આર્યાસપ્તશતી · શ્લોક 201-220

ગુણ-બદ્ધ-ચરણ ઇતિ મા લીલા-વિહગં વિમુઞ્ચ સખિ મુગ્ધે ।
અસ્મિન્ વલયિત-શાખે ક્ષણેન ગુણ-યન્ત્રણં ત્રુટતિ

ગુરુ-ગર્જિ-સાન્દ્ર-વિદ્યુદ્-ભય-મુદ્રિત-કર્ણ-ચક્ષુષાં પુરતઃ ।
બાલા ચુમ્બતિ જારં વજ્રાદ્ અધિકો હિ મદનેષુઃ

ગૃહિણી-ગુણેષુ ગણિતા વિનયઃ સેવા વિધેયતેતિ ગુણાઃ ।
માનઃ પ્રભુતા વામ્યં વિભૂષણં વામ-નયનાનામ્

ગુણમ્ આન્તરમ્ અગુણં વા લક્ષ્મીર્ ગઙ્ગા ચ વેદ હરિ-હરયોઃ ।
એકા પદેઽપિ રમતે ન વસતિ નિહિતા શિરસ્ય્ અપરા

ગત્વા જીવિત-સંશયમ્ અભ્યસ્તઃ સોઢુમ્ અતિચિરાદ્ વિરહઃ ।
અકરુણઃ પુનર્ અપિ દિત્સસિ સુરત-દુરભ્યાસમ્ અસ્માકમ્

ગોત્ર-સ્ખલિત-પ્રશ્નેઽપ્ય્ ઉત્તરમ્ અતિશીલ-શીતલં દત્ત્વા ।
નિઃશ્વસ્ય મોઘ-રૂપે સ્વ-વપુષિ નિહિતં તયા ચક્ષુઃ

ગન્ધ-ગ્રાહિણિ શાલોન્મીલિત-નિર્યાસ-નિહિત-નિખિલાઙ્ગિ ।
ઉપભુક્ત-મુક્ત-ભૂરુહ-શતેઽધુના ભ્રમરિ ન ભ્રમસિ

ગુરુષુ મિલિતેષુ શિરસા પ્રણમસિ લઘુષૂન્નતા સમેષુ સમા ।
ઉચિતજ્ઞાસિ તુલે કિં તુલયસિ ગુઞ્જા-ફલૈઃ કનકમ્

ગેહિન્યા હ્રિયમાણં નિરુધ્યમાનં નવોઢયા પુરતઃ ।
મમ નૌકા-દ્વિતયાર્પિત-ગુણ ઇવ હૃદયં દ્વિધા ભવતિ

ગુણ આકર્ષણ-યોગ્યો ધનુષ ઇવૈકો ઽપિ લક્ષ-લાભાય ।
લૂતાતન્તુભિર્ ઇવ કિં ગુણૈર્ વિમર્દાસહૈર્ બહુભિઃ

ગાયતિ ગીતે વંશે વાદયતિ સ વિપઞ્ચીષુ ।
પાઠયતિ પઞ્જર-શુકં તવ સન્દેશાક્ષરં રામા

ગણયતિ ન મધુ-વ્યયમ્ અયમ્ અવિરતમ્ આપિબતુ મધુકરઃ કુમુદમ્ ।
સૌભાગ્ય-માનવાન્ પરમ્ અસૂયતિ દ્યુ-મણયે ચન્દ્રઃ

ગુણ-વિધૃતા સખિ તિષ્ઠસિ તથૈવ દેહેન કિં તુ હૃદયં તે ।
હૃતમ્ અમુના માલાયાઃ સમીરણેનેવ સૌરભ્યમ્

ગુરુ-સદને નેદીયસિ ચરણ-ગતે મયિ ચ મૂકયાપિ તયા ।
નૂપુરમ્ અપાસ્ય પદયોઃ કિં ન પ્રિયમ્ ઈરિતં પ્રિયયા

ગ્રન્થિલતયા કિમ્ ઇક્ષોઃ કિમ્ અપભ્રંશેન ભવતિ ગીતસ્ય ।
કિમ્ અનાર્જવેન શશિનઃ કિં દારિદ્ર્યેણ દયિતસ્ય

ગેહિન્યા ચિકુર-ગ્રહ-સમય-સસીત્કાર-મીલિત-દૃશાપિ ।
બાલા-કપોલ-પુલકં વિલોક્ય નિહિતો ઽસ્મિ શિરસિ પદા

ગુરુ-પક્ષ્મ જાગરારુણ-ઘૂર્ણત્-તારં કથઞ્ચિદ્ અપિ વલતે ।
નયનમ્ ઇદં સ્ફુટ-નખ-પદ-નિવેશ્ અ-કૃત-કોપ-કુટિલ-ભ્રુ

ઇતિ વિભાવ્યાખ્યા-સમેતા ગ-કાર-વ્રજ્યા ॥
ઘ-કાર-વ્રજ્યા
ઘટિત-જઘનં નિપીડિત-પીનોરુ ન્યસ્ત-નિખિલ-કુચ-ભારમ્ ।
આલિઙ્ગન્ત્ય્ અપિ બાલા વદત્ય્ અસૌ મુઞ્ચ મુઞ્ચેતિ

ઘટિત-પલાશ-કપાટં નિશિ નિશિ સુખિનો હિ શેરતે પદ્માઃ ।
ઉજ્જાગરેણ કૈરવ કતિ શક્યા રક્ષિતું લક્ષ્મીઃ

ઘૂર્ણન્તિ વિપ્રલબ્ધાઃ સ્નેહાપાયાત્ પ્રદીપ-કલિકાશ્ ચ ।
પ્રાતઃ પ્રસ્થિત-પાન્થ-સ્ત્રી-હૃદયં સ્ફુટતિ કમલં ચ