Āryāsaptaśatī · Verses 624-643

sparśād eva svedaṃ janayati na ca me dadāti nidrātum |
pirya iva jaghanāṃśukam api na nidāghaḥ kṣaṇam api kṣamate

sā bhavato bhāvanayā samaya-viruddhaṃ manobhavaṃ bālā |
nūtana-lateva sundara dohada-śaktyā phalaṃ vahati

spṛśati nakhair na ca vilikhati sicayaṃ gṛhṇāti na ca vimocayati |
na ca muñcati na ca madayati nayati niśāṃ sā na nidrāti

stana-jaghana-dvayam asyā laṅghita-madhyaḥ sakhe mama kaṭākṣaḥ |
nojjhati rodhasvatyās taṭa-dvayaṃ tīrtha-kāka iva

sa-vrīḍa-smita-manda-śvasitaṃ māṃ mā spṛśeti śaṃsantyā |
ākopam etya vātāyanaṃ pidhāya sthitaṃ priyayā

sa-kara-grahaṃ sa-ruditaṃ sākṣepaṃ sa-nakha-muṣṭi sa-jigīṣam |
tasyāḥ surataṃ surataṃ prājāpatya-kratur ato 'nyaḥ

sakhi na khalu nimalānāṃ vidadhaty abhidhānam api mukhe malināḥ |
kenāśrāvi pikānāṃ kuhūṃ vihāyetaraḥ śabdaḥ

svalpā iti rāma-balair ye nyastā nāśaye payo-rāśeḥ |
te śailāḥ sthitimanto hanta laghimnaiva bahu-mānaḥ

sā śyāmā tanvaṅgī dahatā śītopacāra-tīvreṇa |
viraheṇa pāṇḍimānaṃ nītā tuhinena dūrvaiva

sunirīkṣita-niścala-kara-vallabha-dhārā-jalokṣitā na tathā |
sotkampena mayā sakhi dṛṣṭā sā mādyati sma yathā

sakhi moghīkṛta-madane pativrate kas tavādaraṃ kurute |
nāśrauṣīr bhagavān api sa kāma-viddho haraḥ pūjyaḥ

sā mayi na dāsa-buddhir na ratir nāpi trapā na viśvāsaḥ |
hanta nirīkṣya navoḍhāṃ manye vayam apiryā jātāḥ

sucirāyāte gṛhiṇī niśi bhuktā dina-mukhe vidagdheyam |
dhavala-nakhāṅkaṃ nija-vapur akuṅkumārdraṃ na darśayati

stana-jaghanoru-praṇayī gāḍhaṃ lagno niveśita-snehaḥ |
priya kāla-pariṇatir iyaṃ virajyase yan nakhāṅka iva

sā vicchāyā niśi niśi sutanur bahu-tuhina-śītale talpe |
jvalati tvadīya-virahād oṣadhir iva himavataḥ pṛṣṭhe

sā nīrase tava hṛdi praviśati niryāti na labhate sthairyam |
sundara sakhī divasakara-bimbe tuhināṃśu-rekheva

sukumāratvaṃ kāntir nitānta-saraatvam āntarāś ca guṇāḥ |
kiṃ nāma nendulekhe śaśa-graheṇaiva tava kathitam

saurabhya-mātra-manasām āstāṃ malaya-drumasya na viśeṣaḥ |
dharmārthināṃ tathāpi sa mṛgyaḥ pūjārtham aśvatthaḥ

saṃvāhayati śayānaṃ yathopavījayati gṛhapatiṃ gṛhiṇī |
gṛha-vṛti-vivara-niveśita-dṛśas tathāśvāsanaṃ yūnaḥ

satyaṃ svalpa-guṇeṣu stabdhā sadṛśe punar bhujaṅge sā |
arpita-koṭiḥ praṇamati sundara hara-cāpa-yaṣṭir iva