Arthashastra · Chapter 07.2

saṃdhi.vigrahayos tulyāyāṃ vṛddhau saṃdhim upeyāt //

vigrahe hi kṣaya.vyaya.pravāsa.pratyavāyā bhavanti //

tena^āsana.yānayor āsanaṃ vyākhyātam //

dvaidhī.bhāva.saṃśrayayor dvaidhī.bhāvaṃ gacchet //

dvaidhī.bhūto hi sva.karma.pradhāna ātmana eva^upakaroti, saṃśritas tu parasya^upakaroti, na^ātmanaḥ //

yad.balaḥ sāmantas tad.viśiṣṭa.balam āśrayet //

tad.viśiṣṭa.bala.abhāve tam eva^āśritaḥ kośa.daṇḍa.bhūmīnām anyatamena^asya^upakartum adṛṣṭaḥ prayateta //

mahā.doṣo hi viśiṣṭa.bala.samāgamo rājñām, anyatra^ari.vigṛhītāt //

aśakye daṇḍa.upanatavad varteta //

yadā ca^asya prāṇa.haraṃ vyādhim antaḥ.kopaṃ śatru.vṛddhiṃ mitra.vyasanam upasthitaṃ vā tan.nimittām ātmanaś ca vṛddhiṃ paśyet tadā sambhāvya.vyādhi.dharma.kārya.apadeśena^apayāyāt //

sva.viṣayastho vā na^upagacchet //

āsanno vā^asya cchidreṣu praharet //

balīyasor vā madhya.gatas trāṇa.samartham āśrayeta, yasya vā^antardhiḥ syāt, ubhau vā //

kapāla.saṃśrayas tiṣṭhet, mūla.haram itarasya^itaram apadiśan //

bhedam ubhayor vā paraspara.apadeśaṃ prayuñjīta, bhinnayor upāṃśu.daṇḍam //

pārśvastho vā balasthayor āsanna.bhayāt pratikurvīta //

durga.apāśrayo vā dvaidhī.bhūtas tiṣṭhet //

saṃdhi.vigraha.krama.hetubhir vā ceṣṭeta //

dūṣya.amitra.āṭavikān ubhayor upagṛhṇīyāt //

etayor anyataraṃ gacchaṃs tair eva^anyatarasya vyasane praharet //

dvābhyām upahato vā maṇḍala.apāśrayas tiṣṭhet, madhyamam udāsīnaṃ vā saṃśrayeta //

tena saha^ekam upagṛhya^itaram ucchindyād, ubhau vā //

dvābhyām ucchinno vā madhyama.udāsīnayos tat.pakṣīyāṇāṃ vā rājñāṃ nyāya.vṛttim āśrayeta //

tulyānāṃ vā yasya prakṛtayaḥ sukhyeyur enam, yatrastho vā śaknuyād ātmānam uddhartum, yatra vā pūrva.puruṣa.ucitā gatir āsannaḥ sambandho vā, mitrāṇi bhūyāṃsy atiśaktimanti vā bhaveyuḥ //
KAZ07.2.25ab/ priyo yasya bhaved yo vā priyo^asya kataras tayoḥ /
KAZ07.2.25cd/ priyo yasya sa taṃ gacched ity āśraya.gatiḥ parā //E
(sama.hīna.jyāyasāṃ guṇa.abhiniveśaḥ - hīna.saṃdhayah)