Āryāsaptaśatī · Verses 644-663

sarvaṃsahāṃ mahīm iva vidhāya tāṃ bāṣpa-vāribhiḥ pūrṇām |
bhavanāntara-mayam adhunā saṅkrāntas te guruḥ premā

sambhavati na khalu rakṣā sarasānāṃ prakṛti-capala-caritānām |
anubhavati hara-śirasy api bhujaṅga-pariśīlanaṃ gaṅgā

sulabheṣu kamala-kesara-ketaka-mākanda-kunda-kusumeṣu |
vāñchati manorathāndhā madhupī smara-dhanuṣi guṇī-bhāvam

sā lajjitā sapatnī kupitā bhītaḥ priyaḥ sakhī sukhitā |
bālāyāḥ pīḍāyāṃ nidānite jāgare vaidyaiḥ

sucirāgatasya saṃvāhana-cchalenāṅgam aṅgam āliṅgya |
puṣyati ca māna-carcāṃ gṛhiṇī saphalayait cotkalikām

sā sarvathaiva raktā rāgaṃ guñjeva na tu mukhe vahati |
vacana-paṭos tava rāgaḥ kevalam āsye śukasyeva

sāyaṃ kānta-bhujāntara-patitā rati-nīta-sakala-rajanīkā |
uṣasi dadatī pradīpaṃ sakhībhir upahasyate bālā

sā tīkṣṇa-māna-dahanā mahataḥ snehasya durlabhaḥ pākaḥ |
tvāṃ darvīm iva dūti prayāsayann asmi viśvastaḥ

sneha-kṣatir jigīṣā samaraḥ prāṇa-vyayāvadhiḥ kariṇām |
na vitanute kam anarthaṃ dantini tava yauvanodbhaṭaḥ

sadanād apaiti dayito hasati sakhī viśati gharaṇim iva bālā |
jvalati sapatnī kīre jalpati mugdhe prasīdati

saṅkucitāṅgīṃ dviguṇāṃśukāṃ mano-mātra-visphuran-madanām |
dayitāṃ bhajāmi mugdhām iva tuhina tava prasādena

sakhi lagnaiva vasantī sadāśaye mahati rasa-maye tasya |
bāḍava-śikheva sindhor na manāg apy ārdratāṃ bhajasi

sakhi mihirodgamanādi-pramodam apidhāya so 'yam avasāne |
bandhyo 'vadhi-vāsara iva tuṣāra-divasaḥ kadarthayati

sura-bhavane taruṇābhyāṃ parasparākṛṣṭa-dṛṣṭi-hṛdayābhyām |
devārcanārtham udyatam anyonyasyārpitaṃ kusumam

sāyaṃ kuśeśayāntar-madhupānāṃ niryatāṃ nādaḥ |
mitra-vyasana-viṣaṇṇaiḥ kamalair ākranda iva muktaḥ

sumahati manyu-nimitte mayaiva vihite'pi vepamānoruḥ |
na sakhīnām api rudatī mamaiva vakṣaḥ-sthale patitā

subhaga vyajana-vicālana-śithila-bhujābhūd iyaṃ vayasyāpi |
udvartanaṃ na sakhyāḥ samāpyate kiñcid apagaccha

sa-vrīḍā nakha-radanārpaṇeṣu kupitā pragāḍham aciroḍhā |
bahu-yācñā-caraṇa-graha-sādhyā roṣeṇa jāteyam

sugṛhīta-malina-pakṣā laghavaḥ para-bhedinaḥ paraṃ tīkṣṇāḥ |
puruṣā api viśikhā api guṇa-cyutāḥ kasya na bhayāya

sva-kapolena prakaṭīkṛtaṃ pramattatva-kāraṇaṃ kim api |
dviradasya durjanasya ca madaṃ cakāraiva dānam api