Āryāsaptaśatī · Verses 81-100

āropitā śilāyām aśmeva tvaṃ bhaveti mantreṇa |
magnāpi pariṇayāpadi jāra-mukhaṃ vīkṣya hasitaiva

āyāti yāti khedaṃ karoti madhu harati madhukarīvānyā |
adhidevatā tvam eva śrīr iva kamalasya mama manasaḥ

āsādya dakṣiṇāṃ diśam avilambaṃ tyajati cottarāṃ taraṇiḥ |
puruṣaṃ haranti kāntāḥ prāyeṇa hi dakṣiṇā eva

ādāna-pāna-lepaiḥ kāścid garalopatāpa-hāriṇyaḥ |
sadasi sthitaiva siddhauṣadhi-vallī kāpi jīvayati

āndola-lola-keśīṃ cala-kāñcī-kiṅkiṇī-gaṇa-kvaṇitām |
smarasi puruṣāyitāṃ tāṃ smara-cāmara-cihna-yaṣṭim iva

ākṣipasi karṇam akṣṇā balir api baddhas tvayā tridhā madhye |
iti jita-sakala-vadānye tanu-dāne lajjase sutanu

ākṣepa-caraṇa-laṅghana-keśa-graha-keli-kutuka-taralena |
strīṇāṃ patir api gurur iti dharmaṃ na śrāvitā sutanuḥ

āgacchatānavekṣita-pṛṣṭhenārthī varāṭakeneva |
muṣitāsmi tena jaghanāṃ-śukam api voḍhuṃ naśaktena

ākuñcitaika-jaṅghaṃ darāvṛtordhvoru gopitārdhoru |
sutanoḥ śvasita-kramana-mad-udara-sphuṭa-nābhi śayanam idam

ādāya dhanam analpaṃ dadānayā subhaga tāvakaṃ vāsaḥ |
mugdhā rajaka-gṛhiṇyā kṛtā dinaiḥ katipayair niḥsvā

āstāṃ varam avakeśī mā doha-damasya racaya pūga-taroḥ |
etasmāt phalitād api kevalam udvegam adhigaccha

ārabdham abdhi-mathanaṃ svahastayitvā dvi-jihvam amarair yat |
ucitas tat-pariṇāmo viṣamaṃ viṣam eva yaj jātam

āvarjitālakāli śvāsotkampa-stanārpitaika-bhujam |
śayanaṃ rati-vivaśa-tanoḥ smarāmi śithilāṃśukaṃ tasyāḥ

āmrāṅkuro 'yam aruṇa-śyāmala-rucir asthi-nirgataḥ sutanu |
nava-kamaṭha-karpara-puṭān mūrdhevordhvaṃ gataḥ sphurati

ābhaṅgurāgra-bahu-guṇa-dīrghāsvāda-pradā priyā-dṛṣṭiḥ |
karṣati mano madīyaṃ hrada-mīnaṃ baḍiśa-rajjur iva

ālapa yathā yathecchasi yuktaṃ tava kitava kim apavārayasi |
strī-jāti-lāñchanam asau jīvita-raṅkā sakhī subhaga

āsvādito 'si mohād bata viditā vadana-mādhurī bhavataḥ |
madhu-lipta-kṣura rasanāc chedāya paraṃ vijānāsi

ākṛṣṭi-bhagna-kaṭakaṃ kena tava prakṛti-komalaṃ subhage |
dhanyena bhuja-mṛṇālaṃ grāhyaṃ madanasya rājyam iva

āruhya dūram agaṇita-raudra-kleśā prakāśayantī svam |
vāta-pratīcchana-paṭī vahitram iva harasi māṃ sutanu

āyāsaḥ para-hiṃsā vaitaṃsika-sārameya tava sāraḥ |
tvām apasārya vibhājyaḥ kuraṅga eṣo 'dhunaivānyaiḥ