Āryāsaptaśatī · Verses 21-40

atipūjita-tāreyaṃ dṛṣṭiḥ śruti-laṅghana-kṣamā sutanu |
jina-siddhānta-sthitir iva sa-vāsanā kaṃ na mohayati

alam aviṣaya-bhaya-lajjā-vañcitam ātmānam iyam iyat samayam |
nava-paricita-dayita-guṇā śocati nālapati śayana-sakhīḥ

anurāga-vartinā tava viraheṇogreṇa sā gṛhītāṅgī |
tripura-ripuṇeva gaurī vara-tanur ardhāvaśiṣṭaiva

anya-pravaṇe preyasi viparīte srotasīva vihitāsthāḥ |
tad-gatim icchantyaḥ sakhi bhavanti viphala-śramāḥ hāsyāḥ

adhikaḥ sarvebhyo yaḥ priyaḥ priyebhyo hṛdi sthitaḥ satatam |
sa luṭhati virahe jīvaḥ kaṇṭhe'syās tvam iva sambhoge

anayana-pathe priye na vyathā yathā dṛśya eva duṣprāpe |
mlānaiva kevalaṃ niśi tapana-śilā vāsare jvalati

avibhāvyo mitre'pi sthiti-mātreṇaiva nandayan dayitaḥ |
rahasi vyapadeśād ayam arthaḥ ivārājake bhogyaḥ

aśrauṣīr aparādhān mama tathyaṃ kathaya man-mukhaṃ vīkṣya |
abhidhīyate na kiṃ yadi na māna-caurānanaḥ kitavaḥ

anyonyam anu srotasam anyad athānyat taṭāt taṭaṃ bhajatoḥ |
udite'rke'pi na māgha-snānaṃ prasamāpyate yūnoḥ

ayi cūta-valli phala-bhara-natāṅgi viṣvag-vikāsi-saurabhye |
śvapaca-ghaṭa-karparāṅkā tvaṃ kila phalitāpi viphalaiva

añjalir akāri lokair mlānim anāptaiva rañjitā jagatī |
sandhyāyā iva vasatiḥ svalpāpi sakhe sukhāyaiva

agṛhītānunayāṃ mām upekṣya sakhyo gatā bataikāham |
prasabhaṃ karoṣi mayi cet tvad upari vapur adya mokṣyāmi

asthira-rāgaḥ kitavo mānī capalo vidūṣakas tvam asi |
mama sakhyāḥ patasi kare paśyāmi yathā ṛjur bhavasi

akaruṇa kātara-manaso darśita-nīrā nirantarāleyam |
tvām anu dhāvati vimukhaṃ gaṅgeva bhagīrathaṃ dṛṣṭiḥ

antaḥ-kaluṣa-stambhita-rasayā bhṛṅgāranālayeva mama |
apy unmukhasya vihitā varavarṇini na tvayā tṛptiḥ

ayi sarale sarala-taror mada-mudita-dvipa-kapola-pāleś ca |
anyonya-mugdha-gandha-vyatihāraḥ kaṣaṇam ācaṣṭe

asyāḥ kara-ruha-khaṇḍita-kāṇḍa-paṭa-prakaṭa-nirgatā dṛṣṭiḥ |
paṭa-vigalita-niṣkaluṣā svadate pīyūṣa-dhāreva

asyāḥ pati-gṛha-gamane karoti mātāśru-picchilāṃ padavīm |
guṇa-garvitā punar asau hasati śanaiḥ śuṣka-rudita-mukhī

aṅke niveśya kūṇita-dṛśaḥ śanair akaruṇeti śaṃsantyāḥ |
mokṣyāmi veṇi-bandhaṃ kadā nakhair gandha-tailāktaiḥ

alam analaṅkṛti-subhage bhūṣaṇam upahāsa-viṣayam itarāsām |
kuruṣe vanaspati-latā prasūnam iva bandhya-vallīnām