આર્યાસપ્તશતી · શ્લોક 41-60

અબુધા અજઙ્ગમા અપિ કયાપિ ગત્યા પરં પદમ્ અવાપ્તાઃ ।
મન્ત્રિણ ઇતિ કીર્ત્યન્તે નય-બલ-ગુટિકા ઇવ જનેન

અતિશીલ-શીત-લતયા લોકેષુ સખી મૃદુ-પ્રતાપા નઃ ।
ક્ષણ-વામ્ય-દહ્યમાનઃ પ્રતાપમ્ અસ્યાઃ પ્રિયો વેદ

અન્યાસ્વ્ અપિ ગૃહિણીતિ ધ્યાયન્ન્ અભિલષિતમ્ આપ્નોતિ ।
પશ્યન્ પાષાણમયીઃ પ્રતિમા ઇવ દેવતાત્વેન

અનુપેત્ય નીચ-ભાવં બાલક પરિતો ગભીર-મધુરસ્ય ।
અસ્યાઃ પ્રેમ્ણઃ પાત્રં ન ભવસિ સરિતો રસસ્યેવ

અધિવાસનમ્ આધેયં ગુણ-માર્ગમ્ અપેક્ષતે ન ચ ગ્રથનામ્ ।
કલયતિ યુવજન-મૌલિં કેતક-કલિકા સ્વરૂપેણ

અપનીત-નિખિલ-તાપાં સુભગ સ્વ-કરેણ વિનિહિતાં ભવતા ।
પતિશયન-વાર-પાલિ-જ્વરૌષધં વહતિ સા માલામ્

અગણિત-ગુણેન સુન્દર કૃત્વા ચારિત્રમ્ અપ્ય્ ઉદાસીનમ્ ।
ભવતાનન્ય-ગતિઃ સા વિહિતાવર્તેન તરણિર્ ઇવ

અનુરક્ત-રામયા પુનર્ આગતયે સ્થાપિતોત્તરીયસ્ય ।
અપ્ય્ એક-વાસસસ્ તવ સર્વ-યુવભ્યો ઽધિકા શોભા

અર્ધઃ પ્રાણિત્ય્ એકો મૃત ઇતરો મે વિધુન્તુદસ્યેવ ।
સુધયેવ પ્રિયયા પથિ સઙ્ગત્યાલિઙ્ગિતાર્ધસ્ય

અવધીરિતો ઽપિ નિદ્રા-મિષેણ માહાત્મ્યમ્ અસૃણયા પ્રિયયા ।
અવબોધિતો ઽસ્મિ ચપલો બાષ્પ-સ્થિત-મિતેન તલ્પેન

અયિ શબ્દ-માત્ર-સામ્યાદ્ આસ્વાદિત-શર્કરસ્ય તવ પથિક ।
સ્વલ્પો રસના-ચ્છેદઃ પુરતો જન-હાસ્યતા મહતી

અભિનવ-યૌવન-દુર્જય-વિપક્ષ-જન-હન્યમાનમાનાપિ ।
સૂનોઃ પિતૃ-પ્રિયત્વાદ્ બિભર્તિ સુભગા-મદં ગૃહિણી

અપમાનિતમ્ ઇવ સમ્પ્રતિ ગુરુણા ગ્રીષ્મેણ દુર્બલં શૈત્યમ્ ।
સ્નાનોત્સુક-તરુણી-સ્તન-કલશ-નિબદ્ધં પયો વિશતિ

અલસયતિ ગાત્રમ્ અખિલં ક્લેશં મોચયતિ લોચનં હરતિ ।
સ્વાપ ઇવ પ્રેયાન્ મમ મોક્તું ન દદાતિ શયનીયમ્

અંસાવલમ્બિ-કર-ધૃત-કચમ્ અભિષેકાર્દ્ર-ધવલ-નખ-રેખમ્ ।
ધૌતાધર-નયનં વપુર્ અસ્ત્રમ્ અનઙ્ગસ્ય તવ નિશિતમ્

અવિનિહિતં વિનિહિતમ્ ઇવ યુવસુ સ્વચ્છેષુ વાર-વામ-દૃશઃ ।
ઉપદર્શયન્તિ હૃદયં દર્પણ-બિમ્બેષુ વદનમ્ ઇવ

અતિલજ્જયા ત્વયૈવ પ્રકટઃ પ્રેયાન્ અકારિ નિભૃતો ઽપિ ।
પ્રાસાદ-મૌલિર્ ઉપરિ પ્રસરન્ત્યા વૈજયન્ત્ય્ એવ

અન્યોન્ય-ગ્રથનાગુણ-યોગાદ્ ગાવઃ પદાર્પણૈર્ બહુભિઃ ।
ખલમ્ અપિ તુદન્તિ મેઢી-ભૂતં મધ્ય-સ્થમ્ આલમ્બ્ય

અનનુગ્રહેણ ન તથા વ્યથયતિ કટુ-કૂજિતૈર્ યથા પિશુનઃ ।
રુધિરાદાનાદ્ અધિકં દુનોતિ કર્ણે ક્વણન્ મશકઃ

અગ્રે લઘિમા પશ્ચાન્ મહતાપિ પિધીયતે ન હિ મહિમ્ના ।
વામન ઇતિ ત્રિવિક્રમમ્ અભિદધતિ દશાવતાર-વિદઃ