Āryāsaptaśatī · Verses 604-623

sa-vrīḍa-smita-subhage spṛṣṭāspṛṣṭeva kiṃcid apayāntī |
apasarasi sundari yathā yathā tathā spṛśasi mama hṛdayam

sakhi sukhayaty avakāśa-prāptaḥ preyān yathā tathā na gṛhī |
vātād avāritād api bhavati gavākṣānilaḥ śītaḥ

satatam aruṇita-mukhe sakhi nigirantī garalam iva girāṃ gumpham |
avagaṇitauṣadhi-mantrā bhujaṅgi raktaṃ virañjayasi

sthala-kamala-mugdha-vapuṣā sātaṅkāṅka-sthitaika-caraṇena |
āśvāsayati visinyāḥ kūle visa-kaṇṭhikā śapharam

sa-nakha-padam adhika-gauraṃ nābhī-mūlaṃ niraṃśukaṃ kṛtvā |
anayā sevita pavana tvaṃ kiṃ kṛta-malaya-bhṛgupātaḥ

sarvāṅgam arpayantī lolā suptaṃ śrameṇa śayyāyām |
alasam api bhāgyavantaṃ bhajate puruṣayiteva śrīḥ

suditaṃ tad eva yatra smāraṃ smāraṃ viyoga-duḥkhāni |
āliṅgati sā gāḍhaṃ punaḥ punar yāminī-prathame

sāntar-bhayaṃ bhujiṣyā yathā yathācarati samadhikāṃ sevām |
sāśaṅka-serṣya-sabhayā tathā tathā gehinī tasya

sundari darśayati yathā bhavad-vipakṣasya tat-sakhī kāntim |
patati tathā mama dṛṣṭis tvad-eka-dāsasya sāsūyā

svādhīnair adhara-vraṇa-nakhāṅka-patrāvalopa-dina-śayanaiḥ |
subhagā subhagety anayā sakhi nikhilā mukharitā pallī

sarita iva yasya gehe śuṣyanti viśāla-gotrajā nāryaḥ |
kṣārāsv eva sa tṛpyati jala-nidhi-laharīṣu jalada iva

sakala-kaṭakaika-maṇḍani kaṭhinī-bhūtāśaye śikhara-danti |
giribhuva iva tava manye manaḥ śilā samabhavac caṇḍi

sakhi duravagāha-gahano vidadhāno vipriyaṃ priya-jane'pi |
khala iva durlakṣyas tava vinata-mukhasyopari sthitaḥ kopaḥ

sveda-sacela-snātā sapta-padī sapta maṇḍalīr yāntī |
sa-madana-dahana-vikārā manoharā vrīḍitā namati

surasa-pravartamānaḥ saṅghāṭo 'yaṃ samāna-vṛttānām |
etyaiva bhinna-vṛttair bhaṅguritaḥ kāvya-sarga iva

sarvāsām eva sakhe paya iva surataṃ manohāri |
tasyā eva punaḥ punar āvṛttau dugdham iva madhuram

svapne'pi yāṃ na muñcasi yā te'nugrāhiṇī hṛdi-sthāpi |
duṣṭāṃ na buddhim iva tāṃ gūḍha-vyabhicāriṇīṃ vetsi

saparāvṛti carantī vāty eva tṛṇaṃ mano 'navadyāṅgi |
harasi kṣipasi taralayasi bhramayasi tolayasi pātayasi

sā bahu-lakṣaṇa-bhāvā strī-mātraṃ veti kitava tava tulyam |
koṭir varāṭikā vā dyūta-vidheḥ sarva eva paṇaḥ

sā viraha-dahana-dūnā mṛtvā mṛtvāpi jīvati varākī |
śārīva kitava bhavatānukūlitā pātitākṣeṇa