Ashtanga Sangraha · Chapter 6.32

athāto bhaṅgapratiṣedhaṃ nāmādhyāyaṃ vyākhyāsyāmaḥ /
iti ha smāhurātreyādayo maharṣayaḥ //

patanapīḍanaprahārākṣepaṇavyāladaṃśanaprabhṛtibhirabhighātaviśeṣairanekavidhamasthibhaṅgamupadiśanti //

tattubhaṅgajātaṃ dvyadhiṣṭhānaṃ sandhāvasandhau ca /
tatra sandhimuktaṃ ṣaḍvidhamutpiṣṭaṃ viśliṣṭamavakṣiptamatikṣiptaṃ tiryakkṣiptaṃ vivartitamiti //

tasya sāmānyalakṣaṇaṃ prasāraṇākuñcana vivartanākṣepaṇāśaktirugrarujatā sparśāsahiṣṇutvaṃ ca //

athotpiṣṭe svasthāna eva sandhāvubhayataḥ śopho vedanā viśeṣataśca rātrau bhavati /
viśliṣṭelpaśopho vedanāsātatyaṃ sandhivikriyā ca /
avakṣipte sandhiviśleṣastīvrā ca ruk /
atikṣipte dvayorapi sandhyasthnoratikrāntatā vedanā ca /
tiryak kṣiptetvekasyāsthnaḥ pārśvato gamanamatyarthaṃ vedanā ca /
vivartite sandhipārśvagamanādviṣamāṅgatā vedanā ca //

asandhibhagnaṃ punardvādaśavidham /
tadyathā /
karkaṭakaṃ vakraṃ sthuṭitaṃ vellitamasthicchallikāśvakarṇaṃ piccitaṃ dāritaṃ cūrṇitamatipātitaṃ śeṣitaṃ majjānugatamiti //

śvayathubāhulyaṃ spandanaṃ vivartanaṃ sparśāsahiṣṇutā ca pīḍyamāne śabdaḥ srastāṅgatā vedanātipravṛttiḥ sarvāsu cāvasthāsu śarma na labhata iti sādhāraṇamasandhibhagnarūpam //

vaiśeṣikaṃ tu saṃvyūḍhamubhayatosthimadhyabhagnaṃ granthirivonnataṃ karkaṭakānukāri karkaṭakam //

ābhugnamavimuktamasthi vakram /
śūkapūrṇamivādhmātaṃ vipulaikadāri sphuṭitam //

dvidhābhūtaṃ vellate prakampamānaṃ vellitakam //

pārśvato 'sthi hīnamudgatamasthicchallikā //

aśvakarṇavadudgatamaśvakarṇam //

pṛthutāṃ gatamanalpaśophaṃ piccitam //

aṇubahuvidāri vedanāvacca dāritam //

spṛśyamānaṃ śabdavaccūrṇitam //

asthyavayavosthimadhyamanupraviśannatipātitam //

anyatarapārśvāvaśiṣṭaṃ śeṣitam //

kṣataṃ bhagnamunnamyamānaṃ majñi majjati majjānugatam //

eṣāmantyāni pañca kṛcchrasādhyāni kṛśātibālavṛddhāsahānāmatyāśināṃ vātātmakānāṃ kuṣṭhināmupadravavatāṃ ca //

asādhyaṃ tu bhinnaṃ kaṭīkapālaṃ sandhimuktaṃ vā jaghanamutpiṣṭaṃ kūrparo vivartitastathā lalāṭaṃ cūrṇitamasaṃśliṣṭakapālaṃ ca śiraḥ śaṃkhapṛṣṭhastanāntarabhaṅgaṃ ceti /
bhavanti cātra //

athāvanatamunnāmyamunnataṃ cāvapīḍayet /
āñchedadhikṣiptamadhogataṃ copari vartayet /
āñchanotpaḍinonnāmacarmasaṅkṣepabandhanaiḥ //

sandhīn śarīragān sarvāṃścalānapyacalānapi /
ityetaiḥ sthāpanopāyaiḥ samyaksaṃsthāpya niścalam /
paṭṭaiḥ prabhūtasarpirbhirveṣṭayitvā sukhaistataḥ //

kadambodumbarāśvathasarjārjunapalāśajaiḥ /
vaṃśodbhavairvā pṛthubhistanubhiḥ suniveśitaiḥ //

suślakṣṇaiḥ sapratiṣṭambhairvalkalaiḥ śakalairapi /
kuśāhvayaiḥ samaṃ bandhaṃ paṭṭasyopari yojayet //

śithilena hi hi bandhena sandhisthairyaṃ na jāyate /
gāḍhenātirujādāhapākaśvayathusambhavaḥ //

tryahāttryahādṛtau gharme saptāhanmokṣayeddhime /
sādhāraṇe tu pañcāhāt bhaṅgadoṣavaśena vā //

nyagrodhādikaṣāyeṇa tataḥ śītena secayet /
taṃ pañcamūlapakvena payasā tu savedanam //

sukhoṣṇaṃ cāvacāryaṃ syāccakratailaṃ vijānatā /
vibhajya deśaṃ kālaṃ ca vātaghnauṣadhasaṃyutam //

pratataṃ lepasekāṃśca vidadhyāt bhṛśaśītalān /
gṛṣṭikṣīraṃ sasarpiṣkaṃ madhurauṣadhasādhitam /
prātaḥ prātaḥ pibet bhagnaḥ śītalaṃ lākṣayāyutam //

savraṇasya tu bhagnasya vraṇo madhughṛtottaraiḥ /
kaṣāyaiḥ pratisāryo 'tha śeṣo bhaṅgoditaḥ kramaḥ //

lambāni vraṇamāṃsāni pralipya madhusarpiṣā /
sandadhīta vraṇān vaidyo bandhanaiścopapādayet //

tānsamānsusthitānjñātvā phalinīlodhrakaṭphalaiḥ /
samaṅgādhātakīyuktaiścūrṇitairavacūrṇayet //

pañcavalkalacūrṇairvā madhuśuktasamanvitaiḥ /
dhātakīlodhracūrṇairvā rohantyāśu tathā vraṇāḥ //

viśliṣṭotpiṣṭayoḥ sandhimevamevāvighaṭṭayan /
upācaredyathāsvaṃ ca visarpādīnupadravān //

iti bhaṅga upakrāntaḥ sthiradhātorṛtau hime /
māṃsalasyālpadoṣasya susādho dāruṇo 'nyathā //

pūrvamadhyāntavayasāmekadvitriguṇaiḥ kramāt /
māsaiḥ sthairyaṃ bhavet sandheryathoktaṃ bhajatāṃ vidhim //

sāmānyaṃ sādhanamidaṃ viśeṣo vakṣyatetvataḥ //

nakhasandhiṃ samutpiṣṭaṃ raktānugatamārayā /
avamathya srute rakte śālipiṣṭena lepayet //

bhagnān sandhivimuktāṃśca kṛtvā pūrvavadaṅgulīn /
tanunāveṣṭya paṭṭena ghṛtasekaṃ pradāpayet //

cakrayogena matimānāñchedūrvāsthi nirgatam //

āñcchedūrdhvamadhastācca kaṭībhagnaṃ cikitsakaḥ //

musalenotkṣipet kakṣamaṃsasandhau visaṅgate /
sthānasthitaṃ ca badhnīyāt svastikena samāhitaḥ //

kaurparaṃ tu bhiṣaksadhimaṃguṣṭhenānumārjayet /
anumṛjya tataḥ sandhiṃ pīḍayet kūrparāccyutam /
prasāryākuñcayeccainaṃ snehasakaṃ ca kārayet //

maṇibandhe ca jānau ca gulphe caiṣaḥ kriyākramaḥ //

ubhe tale same kṛtvā talabhagnasya dohinaḥ /
badhnīyādāmatailena pariṣekaṃ ca kārayet //

prāggomayamayaṃ piṇḍaṃ dhārayenmṛnmayaṃ tataḥ /
haste jātabale kāryaṃ kramāt pāṣāṇadhāraṇam //

sannamunnāmayet svinnamakṣakaṃ musalena tu /
tathonnataṃ pīḍayeta badhnīyānnibiḍaṃ tataḥ //

ūruvacca vidhātavyaṃ bāhubhaṅge prasādhanam //

grīvāyāṃ tu vivṛttāyāṃ praviṣṭāyāmadhopi vā /
avaṭāvatha hanvośca pragṛhyonnamayecchiraḥ /
samaṃ kuśābhirbadhnīyāduttānaṃ śāyayecca tam //

hanvasthinī samānīya hanusandhau visaṅgate /
svedayitvā sthitesamyak pañcāṅgībandhamācaret /
ghṛtaṃ vātaghnamadhuraiḥ siddhaṃ nasyaṃ ca pūjitam //

dantānabhagnāṃścalitān saraktānavapīḍayet /
vayasthasyāmbubhiḥ śītaiḥ pariṣicya pralepayet //

bahirnirvāpaṇairantaḥ sandhānīyairupācaret /
lādvayaśṛte kṣīre padmakādiśṛtaṃ ghṛtam //

nasyagaṇḍūṣayoryojyaṃ caladvijahitāni ca /
kalkitaistaddhitaiścāsya dantamāṃsāni lepayet /
trīnmāsānmṛdu bhuñjīta rasānnaṃ kaṭhināṃstyajet //

nāsāṃ vivṛttāṃ sannaṃ vā ṛjūkṛtya śalākayā /
pratyekaṃ nastato nāḍīṃ dvimukhīṃ sampraveśayet /
tataḥ paṭṭena saṃveṣtya ghṛtasekaṃ pradāpayet //

bhagnaṃ karṇaṃ ghṛtābhyaktaṃ nyasya bandhena yojayet /
sadyaḥkṣatavidhānaṃ ca tataḥ paścāt samācaret //

kaṭījaṅghorubhagnānāṃ kavāṭaśayanaṃ hitam /
yantraṇārthaṃ tataḥ kīlāḥ pañca kāryā nibandhanāḥ /
jaṅgo rupārśvayordvau dvau tala ekaśca kīlakaḥ //

śroṇyāṃ vā pṛṣṭvaṃśe vā vakṣasyakṣakayostathā /
vimokṣe bhagnasandhīnāṃ vidhimenaṃ samācaret //

sandhīṃściravimuktāṃstu snigdhasvinnān mṛdūkṛtān /
ūktairvidhānairbudhyā ca yathāsvaṃ sthānamānayet //

asandhibhagne rūḍhe tu viṣamolbaṇasādhite /
āpothya bhagnaṃ yamayettatto bhagnavadācaret //

bhaṅgo naiti yathā pākaṃ prayateta tathā bhiṣak /
pakvamāṃsasirāsnāyuḥ sandhiḥ śleṣaṃ na gacchati //

vātavyādhivinirdiṣṭān snehān bhagnasya yojayet /
catuṣprayogān balyāṃśca bastikarma ca śīlayet //

śālikṣīrarasājyādyaiḥ pauṣṭikairavidāhibhiḥ /
mātrayopacaret bhagnaṃ sandhisaṃśleṣakāribhiḥ //

glānirna śasyate tasya sandhiviśleṣakṛddhi sā //

lavaṇaṃ kaṭukaṃ kṣāramamlaṃ maithunamātapam /
vyāyāmaṃ ca na seveta bhagno rūkṣaṃ ca bheṣajam //

samyagyamitamapyasthi durnyāsāddurnibandhanāt /
saṅkṣobhādapi yat gacchedvikriyāṃ tadvivarjayet /
ādito yacca durjātamasthi sandhirathāpi vā //

taruṇāsthīni bhujyante bhajyante nalakāni tu /
kapālāni vibhidyante sphuṭantyanyāni bhūyasā //

anulbaṇamanāviddhaṃ svasthāne paryavasthitam /
avedanaṃ ca ceṣṭāyāṃ bhagnaṃ vidyāt susādhitam //

kṛṣṇāstilānvirajaso dṛḍhavastrabaddhān saptakṣapā bahati vāriṇi vāsayet /
saṃśoṣayedanudinaṃ pratisārya cainān kṣīre tathaiva madhukakvathite ca toye //

punarapi pītapayaskāṃstān pūrvavadeva śoṣitān bāḍham /
vigatatuṣānarajaskān saṃcūrṇya vicūrṇitairyuñjyāt //

naladavālakalohitayaṣṭikā nakhamisiplavakuṣṭhabalātrayaiḥ /
agarukuṅkumacandanasārivā saralasarjarasāmaradārubhiḥ //

padmakādigaṇopetaistilapiṣṭaṃ tataśca tat /
samastagandhabhaiṣajyasiddhadugdhena pīḍayet //

śaileyarāsnāśumatīkaśerukālānusārīnatapatralodhraiḥ /
sakṣīraśuklaiḥ sapayaḥ sadūrvaistailaṃ pacettannaladādibiśca //

gandhatailamidamuttamamasthisthairyakṛjjayati cāśu vikārān /
vātapittajanitānativīryaṃ vyāpino 'pivividhairupayogaiḥ //