આર્યાસપ્તશતી · શ્લોક 309-328

નિજ-કાય-ચ્છાયાયાં વિશ્રમ્ય નિદાઘ-વિપદમ્ અપનેતુમ્ ।
બત વિવિધાસ્ તનુ-ભઙ્ગીર્ મુગ્ધ-કરઙ્ગીયમ્ આચરતિ

ન હસન્તિ જરઠ ઇતિ યદ્ વલ્લવ-વનિતા નમન્તિ નન્દમ્ અપિ ।
સખિ સ યશોદા-તનયો નિત્યં કન્દલિત-કન્દર્પઃ

નીતા સ્વભાવમ્ અર્પિત-વપુર્ અપિ વામ્યં ન કામિની ત્યજતિ ।
હર-દેહાર્ધ-ગ્રથિતા નિદર્શનં પાર્વતી તત્ર

નાગર-ભોગાનુમિત-સ્વ-વધૂ-સૌન્દર્ય-ગર્વ-તરલસ્ય ।
નિપતતિ પદં ન ભૂમૌ જ્ઞાતિ-પુરસ્ તન્તુ-વાયસ્ય

નિપતતિ ચરણે કોણે પ્રવિશ્ય નિશિ યન્ નિરીક્ષતે કસ્ તત્ ।
સખિ સ ખલુ લોક-પુરતઃ ખલઃ સ્વ-ગરિમાણમ્ ઉદ્ગિરતિ

ન વિમોચયિતું શક્યઃ ક્ષમાં મહાન્ મોચિતો યદિ કથંચિત્ ।
મન્દર-ગિરિર્ ઇવ ગરલં નિવર્તતે નનુ સમુત્થાપ્ય

નિયતૈઃ પદૈર્ નિષેવ્યં સ્ખલિતેઽનર્થાવહં સમાશ્રયતિ ।
સમ્ભવદ્ અન્ય-ગતિઃ કઃ સઙ્ક્રમ-કાષ્ઠં દુરીશં ચ

નિજ-પદ-ગતિ-ગુણ-રઞ્જિત-જગતાં કરિણાં ચ સત્-કવીનાં ચ ।
વહતામ્ અપિ મહિમાનં શોભાયૈ સજ્જના એવ

નોત્તપને ન સ્નેહં હરતિ ન નિર્વાતિ ન મલિનો ભવતિ ।
તસ્યોજ્જ્વલો નિશિ નિશિ પ્રેમા રત્ન-પ્રદીપ ઇવ

નિહિતાન્ નિહિતાન્ ઉજ્ઝતિ નિયતં મમ પાર્થિવાન્ અપિ પ્રેમ ।
ભ્રામં ભ્રામં તિષ્ઠતિ તત્રૈવ કુલાલ-ચક્રમ્ ઇવ

નિર્ભરમ્ અપિ સમ્ભુક્તં દૃષ્ટ્યા પ્રાતઃ પિબન્ ન તૃપ્યામિ ।
જઘનમ્ અનંશુકમ્ અસ્યાઃ કોક ઇવાશિશિર-કર-બિમ્બમ્

નિવિડ-ઘટિતોરુ-યુગલાં શ્વાસોત્તબ્ધ-સ્તનાર્પિત-વ્યજનામ્ ।
તાં સ્નિગ્ધ-કુપિત-દૃષ્ટિં સ્મરામિ રત-નિઃસહાં સુતનુમ્

નિર્ગુણ ઇતિ મૃત ઇતિ ચ દ્વાવ્ એકાર્થાભિધાયિનૌ વિદ્ધિ ।
પશ્ય ધનુર્-ગુણ-શૂન્યં નિર્જીવં તદ્ ઇહ શંસન્તિ

નિજ-સૂક્ષ્મ-સૂત્ર-લમ્બી વિલોચનં તરુણ તે ક્ષણં હરતુ ।
અયમ્ ઉદ્ગૃહીત-વડિશઃ કર્કટ ઇવ મર્કટઃ પુરતઃ

નાગર ગીતિર્ ઇવાસૌ ગ્રામ-સ્થિત્યાપિ ભૂષિતા સુતનુઃ ।
કસ્તૂરી ન મૃગોદર-વાસ-વશાદ્ વિસ્રતામ્ એતિ

નખ-લિખિત-સ્તનિ કુર-બક-મય-પૃષ્ઠે ભૂમિ-લુલિત-વિરસાઙ્ગિ ।
હૃદય-વિદારણ-નિઃસૃત-કુસુમાસ્ર-શરેવ હરસિ મનઃ

નીતા લઘિમાનમ્ ઇયં તસ્યાં ગરિમાણમ્ અધિકમ્ અર્પયસિ ।
ભાર ઇવ વિષમ-ભાર્યઃ સુદુર્વહો ભવતિ ગૃહ-વાસઃ

ન ચ દૂતી ન ચ યાચ્ઞા ન ચાઞ્જલિર્ ન ચ કટાક્ષ-વિક્ષેપઃ ।
સૌભાગ્ય-માનિનાં સખિ કચ-ગ્રહઃ પ્રથમમ્ અભિયોગઃ

નિશિ વિષમ-કુસુમ-વિશિખ-પ્રેરિતયોર્ મૌન-લબ્ધ-રતિ-રસયોઃ ।
માનસ્ તથૈવ વિલસતિ દમ્પત્યોર્ અશિથિલ-ગ્રન્થિઃ

નિજ-ગાત્ર-નિર્વિશેષ-સ્થાપિતમ્ અપિ સારમ્ અખિલમ્ આદાય ।
નિર્મોકં ચ ભુજઙ્ગી મુઞ્ચતિ પુરુષં ચ વાર-વધૂઃ