Āryāsaptaśatī · Verses 664-683

satyaṃ patir avidagdhaḥ sā tu sva-dhiyaiva nidhuvane nipuṇā |
mārttikam ādhāya guruṃ dhanur adhigatam ekalavyena

saubhāgya-mānavān sa tvayāvadhīryāpamānam ānītaḥ |
svaṃ viraha-pāṇḍimānaṃ bhasma-snānopamaṃ tanute

sakhi mama karañja-tailaṃ bahu-sandeśaṃ praheṣyasīty uditā |
śvaśura-gṛha-gamana-militaṃ bāṣpa-jalaṃ saṃvṛṇoty asatī

sandarśayanti sundari kulaṭānāṃ tamasi vitatam avikalpe |
maulimaṇidīpa-kalikā varti-nibhā bhogino 'dhvānam

sarvaṃ vanaṃ tṛṇālyā pihitaṃ pītāḥ sitāṃśu-ravi-tārāḥ |
pradhvaṃsāḥ panthāno malinenodgamya meghena

samyag aniṣpannaḥ san yo 'rthas tvarayā svayaṃ sphuṭīkriyate |
sa vyaṅga eva bhavati prathamo vinatā-tanūja iva

sajjana eva hi vidyā śobhanāyai bhavati durjane moghā |
na vidūra-darśanatayā kaiścid upādīyate gṛdhraḥ

subhagaṃ vadati janas taṃ nija-patir iti naiṣa rocate mahyam |
pīyūṣe'pi hi bheṣaja-bhāvopanate bhavaty aruciḥ

saudha-gavākṣa-gatāpi hi dṛṣṭis taṃ sthiti-kṛta-prayatnam api |
hima-giri-śikhara-skhalitā gaṅgevairāvataṃ harati

saha-gharma-cāriṇī mama paricchadaḥ sutanu neha sandehaḥ |
na tu sukhayati tuhina-dina-cchatra-cchāyeva sajjantī

sakala-guṇaika-niketana dānava-vāsena gharaṇiruharājaḥ |
jāto 'si bhūtale tvaṃ satām anādeya-phala-kusumaḥ

sundari tāṭaṅkamayaṃ cakram ivodvahati tāvake karṇe |
nipatati nikāma-tīkṣṇaṃ kaṭākṣa-bāṇo 'rjuna-praṇayī

svādhīnaiva phala-rddhir janopajīvyatvam ucchraya-cchāyā |
sat-puṃso maru-bhūruha iva jīvana-mātram āśāsyam

santāpa-moha-kampān sampādayituṃ nihantum api jantūn |
sakhi durjanasya bhūtiḥ prasarati dūraṃ jvarasyeva

sukhayitatarāṃ na rakṣati paricaya-leśaṃ gaṇāṅganeva śrīḥ |
kuka-kāminīva nojjhati vāg-devī janma-janmāpi

sva-sadana-nikaṭe nalinīm abhinava-jāta-cchadāṃ nirīkṣyaiva |
hā gṛhiṇīti pralapaṃś cirāgataḥ sakhi patiḥ patitaḥ

saci caturānana-bhāvād vaimukhyaṃ kvāpi naiva darśayati |
ayam eka-hṛdaya eva druhiṇa iva priyatamas tad api

satyaṃ madhuro niyataṃ vakro nūnaṃ kalādharo dayitaḥ |
sa tu veda na dvitīyām akalaṅkaḥ pratipad-indur iva

sva-sthānād api vicalati majjati jaladhau ca nīcam api bhajate |
nija-pakṣa-rakṣaṇa-manāḥ sujano maināka-śaila iva

saṃvṛṇu bāṣpa-jalaṃ sakhi dṛśam uparajyāñjanena valayainām |
dayitaḥ paśyatu pallava-paṅkajayor yugapad eva rucam