Arthashastra · Chapter 07.10

"tvaṃ ca^ahaṃ ca bhūmiṃ labhāvahe" iti bhūmi.saṃdhiḥ //

tayor yaḥ pratyupasthita.arthaḥ sampannāṃ bhūmim avāpnoti so^atisaṃdhatte //

tulye sampanna.alābhe yo balavantam ākramya bhūmim avāpnoti so^atisaṃdhatte //

bhūmi.lābhaṃ śatru.karśanaṃ pratāpaṃ ca hi prāpnoti //

durbalād.bhūmi.lābhe satyaṃ saukaryaṃ bhavati //

durbala eva ca bhūmi.lābhaḥ, tat.sāmantaś ca mitram amitra.bhāvaṃ gacchati //

tulye balīyastve yaḥ sthita.śatrum utpāṭya bhūmim avāpnoti so^atisaṃdhatte //

durga.avāptir hi sva.bhūmi.rakṣaṇam amitra.aṭavī.pratiṣedhaṃ ca karoti //

cala.amitrād.bhūmi.lābhe śakya.sāmantato viśeṣaḥ //

durbala.sāmantā hi kṣipra.āpyāyana.yoga.kṣemā bhavati //

viparītā balavat sāmantā kośa.daṇḍa.avacchedanī ca bhūmir bhavati //

sampannā nitya.amitrā manda.guṇā vā bhūmir anitya.amitrā^iti "sampannā nitya.amitrā śreyasī bhūmiḥ sampannā hi kośa.daṇḍau sampādayati, tau ca^amitra.pratighātakau ity ācāryāḥ //

na^iti kauṭilyaḥ //

nitya.amitra.alābhe bhūyān śatru.lābho bhavati //

nityaś ca śatrur upakṛte ca^apakṛte ca śatrur eva bhavati, anityas tu śatrur upakārād anapakārād vā śāmyati //

yasyā hi bhūmer bahu.durgāś cora.gaṇair mleccha.aṭavībhir vā nitya.avirahitāḥ pratyantāḥ sā nitya.amitrā, viparyaye tv anitya.amitrā //

alpā pratyāsannā mahatī vyavahitā vā bhūmir iti alpā pratyāsannā śreyasī //

sukhā hi prāptuṃ pālayitum abhisārayituṃ ca bhavati //

viparītā vyavahitā //

vyavahitayor api daṇḍa.dhāraṇā^ātma.dhāraṇā vā bhūmir iti ātma.dhāraṇā śreyasī //

sā hi sva.samutthābhyāṃ kośa.daṇḍābhyāṃ dhāryate //

viparītā daṇḍa.dhāraṇā daṇḍa.sthānam //

bāliśāt prājñād vā bhūmi.lābha iti bāliśād.bhūmi.lābhaḥ śreyān //

suprāpyā^anupālyā hi bhavati, apratyādeyā ca //

viparītā prājñād anuraktā //

pīḍanīya.ucchedanīyayor ucchedanīyād bhūmi.lābhaḥ śreyān //

ucchedanīyo hy anapāśrayo durbala.apāśrayo vā^abhiyuktaḥ kośa.daṇḍāv ādāya^apasartu.kāmaḥ prakṛtibhis tyajyate, na pīḍanīyo durga.mitra.pratiṣṭabdhaḥ //

durga.pratiṣṭabdhayor api sthala.nadī.durgīyābhyāṃ sthala.durgīyād bhūmi.lābhaḥ śreyān //

sthāleyaṃ hi surodha.avamarda.avaskandam anihśrāvi.śatru ca //

nadī.durgaṃ tu dvi.guṇa.kleśa.karam, udakaṃ ca pātavyaṃ vṛtti.karaṃ ca^amitrasya //

nadī.parvata.durgīyābhyāṃ nadī.durgīyād bbhūmi.lābhaḥ śreyān //

nadī.durgaṃ hi hasti.stambha.saṃkrama.setu.bandha.naubhiḥ sādhyam anitya.gāmbhīryam avasrāvy udakaṃ ca //

pārvataṃ tu sv.ārakṣaṃ duruparodhi kṛcchra.ārohaṇam, bhagne ca^ekasmin na sarva.vadhaḥ, śilā.vṛkṣa.pramokṣaś ca mahā.apakāriṇām //

nimna.sthala.yodhibhyo nimna.yodhibhyo bhūmi.lābhaḥ śreyān //

nimna.yodhino hy uparuddha.deśa.kālāḥ, sthala.yodhinas tu sarva.deśa.kāla.yodhinaḥ //

khanaka.ākāśa.yodhibhyaḥ khanakebhyo bhūmi.lābhaḥ śreyān //

khanakā hi khātena śastreṇa ca^ubhayathā yudhyante, śastreṇa^eva^ākāśa.yodhinaḥ //
KAZ07.10.38ab/ evaṃ.vidhyebhyaḥ pṛthivīṃ labhamāno^artha.śāstravit /
KAZ07.10.38cd/ saṃhitebhyaḥ parebhyaś ca viśeṣam adhigacchati //E
(mitra.hiraṇya.bhūmi.karma.samdhayah - tatra anavasita.samdhih)