આર્યાસપ્તશતી · શ્લોક 21-40

અતિપૂજિત-તારેયં દૃષ્ટિઃ શ્રુતિ-લઙ્ઘન-ક્ષમા સુતનુ ।
જિન-સિદ્ધાન્ત-સ્થિતિર્ ઇવ સ-વાસના કં ન મોહયતિ

અલમ્ અવિષય-ભય-લજ્જા-વઞ્ચિતમ્ આત્માનમ્ ઇયમ્ ઇયત્ સમયમ્ ।
નવ-પરિચિત-દયિત-ગુણા શોચતિ નાલપતિ શયન-સખીઃ

અનુરાગ-વર્તિના તવ વિરહેણોગ્રેણ સા ગૃહીતાઙ્ગી ।
ત્રિપુર-રિપુણેવ ગૌરી વર-તનુર્ અર્ધાવશિષ્ટૈવ

અન્ય-પ્રવણે પ્રેયસિ વિપરીતે સ્રોતસીવ વિહિતાસ્થાઃ ।
તદ્-ગતિમ્ ઇચ્છન્ત્યઃ સખિ ભવન્તિ વિફલ-શ્રમાઃ હાસ્યાઃ

અધિકઃ સર્વેભ્યો યઃ પ્રિયઃ પ્રિયેભ્યો હૃદિ સ્થિતઃ સતતમ્ ।
સ લુઠતિ વિરહે જીવઃ કણ્ઠેઽસ્યાસ્ ત્વમ્ ઇવ સમ્ભોગે

અનયન-પથે પ્રિયે ન વ્યથા યથા દૃશ્ય એવ દુષ્પ્રાપે ।
મ્લાનૈવ કેવલં નિશિ તપન-શિલા વાસરે જ્વલતિ

અવિભાવ્યો મિત્રેઽપિ સ્થિતિ-માત્રેણૈવ નન્દયન્ દયિતઃ ।
રહસિ વ્યપદેશાદ્ અયમ્ અર્થઃ ઇવારાજકે ભોગ્યઃ

અશ્રૌષીર્ અપરાધાન્ મમ તથ્યં કથય મન્-મુખં વીક્ષ્ય ।
અભિધીયતે ન કિં યદિ ન માન-ચૌરાનનઃ કિતવઃ

અન્યોન્યમ્ અનુ સ્રોતસમ્ અન્યદ્ અથાન્યત્ તટાત્ તટં ભજતોઃ ।
ઉદિતેઽર્કેઽપિ ન માઘ-સ્નાનં પ્રસમાપ્યતે યૂનોઃ

અયિ ચૂત-વલ્લિ ફલ-ભર-નતાઙ્ગિ વિષ્વગ્-વિકાસિ-સૌરભ્યે ।
શ્વપચ-ઘટ-કર્પરાઙ્કા ત્વં કિલ ફલિતાપિ વિફલૈવ

અઞ્જલિર્ અકારિ લોકૈર્ મ્લાનિમ્ અનાપ્તૈવ રઞ્જિતા જગતી ।
સન્ધ્યાયા ઇવ વસતિઃ સ્વલ્પાપિ સખે સુખાયૈવ

અગૃહીતાનુનયાં મામ્ ઉપેક્ષ્ય સખ્યો ગતા બતૈકાહમ્ ।
પ્રસભં કરોષિ મયિ ચેત્ ત્વદ્ ઉપરિ વપુર્ અદ્ય મોક્ષ્યામિ

અસ્થિર-રાગઃ કિતવો માની ચપલો વિદૂષકસ્ ત્વમ્ અસિ ।
મમ સખ્યાઃ પતસિ કરે પશ્યામિ યથા ઋજુર્ ભવસિ

અકરુણ કાતર-મનસો દર્શિત-નીરા નિરન્તરાલેયમ્ ।
ત્વામ્ અનુ ધાવતિ વિમુખં ગઙ્ગેવ ભગીરથં દૃષ્ટિઃ

અન્તઃ-કલુષ-સ્તમ્ભિત-રસયા ભૃઙ્ગારનાલયેવ મમ ।
અપ્ય્ ઉન્મુખસ્ય વિહિતા વરવર્ણિનિ ન ત્વયા તૃપ્તિઃ

અયિ સરલે સરલ-તરોર્ મદ-મુદિત-દ્વિપ-કપોલ-પાલેશ્ ચ ।
અન્યોન્ય-મુગ્ધ-ગન્ધ-વ્યતિહારઃ કષણમ્ આચષ્ટે

અસ્યાઃ કર-રુહ-ખણ્ડિત-કાણ્ડ-પટ-પ્રકટ-નિર્ગતા દૃષ્ટિઃ ।
પટ-વિગલિત-નિષ્કલુષા સ્વદતે પીયૂષ-ધારેવ

અસ્યાઃ પતિ-ગૃહ-ગમને કરોતિ માતાશ્રુ-પિચ્છિલાં પદવીમ્ ।
ગુણ-ગર્વિતા પુનર્ અસૌ હસતિ શનૈઃ શુષ્ક-રુદિત-મુખી

અઙ્કે નિવેશ્ય કૂણિત-દૃશઃ શનૈર્ અકરુણેતિ શંસન્ત્યાઃ ।
મોક્ષ્યામિ વેણિ-બન્ધં કદા નખૈર્ ગન્ધ-તૈલાક્તૈઃ

અલમ્ અનલઙ્કૃતિ-સુભગે ભૂષણમ્ ઉપહાસ-વિષયમ્ ઇતરાસામ્ ।
કુરુષે વનસ્પતિ-લતા પ્રસૂનમ્ ઇવ બન્ધ્ય-વલ્લીનામ્