Āryāsaptaśatī · Verses 41-60

abudhā ajaṅgamā api kayāpi gatyā paraṃ padam avāptāḥ |
mantriṇa iti kīrtyante naya-bala-guṭikā iva janena

atiśīla-śīta-latayā lokeṣu sakhī mṛdu-pratāpā naḥ |
kṣaṇa-vāmya-dahyamānaḥ pratāpam asyāḥ priyo veda

anyāsv api gṛhiṇīti dhyāyann abhilaṣitam āpnoti |
paśyan pāṣāṇamayīḥ pratimā iva devatātvena

anupetya nīca-bhāvaṃ bālaka parito gabhīra-madhurasya |
asyāḥ premṇaḥ pātraṃ na bhavasi sarito rasasyeva

adhivāsanam ādheyaṃ guṇa-mārgam apekṣate na ca grathanām |
kalayati yuvajana-mauliṃ ketaka-kalikā svarūpeṇa

apanīta-nikhila-tāpāṃ subhaga sva-kareṇa vinihitāṃ bhavatā |
patiśayana-vāra-pāli-jvarauṣadhaṃ vahati sā mālām

agaṇita-guṇena sundara kṛtvā cāritram apy udāsīnam |
bhavatānanya-gatiḥ sā vihitāvartena taraṇir iva

anurakta-rāmayā punar āgataye sthāpitottarīyasya |
apy eka-vāsasas tava sarva-yuvabhyo 'dhikā śobhā

ardhaḥ prāṇity eko mṛta itaro me vidhuntudasyeva |
sudhayeva priyayā pathi saṅgatyāliṅgitārdhasya

avadhīrito 'pi nidrā-miṣeṇa māhātmyam asṛṇayā priyayā |
avabodhito 'smi capalo bāṣpa-sthita-mitena talpena

ayi śabda-mātra-sāmyād āsvādita-śarkarasya tava pathika |
svalpo rasanā-cchedaḥ purato jana-hāsyatā mahatī

abhinava-yauvana-durjaya-vipakṣa-jana-hanyamānamānāpi |
sūnoḥ pitṛ-priyatvād bibharti subhagā-madaṃ gṛhiṇī

apamānitam iva samprati guruṇā grīṣmeṇa durbalaṃ śaityam |
snānotsuka-taruṇī-stana-kalaśa-nibaddhaṃ payo viśati

alasayati gātram akhilaṃ kleśaṃ mocayati locanaṃ harati |
svāpa iva preyān mama moktuṃ na dadāti śayanīyam

aṃsāvalambi-kara-dhṛta-kacam abhiṣekārdra-dhavala-nakha-rekham |
dhautādhara-nayanaṃ vapur astram anaṅgasya tava niśitam

avinihitaṃ vinihitam iva yuvasu svaccheṣu vāra-vāma-dṛśaḥ |
upadarśayanti hṛdayaṃ darpaṇa-bimbeṣu vadanam iva

atilajjayā tvayaiva prakaṭaḥ preyān akāri nibhṛto 'pi |
prāsāda-maulir upari prasarantyā vaijayanty eva

anyonya-grathanāguṇa-yogād gāvaḥ padārpaṇair bahubhiḥ |
khalam api tudanti meḍhī-bhūtaṃ madhya-stham ālambya

ananugraheṇa na tathā vyathayati kaṭu-kūjitair yathā piśunaḥ |
rudhirādānād adhikaṃ dunoti karṇe kvaṇan maśakaḥ

agre laghimā paścān mahatāpi pidhīyate na hi mahimnā |
vāmana iti trivikramam abhidadhati daśāvatāra-vidaḥ