Āryāsaptaśatī · Verses 101-120

ānayati pathika-taruṇaṃ hariṇa iha prāpayann ivātmānam |
upakalam ago 'pi komala-kalam āvalika-valanottaralaḥ

āsīd eva yad ārdraḥ kim api tadā kim ayam āhato 'py āha |
niṣṭhura-bhāvād adhunā kaṭūni sakhi raṭati paṭaha iva

ājñā-karaś ca tāḍana-paribhava-sahanaś ca satyam aham asyāḥ |
na tu śīla-śītaleyaṃ priyetarad vaktum api veda

ādhāya dugdha-kalaśe manthānaṃ śrānta-dor-latā gopī |
aprāpta-pārijātā daive doṣaṃ niveśayati

āstāṃ mānaḥ kathanaṃ sakhīṣu vā mayi nivedya-durvinaye |
śithilita-rati-guṇa-garvā mamāpi sā lajjitā sutanuḥ

āvartair ātarpaṇa-śobhāṃ ḍiṇḍīra-pāṇḍurair dadhatī |
gāyati mukharita-salilā priya-saṅgama-maṅgalaṃ surasā

iti vibhāvyākhyā-sametā ā-kāra-vrajyā ||
i-kāra-vrajyā
iyam udgatiṃ harantī-netra-nikocaṃ ca vidadhatī purataḥ |
na vijānīmaḥ kiṃ tava vadati sapatnīva dina-nidrā

idam ubhaya-bhitti-santata-hāra-guṇāntar-gataika-kuca-mukulam |
guṭikā-dhanur iva bālā-vapuḥ smaraḥ śrayati kutukena

iha śikhari-śikharāvalambini vinoda-dara-tarala-vapuṣi taru-hariṇe |
paśyābhilaṣati patituṃ vihagī nija-nīḍa-mohena

ikṣur nadī-pravāho dyūtaṃ māna-grahaś ca he sutanu |
bhrū-latikā ca taveyaṃ bhaṅge rasam adhikam āvahati

indor ivāsya purato yad vimukhī sāpa-vāraṇā bhramasi |
tat kathaya kiṃ nu duritaṃ sakhi tvayā chāyayeva kṛtam

iha kapaṭa-kutuka-taralita-dṛśi viśvāsaṃ kuraṅga kiṃ kuruṣe |
tava rabhasa-taraliteyaṃ vyādha-vadhūr vāladhau valate

iha vahati bahu mahodadhivibhūṣaṇā mānagarvam iyam urvī |
devasya kamaṭhamūrteḥ na pṛṣṭhaṃ api nikhilam āpnoti

iti vibhāvyākhyā-sametā i-kāra-vrajyā ||
ī-kāra-vrajyā
īrṣyā-roṣa-jvalito-nija-pati-saṅgaṃ vicintayaṃs tasyāḥ |
cyuta-vasana-jaghana-bhāvana-sāndrānandena nirvāmi

īśvara-parigrahocita-moho 'syāṃ madhupa kiṃ mudhā patasi |
kanakābhidhāna-sārā vīta-rasā kitava-kalikeyam

īṣad avaśiṣṭa-jaḍimā śiśire gata-mātra eva ciram aṅgaiḥ |
nava-yauvaneva tanvī niṣevyate nirbharaṃ vāpī

iti vibhāvyākhyā-sametā ī-kāra-vrajyā ||
u-kāra-vrajyā
ullasita-bhrū-dhanuṣā tava pṛthunā locanena rucirāṅgi |
acalā api na mahāntaḥ ke cañcala-bhāvam ānītāḥ

upanīya yan nitambe bhujaṅgam uccair alambi vibudhaiḥ śrīḥ |
ekaḥ sa mandara-giriḥ sakhi garimāṇaṃ samudvahatu

ullasita-lāñchano 'yaṃ jyotsnā-varṣī sudhākaraḥ sphurati |
āsakta-kṛṣṇa-caraṇaḥ śakaṭa iva prakaṭita-kṣīraḥ

upacārānunayās te kitavasyopekṣitāḥ sakhī-vacasā |
adhunā niṣṭhuram api yadi sa vadati kalikaitavād yāmi