Āryāsaptaśatī · Verses 201-220

guṇa-baddha-caraṇa iti mā līlā-vihagaṃ vimuñca sakhi mugdhe |
asmin valayita-śākhe kṣaṇena guṇa-yantraṇaṃ truṭati

guru-garji-sāndra-vidyud-bhaya-mudrita-karṇa-cakṣuṣāṃ purataḥ |
bālā cumbati jāraṃ vajrād adhiko hi madaneṣuḥ

gṛhiṇī-guṇeṣu gaṇitā vinayaḥ sevā vidheyateti guṇāḥ |
mānaḥ prabhutā vāmyaṃ vibhūṣaṇaṃ vāma-nayanānām

guṇam āntaram aguṇaṃ vā lakṣmīr gaṅgā ca veda hari-harayoḥ |
ekā pade'pi ramate na vasati nihitā śirasy aparā

gatvā jīvita-saṃśayam abhyastaḥ soḍhum aticirād virahaḥ |
akaruṇaḥ punar api ditsasi surata-durabhyāsam asmākam

gotra-skhalita-praśne'py uttaram atiśīla-śītalaṃ dattvā |
niḥśvasya mogha-rūpe sva-vapuṣi nihitaṃ tayā cakṣuḥ

gandha-grāhiṇi śālonmīlita-niryāsa-nihita-nikhilāṅgi |
upabhukta-mukta-bhūruha-śate'dhunā bhramari na bhramasi

guruṣu militeṣu śirasā praṇamasi laghuṣūnnatā sameṣu samā |
ucitajñāsi tule kiṃ tulayasi guñjā-phalaiḥ kanakam

gehinyā hriyamāṇaṃ nirudhyamānaṃ navoḍhayā purataḥ |
mama naukā-dvitayārpita-guṇa iva hṛdayaṃ dvidhā bhavati

guṇa ākarṣaṇa-yogyo dhanuṣa ivaiko 'pi lakṣa-lābhāya |
lūtātantubhir iva kiṃ guṇair vimardāsahair bahubhiḥ

gāyati gīte vaṃśe vādayati sa vipañcīṣu |
pāṭhayati pañjara-śukaṃ tava sandeśākṣaraṃ rāmā

gaṇayati na madhu-vyayam ayam aviratam āpibatu madhukaraḥ kumudam |
saubhāgya-mānavān param asūyati dyu-maṇaye candraḥ

guṇa-vidhṛtā sakhi tiṣṭhasi tathaiva dehena kiṃ tu hṛdayaṃ te |
hṛtam amunā mālāyāḥ samīraṇeneva saurabhyam

guru-sadane nedīyasi caraṇa-gate mayi ca mūkayāpi tayā |
nūpuram apāsya padayoḥ kiṃ na priyam īritaṃ priyayā

granthilatayā kim ikṣoḥ kim apabhraṃśena bhavati gītasya |
kim anārjavena śaśinaḥ kiṃ dāridryeṇa dayitasya

gehinyā cikura-graha-samaya-sasītkāra-mīlita-dṛśāpi |
bālā-kapola-pulakaṃ vilokya nihito 'smi śirasi padā

guru-pakṣma jāgarāruṇa-ghūrṇat-tāraṃ kathañcid api valate |
nayanam idaṃ sphuṭa-nakha-pada-niveś a-kṛta-kopa-kuṭila-bhru

iti vibhāvyākhyā-sametā ga-kāra-vrajyā ||
gha-kāra-vrajyā
ghaṭita-jaghanaṃ nipīḍita-pīnoru nyasta-nikhila-kuca-bhāram |
āliṅganty api bālā vadaty asau muñca muñceti

ghaṭita-palāśa-kapāṭaṃ niśi niśi sukhino hi śerate padmāḥ |
ujjāgareṇa kairava kati śakyā rakṣituṃ lakṣmīḥ

ghūrṇanti vipralabdhāḥ snehāpāyāt pradīpa-kalikāś ca |
prātaḥ prasthita-pāntha-strī-hṛdayaṃ sphuṭati kamalaṃ ca