Arthashastra · Chapter 07.11

"tvaṃ ca^ahaṃ ca śūnyaṃ niveśayāvahe" ity anavasita.saṃdhiḥ //

tayor yaḥ pratyupasthita.artho yathā.ukta.guṇāṃ bhūmiṃ niveśayati so^atisaṃdhatte //

tatra^api sthalam audakaṃ vā^iti mahataḥ sthalād alpam audakaṃ śreyaḥ, sātatyād avasthitatvāc ca phalānām //

sthalayor api prabhūta.pūrva.apara.sasyam alpa.varṣa.pākam asakta.ārambhaṃ śreyaḥ //

audakayor api dhānya.vāpam adhānya.vāpāt^śreyaḥ //

tayor alpa.bahutve dhānya.kāntād alpān mahad adhānya.kāntaṃ śreyaḥ //

mahaty avakāśe hi sthālyāś ca^anūpyāś ca^oṣadhayo bhavanti //

durga.ādīni ca karmāṇi prabhūtyena kriyante //

kṛtrimā hi bhūmi.guṇāḥ //

khani.dhānya.bhogayoḥ khani.bhogaḥ kośa.karaḥ, dhānya.bhogaḥ kośa.koṣṭha.agāra.karaḥ //

dhānya.mūlā hi durga.ādīnāṃ karmaṇām ārambhāḥ //

mahā.viṣaya.vikrayo vā khani.bhogaḥ śreyān //

"dravya.hasti.vana.bhogayor dravya.vana.bhogaḥ sarva.karmaṇāṃ yoniḥ prabhūta.nidhāna.kṣamaś ca, viparīto hasti.vana.bhogaḥ" ity ācāryāḥ //

na^iti kauṭilyaḥ //

śakyaṃ dravya.vanam anekam anekasyāṃ bhūmau vāpayitum, na hasti.vanam //

hasti.pradhāno hi para.anīka.vadha iti //

vāri.sthala.patha.bhogayor anityo vāri.patha.bhogaḥ, nityaḥ sthala.patha.bhogaḥ //

bhinna.manuṣyā śreṇī.manuṣyā vā bhūmir iti bhinna.manuṣyā śreyasī //

bhinna.manuṣyā bhogyā bhavati, anupajāpyā ca^anyeṣām, anāpat.sahā tu //

viparītā śreṇī.manuṣyā, kope mahā.doṣā //

tasyāṃ cāturvarṇya.niveśe sarva.bhoga.sahatvād avara.varṇa.prāyā śreyasī, bāhulyād dhruvatvāc ca kṛṣyāḥ karṣakavatī, kṛṣyāś ca^anyeṣāṃ ca^ārambhāṇāṃ prayojakatvāt go.rakṣakavatī, paṇya.nicaya.ṛṇa.anugrahād āḍhya.vaṇigvatī //

bhūmi.guṇānām apāśrayaḥ śreyān //

durga.apāśrayā puruṣa.apāśrayā vā bhūmir iti puruṣa.apāśrayā śreyasī //

puruṣavad dhi rājyam //

apuruṣā gaur vandhy eva kiṃ duhīta //

mahā.kṣaya.vyaya.niveśāṃ tu bhūmim avāptu.kāmaḥ pūrvam eva kretāraṃ paṇeta durbalam arāja.bījinaṃ nirutsāham apakṣam anyāya.vṛttiṃ vyasaninaṃ daiva.pramāṇaṃ yat.kiṃcana.kāriṇaṃ vā //

mahā.kṣaya.vyaya.niveśāyāṃ hi bhūmau durbalo rāja.bījī niviṣṭaḥ sagandhābhiḥ prakṛtibhiḥ saha kṣaya.vyayena^avasīdati //

balavān arāja.bījī kṣaya.vyaya.bhayād asagandhābhiḥ prakṛtibhis tyajyate //

nirutsāhas tu daṇḍavān api daṇḍasya^apraṇetā sadaṇḍaḥ kṣaya.vyayena^avabhajyate //

kośavān apy apakṣaḥ kṣaya.vyaya.anugraha.hīnatvān na kutaścit prāpnoti //

anyāya.vṛttir niviṣṭam apy utthāpayet //

sa katham aniviṣṭaṃ niveśayet //

tena vyasanī vyākhyātaḥ //

daiva.pramāṇo mānuṣa.hīno nirārambho vipanna.karma.ārambho vā^avasīdati //

yat.kiṃcana.kārī na kiṃcid āsādayati //

sa ca^eṣāṃ pāpiṣṭhatamo bhavati //

"yat.kiṃcid.ārabhamāṇo hi vijigīṣoḥ kadācic chidram āsādayed" ity ācāryāḥ //

yathā chidraṃ tathā vināśam apy āsādayed iti kauṭilyaḥ //

teṣām alābhe yathā pārṣṇi.grāha.upagrahe vakṣyāmas tathā bhūmim avasthāpayet //

ity abhihita.saṃdhiḥ //

guṇavatīm ādeyāṃ vā bhūmiṃ balavatā krayeṇa yācitaḥ saṃdhim avasthāpya dadyāt //

ity anibhṛta.saṃdhiḥ //

samena vā yācitaḥ kāraṇam avekṣya dadyāt "pratyādeyā me bhūmir vaśyā vā, anayā pratibaddhaḥ paro me vaśyo bhaviṣyati^ bhūmi.vikrayād vā mitra.hiraṇya.lābhaḥ kārya.sāmarthya.karo me bhaviṣyati" iti //

tena hīnaḥ kretā vyākhyātaḥ //
KAZ07.11.45ab/ evaṃ mitraṃ hiraṇyaṃ ca sajanām ajanāṃ ca gām /
KAZ07.11.45cd/ labhamāno^atisaṃdhatte śāstravit sāmavāyikān //E
(mitra.hiraṇya.bhūmi.karma.samdhayah, tatra karma.samdhih)