Arthashastra · Chapter 07.14

sāmavāyikair evam abhiyukto vijigīṣur yas teṣāṃ pradhānas taṃ brūyāt "tvayā me saṃdhiḥ, idaṃ hiraṇyam, ahaṃ ca mitram, dvi.guṇā te vṛddhiḥ, na^arhasy ātma.kṣayeṇa mitra.mukhān amitrān vardhayitum, ete hi vṛddhās tvām eva paribhaviṣyanti" iti //

bhedaṃ vā brūyāt "anapakāro yathā^aham etaiḥ sambhūya^abhiyuktas tathā tvām apy ete saṃhita.balāḥ svasthā vyasane vā^abhiyokṣyante, balaṃ hi cittaṃ vikaroti, tad eṣāṃ vighātaya" iti //

bhinneṣu pradhānam upagṛhya hīneṣu vikramayet, hīnān anugrāhya vā pradhāne, yathā vā śreyo^abhimanyeta tathā //

vairaṃ vā parair grāhayitvā visaṃvādayet //

phala.bhūyastvena vā pradhānam upajāpya saṃdhiṃ kārayet //

atha^ubhaya.vetanāḥ phala.bhūyastvaṃ darśayantaḥ sāmavāyikān "atisaṃhitāḥ stha" ity udddūṣayeyuḥ //

duṣṭeṣu saṃdhiṃ dūṣayet //

atha^ubhaya.vetanā bhūyo bhedam eṣāṃ kuryuḥ "evaṃ tad yad asmābhir darśitam" iti //

bhinneṣv anyatama.upagraheṇa ceṣṭeta //

pradhāna.abhāve sāmavāyikānām utsāhayitāraṃ sthira.karmāṇam anurakta.prakṛktiṃ lobhād bhayād vā saṃghātam upāgataṃ vijigīṣor bhītaṃ rājya.pratisambaddhaṃ mitraṃ cala.amitraṃ vā pūrvān uttara.abhāve sādhayet - utsāhayitāram ātma.nisargeṇa, sthira.karmāṇaṃ sāntva.praṇipātena, anurakta.prakṛtiṃ kanyā.dāna.yāpanābhyām, lubdham aṃśa.dvaiguṇyena,
bhītam ebhyaḥ kośa.daṇḍa.anugraheṇa, svato bhītaṃ viśvāsya pratibhū.pradānena, rājya.pratisambaddham ekī.bhāva.upagamanena, mitram ubhayataḥ priya.hitābhyām, upakāra.tyāgena vā, cala.amitram avadhṛtam anapakāra.upakārābhyām
//

yo vā yathā^ayogaṃ bhajeta taṃ tathā sādhayet, sāma.dāna.bheda.daṇḍair vā yathā^āpatsu vyākhyāsyāmaḥ //

vyasana.upaghāta.tvarito vā kośa.daṇḍābhyāṃ deśe kāle kārye vā^avadhṛtaṃ saṃdhim upeyāt //

kṛta.saṃdhir hīnam ātmānaṃ pratikurvīta //

pakṣe hīno bandhu.mitra.pakṣaṃ kurvīta, durgam aviṣahyaṃ vā //

durga.mitra.pratiṣṭabdho hi sveṣāṃ pareṣāṃ ca pūjyo bhavati //

mantra.śakti.hīnaḥ prājña.puruṣa.upacayaṃ vidyā.vṛddha.samyogaṃ vā kurvīta //

tathā hi sadyaḥ śreyaḥ prāpnoti //

prabhāva.hīnaḥ prakṛti.yoga.kṣema.siddhau yateta //

jana.padaḥ sarva.karmaṇāṃ yoniḥ, tataḥ prabhāvaḥ //

tasya sthānam ātmanaś ca^āpadi durgam //

setu.bandhaḥ sasyānāṃ yoniḥ //

nitya.anuṣakto hi varṣa.guṇa.lābhaḥ setu.vāpeṣu //

vaṇik.pathaḥ para.atisaṃdhānasya yoniḥ //

vaṇik.pathena hi daṇḍa.gūḍha.puruṣa.atinayanaṃ śastra.āvaraṇa.yāna.vāhana.krayaś ca kriyate, praveśo nirṇayanaṃ ca //

khaniḥ saṃgrāma.upakaraṇānāṃ yoniḥ, dravya.vanaṃ durga.karmaṇāṃ yāna.rathayoś ca, hasti.vanaṃ hastinām, gava.aśva.khara.uṣṭrāṇāṃ ca vrajaḥ //

teṣām alābhe bandhu.mitra.kulebhyaḥ samārjanam //

utsāha.hīnaḥ śreṇī.pravīra.puruṣāṇāṃ cora.gaṇa.āṭavika.mleccha.jātīnāṃ para.apakāriṇāṃ gūḍha.puruṣāṇāṃ ca yathā.lābbham upacayaṃ kurvīta //

para.miśra.apratīkāram ābalīyasaṃ vā pareṣu prayuñjīta //
KAZ07.14.29ab/ evaṃ pakṣeṇa mantreṇa dravyeṇa ca balena ca /
KAZ07.14.29cd/ sampannaḥ pratinirgacchet para.avagraham ātmanaḥ //E
(vigṛhya.uparodha.hetavah - daṇḍa.upanata.vṛttam)