Āryāsaptaśatī · Verses 329-348

nṛtya-śrama-gharmārdraṃ muñcasi kṛcchreṇa kañcukaṃ sutanu |
makarandodaka-juṣṭaṃ madana-dhanur-vallir iva colam

nāhaṃ vadāmi sutanu tvam aśīlā vā pracaṇḍa-caritā vā |
prema-svabhāva-sulabhaṃ bhayam udayati mama tu hṛdayasya

na nirūpito 'si sakhyā niyataṃ netra-tribhāga-mātreṇa |
hārayati yena kusumaṃ vimukhe tvayi kaṇṭha iva deve

nakha-daśana-muṣṭi-pātair adayair āliṅganaiś ca subhagasya |
aparādhaṃ śaṃsantyaḥ śāntiṃ racayanti rāgiṇyaḥ

na guṇe na lakṣaṇe'pi ca vayasi ca rūpe ca nādaro vihitaḥ |
tvayi saurabheyi ghaṇṭā kapilā-putrīti baddheyam

niṣkāraṇāparādhaṃ niṣkāraṇa-kalaha-roṣa-paritoṣam |
sāmānya-maraṇa-jīvana-sukha-duḥkhaṃ jayati dāmpatyam

na prāpyase karābhyāṃ hṛdayān nāpaiṣi vitanuṣe bādhām |
tvaṃ mama bhagnāvastita-kusumāyudha-viśikha-phalikeva

nātheti paruṣam ucitaṃ priyeti dāsety anugraho yatra |
tad-dāmpatyam ito 'nyan nārī rajjuḥ paśuḥ puruṣaḥ

nihitāyām asyām api saivaikā manasi me sphurati |
rekhāntaropadhānāt pattrākṣara-rājir iva dayitā

nidhi-nikṣepa-sthānasyopari cihnārtham iva latā nihitā |
lobhayati tava tanūdari jaghana-taṭād upari romālī

nihitārdha-locanāyās tvaṃ tasyā harasi hṛdaya-paryantam |
na subhaga samucitam īdṛśam aṅguli-dāne bhujaṃ gilasi

nītvāgāraṃ rajanī-jāgaram ekaṃ ca sādaraṃ dattvā |
acireṇa kair na taruṇair durgā-pattrīva muktāsi

nakṣatre'gnāv indāv udare kanake maṇau dṛśi samudre |
yat khalu tejas tad akhilam ojāyitam abja-mitrasya

na savarṇo na ca rūpaṃ na saṃskriyā kāpi naiva sā prakṛtiḥ |
bālā tvad-virahāpadi jātāpabhraṃśa-bhāṣeva

na vibhūṣaṇe tavāsthā vapur guṇenaiva jayasi sakhi yūnaḥ |
avadhīritāstra-śastrā kusumeṣor malla-vidyeva

netrākṛṣṭo bhrāmaṃ bhrāmaṃ preyān yathā yathāsti tathā |
sakhi manthayati mano mama dadhi-bhāṇḍaṃ mantha-daṇḍa iva

nānā-varṇaka-rūpaṃ prakalpayantī manoharaṃ tanvī |
citrakara-tūlikeva tvāṃ sā pratibhitti bhāvayati

iti vibhāvyākhyā-sametā na-kāra-vrajyā ||
pa-kāra-vrajyā
pathikāsaktā kiṃcin na veda ghana-kalam agopitā gopī |
keli-kalā-huṅkāraiḥ kīrāvali mogham apasarasi

praṇamati paśyati cumbati saṃśliṣyati pulaka-mukulitair aṅgaiḥ |
priya-saṅgāya sphuritāṃ viyoginī vāma-bāhulatām

praviśasi na ca nirgantuṃ jānāsi vyākulatvam ātanuṣe |
bālaka cetasi tasyāś cakra-vyūhe'bhimanyur iva