Āryāsaptaśatī · Verses 221-248

iti vibhāvyākhyā-sametā gha-kāra-vrajyā ||
ca-kāra-vrajyā
capalasya palita-lāñchita-cikuraṃ dayitasya maulim avalokya |
khedocite'pi samaye saṃmadam evādade gṛhiṇī

caṇḍi prasāritena spṛśan bhujenāpi kopanāṃ bhavatīm |
tṛpyāmi paṅkilām iva piban nadīṃ nalina-nālena

capala-bhujaṅgī-bhuktojjhita śītala-gandhavaha niśi bhrānta |
aparāśāṃ pūrayituṃ pratyūṣa-sadāgate gaccha

cira-pathika drāghima-milad-alaka-latā-śaivalāvali-grathilā |
kara-toyeva mṛgākṣyā dṛṣṭir idānīṃ sadānīrā

caṇḍi dara-capala-cela-vyaktoru-vilokanaika-rasikena |
dhūli-bhayād api na mayā caraṇa-hṛtau kuñcitaṃ cakṣuḥ

cala-kuṇḍala-calad-alaka-skhalad-urasija-vasana-sajjad-ūru-yugam |
jaghana-bhara-klama-kūṇita-nayanam idaṃ harati gatam asyāḥ

caraṇaiḥ parāga-saikatam aphalam idaṃ likhasi madhupa ketakyāḥ |
iha vasati kānti-sāre nāntaḥ-salilāpi madhu-sindhuḥ

cira-kāla-pathika śaṅkā-taraṅgitākṣaḥ kim īkṣase mugdha |
tvan-nistriṃśāśleṣa-vraṇa-kiṇarājīyam etasyāḥ

capalāṃ yathā madāndhaś chāyāmayam ātmanaḥ karo hanti |
āsphālayati karaṃ pratigajas tathāyaṃ puro ruddhaḥ

cumbana-lolupa-mad-adhara-hṛta-kāśmīraṃ smaran na tṛpyāmi |
hṛdaya-dviradālāna-stambhaṃ tasyās tad-ūru-yugam

cikura-visāraṇa-tiryaṅ-nata-kaṇṭhī vimukha-vṛttir api bālā |
tvām iyam aṅguli-kalpita-kacāvakāśā vilokayati

cumbana-hṛtāñjanārghaṃ sphuṭa-jāgara-rāgam īkṣaṇaṃ kṣipasi |
kim uṣasi viyoga-kātaram asameṣur ivārdha-nārācam

iti vibhāvyākhyā-sametā ca-kāra-vrajyā ||
cha-kāra-vrajyā
chāyā-grāhī candraḥ kūṭatvaṃ satatam ambujaṃ vrajati |
hitvobhayaṃ sabhāyāṃ stauti tavaivānanaṃ lokaḥ

chāyā-mātraṃ paśyann adhomukho 'py udgatena dhairyeṇa |
tudati mama hṛdaya-nipuṇā rādhā-cakraṃ kirītīva

iti vibhāvyākhyā-sametā cha-kāra-vrajyā ||
ja-kāra-vrajyā
jala-bindavaḥ katipaye nayanād gamanodyame tava skhalitāḥ |
kānte mama gantavyā bhūr etair eva picchilitā

jṛmbhottambhita-dor-yuga-yantrita-tāṭaṅka-pīḍita-kapolam |
tasyāḥ smarāmi jala-kaṇa-lulitāñjanam alasa-dṛṣṭi mukham

jāgaritvā puruṣaṃ paraṃ vane sarvato mukhaṃ harasi |
ati śarad-anurūpaṃ tava śīlam idaṃ jāti-śālinyāḥ

iti vibhāvyākhyā-sametā ja-kāra-vrajyā ||
jha-kāra-vrajyā
jhaṅkṛta-kaṅkaṇa-pāṇi-kṣepaiḥ stambhāvalambanair maunaiḥ |
śobhayasi śuṣka-ruditair api sundari mandira-dvāram

iti vibhāvyākhyā-sametā jha-kāra-vrajyā ||
ḍha-kāra-vrajyā
ḍhakkām āhatya madaṃ vitanvate kariṇa iva ciraṃ puruṣāḥ |
strīṇāṃ kariṇīnām iva madaḥ punaḥ sva-kula-nāśāya

iti vibhāvyākhyā-sametā ḍha-kāra-vrajyā ||
ta-kāra-vrajyā
tāṃ tāpayanti manmatha-bāṇās tvāṃ prīṇayanti bata subhaga |
tapana-karās tapana-śilāṃ jvalayanti vidhuṃ madhurayanti