Āryāsaptaśatī · Verses 309-328

nija-kāya-cchāyāyāṃ viśramya nidāgha-vipadam apanetum |
bata vividhās tanu-bhaṅgīr mugdha-karaṅgīyam ācarati

na hasanti jaraṭha iti yad vallava-vanitā namanti nandam api |
sakhi sa yaśodā-tanayo nityaṃ kandalita-kandarpaḥ

nītā svabhāvam arpita-vapur api vāmyaṃ na kāminī tyajati |
hara-dehārdha-grathitā nidarśanaṃ pārvatī tatra

nāgara-bhogānumita-sva-vadhū-saundarya-garva-taralasya |
nipatati padaṃ na bhūmau jñāti-puras tantu-vāyasya

nipatati caraṇe koṇe praviśya niśi yan nirīkṣate kas tat |
sakhi sa khalu loka-purataḥ khalaḥ sva-garimāṇam udgirati

na vimocayituṃ śakyaḥ kṣamāṃ mahān mocito yadi kathaṃcit |
mandara-girir iva garalaṃ nivartate nanu samutthāpya

niyataiḥ padair niṣevyaṃ skhalite'narthāvahaṃ samāśrayati |
sambhavad anya-gatiḥ kaḥ saṅkrama-kāṣṭhaṃ durīśaṃ ca

nija-pada-gati-guṇa-rañjita-jagatāṃ kariṇāṃ ca sat-kavīnāṃ ca |
vahatām api mahimānaṃ śobhāyai sajjanā eva

nottapane na snehaṃ harati na nirvāti na malino bhavati |
tasyojjvalo niśi niśi premā ratna-pradīpa iva

nihitān nihitān ujjhati niyataṃ mama pārthivān api prema |
bhrāmaṃ bhrāmaṃ tiṣṭhati tatraiva kulāla-cakram iva

nirbharam api sambhuktaṃ dṛṣṭyā prātaḥ piban na tṛpyāmi |
jaghanam anaṃśukam asyāḥ koka ivāśiśira-kara-bimbam

niviḍa-ghaṭitoru-yugalāṃ śvāsottabdha-stanārpita-vyajanām |
tāṃ snigdha-kupita-dṛṣṭiṃ smarāmi rata-niḥsahāṃ sutanum

nirguṇa iti mṛta iti ca dvāv ekārthābhidhāyinau viddhi |
paśya dhanur-guṇa-śūnyaṃ nirjīvaṃ tad iha śaṃsanti

nija-sūkṣma-sūtra-lambī vilocanaṃ taruṇa te kṣaṇaṃ haratu |
ayam udgṛhīta-vaḍiśaḥ karkaṭa iva markaṭaḥ purataḥ

nāgara gītir ivāsau grāma-sthityāpi bhūṣitā sutanuḥ |
kastūrī na mṛgodara-vāsa-vaśād visratām eti

nakha-likhita-stani kura-baka-maya-pṛṣṭhe bhūmi-lulita-virasāṅgi |
hṛdaya-vidāraṇa-niḥsṛta-kusumāsra-śareva harasi manaḥ

nītā laghimānam iyaṃ tasyāṃ garimāṇam adhikam arpayasi |
bhāra iva viṣama-bhāryaḥ sudurvaho bhavati gṛha-vāsaḥ

na ca dūtī na ca yācñā na cāñjalir na ca kaṭākṣa-vikṣepaḥ |
saubhāgya-mānināṃ sakhi kaca-grahaḥ prathamam abhiyogaḥ

niśi viṣama-kusuma-viśikha-preritayor mauna-labdha-rati-rasayoḥ |
mānas tathaiva vilasati dampatyor aśithila-granthiḥ

nija-gātra-nirviśeṣa-sthāpitam api sāram akhilam ādāya |
nirmokaṃ ca bhujaṅgī muñcati puruṣaṃ ca vāra-vadhūḥ