktodbhavasteṣāṃ mṛtyave sannipātajaḥ //

jāyante kupitairdoṣairguhyāsṛkpiśitāśrayaiḥ /
antarbahirvā meḍhrasya kaṇḍūlā māṃsakīlakāḥ //

picchilāsrasravā yonau tadvacca chatrasannibhāḥ /
terśāṃsyupekṣayā ghnanti meḍhrapuṃstvabhagātarvam //

guhyasya bahirantarvā piṭakāḥ kapharaktajāḥ /
sarṣapāmānasaṃsthānā ghanāḥ sarṣapikāḥ smṛtāḥ //

piṭakā bahavo dīrghā dīryante madhyataśca yāḥ /
so 'vamanthaḥ kaphāsṛgbhyāṃ vedanāromaharṣavān //

kumbhīkā raktapittotthā jāmbavāsthinibhāśujā //

alajīṃ mehavadvidyāt uttamāṃ raktapittajām /
piṭakāṃ māṣamudgābhām piṭakā piṭakācitā /
karṇikā puṣkarasyeva jñeyā puṣkariketi sā //

pāṇibhyāṃ bhṛśasaṃvyūḍhe saṃvyūḍhapiṭakā bhavet //

mṛditaṃ mṛditaṃ vastu saṃrabdhaṃ vātakopataḥ //

viṣamā kaṭhinā bhugnā vāyunāṣṭhīlikā smṛtā //

vimardanādiduṣṭena vāyunā carma meḍhrajam /
nivartate sarugdāhaṃ kvacit pākaṃ ca gacchati //

piṇḍitaṃ kuthitaṃ carma tatpralambamadhomaṇeḥ /
nivṛttasaṃjñaṃ sakaphaṃ kaṇḍūkāṭhinyavattu tat //

durūḍhaṃ sphuṭitaṃ carma nirdiṣṭamavapāṭikā //

vātena dūṣitaṃ carma maṇau saktaṃ ruṇaddhi cet /
sroto mūtraṃ tatobhyeti mandadhāramevadanam /
maṇervikāsarodhaśca sa niruddhamaṇirgadaḥ //

liṅgaṃ śūkairivākīrṇaṃ grathitākhyaṃ kaphodbhavam //

śūkadūṣitaraktotthā sparśahānistadāhvayā //

chidrairaṇumukhairyattu mehanaṃ sarvataścitam /
vātaśoṇitakopena taṃ vidyācchataponakam //

pittāsṛgbhyāṃ tvacaḥ pākastvakpāko jvaradāhavān //

māṃspākaḥ sarvajaḥ sarvavedano māṃsaśātanaḥ //

sarāgairasitaiḥ sphoṭairvedanābhiśca pīḍitam /
mehanaṃ vedanā cogrā taṃ vidyādasṛgarbudam //

māṃsārbudaṃ prāguditaṃ vidradhiśca tridoṣajaḥ //

kṛṣṇāni bhūtvā māṃsāni viśīryante samantataḥ /
pakvāni sannipātena tān vidyāttilakālakān //

māṃsotthamarbudaṃ pākaṃ vidradhiṃ tilakālakān /
caturo varjayedoṣāṃ śeṣān śīghramupācaret //

viṃśatirvyāpado yonerjāyante duṣṭabhojanāt /
viṣamasthāṅgaśayanabhṛśamaithunasevanaiḥ /
duṣṭārtavādapadravyairbījadoṣeṇa daivataḥ //

yonau kruddho 'nilaḥ kuryādruktodāyāmasuptatāḥ /
pipīlikāsṛptimiva stambhaṃ karkaśatāṃ svanam //

phenilāruṇakṛṣṇālpatanurūkṣārtavasrutim /
bhraṃśaṃ vaṅkṣaṇapārśvādau vyathāṃ gulmaṃ krameṇa ca /
tāṃstāṃśca svān gadān vyāpadvātikī nāma sā smṛtā //

saivāticaraṇā śophasaṃyuktātivyavāyataḥ //

maithunādatibālāyāḥ pṛṣṭhajaṅghoruvaṅkṣaṇam /
rujan sandūṣayedyoniṃ vāyuḥ prākcaraṇeti saḥ //

vegodāvartanādyoniṃ prapīḍayati mārutaḥ /
sā phenilaṃ rajaḥ kṛcchrādudāvṛttaṃ vimuñcati //

iyaṃ vyāpadudāvṛttā jātaghnī tu yadānilaḥ /
jātaṃ jātaṃ sutaṃ hanti raukṣyādduṣṭārtavodbhavam //

atyāśitāyā viṣamaṃ sthitāyāḥ surate marut /
annenotpīḍito yoneḥ sthitaḥ srotasi vakrayet /
sāsthimāṃsaṃ mukhaṃ tīvrarujamantarmukhīti sā //

vātalāhārasevinyāṃ jananyāṃ kupitonilaḥ /
striyā yonimaṇudvārāṃ kuryāt sūcimukhīti sā //

vegarodhādṛtau vāyurduṣṭo viṇmūtrasaṅgraham /
karoti yoniśoṣaṃ ca śuṣkākhyā sātivedanā //

ṣaḍahāt saptarātrādvā śukraṃ garbhāśayānmarut /
vamet saruṅnīrujo vā yasyāṃ sā vāminī matā //

yonau vātopataptāyāṃ strīgarbhe bījadoṣataḥ /
nṛdveṣiṇyastanī ca syāt ṣaṇḍasaṃjñānupatramā //

duṣṭo viṣṭabhya yonyāsyaṃ garbhakoṣṭhaṃ ca mārutaḥ /
kurute vivṛtāṃ srastāṃ vātikīmiva duḥkhitām /
utsannamāṃsāṃ tāmāhurmahāyoniṃ mahārujam //

yathāsvairdūṣaṇairduṣṭaṃ pittaṃ yonisamāśritam /
karoti dāhapākoṣāpūtigandhajvarānvitām /
bhṛśoṣṇabhūrikuṇapanīlapītāsitārtavām //

sā vyāpat paittikī raktayonyākhyāsṛgatisruteḥ //

kaphobhiṣyandibhiḥ kruddhaḥ kuryādyonimavedanām /
śatilāṃ kaṇḍulāṃ pāṇḍu picchilāṃ tadvidhasrutim /
sā vyāpacchlaiṣmikī #

vātapittābhyāṃ kṣīyate rajaḥ /
sadāhakārśyavaivarṇyaṃ yasyāṃ sā lohitakṣayā //

pittalāyā nṛsaṃvāse kṣavathūdgāradhāraṇāt /
pittayuktena marutā yonirbhavati dūṣitā //

śūnā sparśāsahā sarpirnīlapītāsravāhinī /
bastikukṣigurutvātisārārocakakāriṇī /
śreṇivaṅkṣaṇaruktodajvarakṛtsā pariplutā //

vātaśleṣmāmayavyāptā śvetapicchilavāhinī //

upaplutā smṛtā yoniḥ viplatākhyā tvadhāvanāt /
sañjātajantuḥ kaṇḍūlā kaṇḍvā cātiratipriyā //

akālavāhanādvāyuḥ śleṣmaraktavimūrcchitaḥ /
karṇikāṃ janayedyonau rajomārganirodhinīm //

sā karṇinī tribhirdoṣairyonigarbhāśayāśritaiḥ /
yathāsvopadravakarairvyāpat sā sānnipātikī //

iti yonigadā nārī yaiḥ śukraṃ na pratīcchati /
tato garbhaṃ na nṛhṇaṇāti rogāṃścāpnoti dāruṇān /
asṛgdarārśogulmādīnābādhāṃścānilādibhiḥ //