આર્યાસપ્તશતી · શ્લોક 81-100

આરોપિતા શિલાયામ્ અશ્મેવ ત્વં ભવેતિ મન્ત્રેણ ।
મગ્નાપિ પરિણયાપદિ જાર-મુખં વીક્ષ્ય હસિતૈવ

આયાતિ યાતિ ખેદં કરોતિ મધુ હરતિ મધુકરીવાન્યા ।
અધિદેવતા ત્વમ્ એવ શ્રીર્ ઇવ કમલસ્ય મમ મનસઃ

આસાદ્ય દક્ષિણાં દિશમ્ અવિલમ્બં ત્યજતિ ચોત્તરાં તરણિઃ ।
પુરુષં હરન્તિ કાન્તાઃ પ્રાયેણ હિ દક્ષિણા એવ

આદાન-પાન-લેપૈઃ કાશ્ચિદ્ ગરલોપતાપ-હારિણ્યઃ ।
સદસિ સ્થિતૈવ સિદ્ધૌષધિ-વલ્લી કાપિ જીવયતિ

આન્દોલ-લોલ-કેશીં ચલ-કાઞ્ચી-કિઙ્કિણી-ગણ-ક્વણિતામ્ ।
સ્મરસિ પુરુષાયિતાં તાં સ્મર-ચામર-ચિહ્ન-યષ્ટિમ્ ઇવ

આક્ષિપસિ કર્ણમ્ અક્ષ્ણા બલિર્ અપિ બદ્ધસ્ ત્વયા ત્રિધા મધ્યે ।
ઇતિ જિત-સકલ-વદાન્યે તનુ-દાને લજ્જસે સુતનુ

આક્ષેપ-ચરણ-લઙ્ઘન-કેશ-ગ્રહ-કેલિ-કુતુક-તરલેન ।
સ્ત્રીણાં પતિર્ અપિ ગુરુર્ ઇતિ ધર્મં ન શ્રાવિતા સુતનુઃ

આગચ્છતાનવેક્ષિત-પૃષ્ઠેનાર્થી વરાટકેનેવ ।
મુષિતાસ્મિ તેન જઘનાં-શુકમ્ અપિ વોઢું નશક્તેન

આકુઞ્ચિતૈક-જઙ્ઘં દરાવૃતોર્ધ્વોરુ ગોપિતાર્ધોરુ ।
સુતનોઃ શ્વસિત-ક્રમન-મદ્-ઉદર-સ્ફુટ-નાભિ શયનમ્ ઇદમ્

આદાય ધનમ્ અનલ્પં દદાનયા સુભગ તાવકં વાસઃ ।
મુગ્ધા રજક-ગૃહિણ્યા કૃતા દિનૈઃ કતિપયૈર્ નિઃસ્વા

આસ્તાં વરમ્ અવકેશી મા દોહ-દમસ્ય રચય પૂગ-તરોઃ ।
એતસ્માત્ ફલિતાદ્ અપિ કેવલમ્ ઉદ્વેગમ્ અધિગચ્છ

આરબ્ધમ્ અબ્ધિ-મથનં સ્વહસ્તયિત્વા દ્વિ-જિહ્વમ્ અમરૈર્ યત્ ।
ઉચિતસ્ તત્-પરિણામો વિષમં વિષમ્ એવ યજ્ જાતમ્

આવર્જિતાલકાલિ શ્વાસોત્કમ્પ-સ્તનાર્પિતૈક-ભુજમ્ ।
શયનં રતિ-વિવશ-તનોઃ સ્મરામિ શિથિલાંશુકં તસ્યાઃ

આમ્રાઙ્કુરો ઽયમ્ અરુણ-શ્યામલ-રુચિર્ અસ્થિ-નિર્ગતઃ સુતનુ ।
નવ-કમઠ-કર્પર-પુટાન્ મૂર્ધેવોર્ધ્વં ગતઃ સ્ફુરતિ

આભઙ્ગુરાગ્ર-બહુ-ગુણ-દીર્ઘાસ્વાદ-પ્રદા પ્રિયા-દૃષ્ટિઃ ।
કર્ષતિ મનો મદીયં હ્રદ-મીનં બડિશ-રજ્જુર્ ઇવ

આલપ યથા યથેચ્છસિ યુક્તં તવ કિતવ કિમ્ અપવારયસિ ।
સ્ત્રી-જાતિ-લાઞ્છનમ્ અસૌ જીવિત-રઙ્કા સખી સુભગ

આસ્વાદિતો ઽસિ મોહાદ્ બત વિદિતા વદન-માધુરી ભવતઃ ।
મધુ-લિપ્ત-ક્ષુર રસનાચ્ છેદાય પરં વિજાનાસિ

આકૃષ્ટિ-ભગ્ન-કટકં કેન તવ પ્રકૃતિ-કોમલં સુભગે ।
ધન્યેન ભુજ-મૃણાલં ગ્રાહ્યં મદનસ્ય રાજ્યમ્ ઇવ

આરુહ્ય દૂરમ્ અગણિત-રૌદ્ર-ક્લેશા પ્રકાશયન્તી સ્વમ્ ।
વાત-પ્રતીચ્છન-પટી વહિત્રમ્ ઇવ હરસિ માં સુતનુ

આયાસઃ પર-હિંસા વૈતંસિક-સારમેય તવ સારઃ ।
ત્વામ્ અપસાર્ય વિભાજ્યઃ કુરઙ્ગ એષો ઽધુનૈવાન્યૈઃ