Arthashastra · Chapter 04.13

brāhmaṇam apeyam abhakṣyaṃ vā grāsayata uttamo daṇḍaḥ, kṣatriyaṃ madhyamaḥ, vaiśyaṃ pūrvaḥ sāhasa.daṇḍaḥ, śūdraṃ catuṣ.pañcāśat.paṇo daṇḍaḥ //

svayaṃ grasitāro nirviṣayāḥ kāryāḥ //

para.gṛha.abhigamane divā pūrvaḥ sāhasa.daṇḍaḥ, rātrau madhyamaḥ //

divā rātrau vā saśastrasya praviśata uttamo daṇḍaḥ //

bhikṣuka.vaidehakau matta.unmattau balād āpadi ca^atisaṃnikṛṣṭāḥ pravṛtta.praveśāś ca^adaṇḍyāḥ, anyatra pratiṣedhāt //

sva.veśmano virātrād ūrdhvaṃ parivāram ārohataḥ pūrvaḥ sāhasa.daṇḍaḥ, para.veśmano madhyamaḥ, grāma.ārāma.vāṭa.bhedinaś ca //

grāmeṣv antaḥ sārthikā jñāta.sārā vaseyuḥ //

muṣitaṃ pravāsitaṃ ca^eṣām anirgataṃ rātrau grāma.svāmī dadyāt //

grāma.antareṣu vā muṣitaṃ pravāsitaṃ vivīta.adhyakṣo dadyāt //

avivītānāṃ cora.rajjukaḥ //

tathā^apy aguptānāṃ sīma.avarodhena vicayaṃ dadyuḥ //

asīma.avarodhe pañca.grāmī daśa.grāmī vā //

durbalaṃ veśma śakaṭam anuttabdham ūrdha.staṃbhaṃ śastram anapāśrayam apraticchannaṃ śvabhraṃ kūpaṃ kūṭa.avapātaṃ vā kṛtvā hiṃsāyāṃ daṇḍa.pāruṣyaṃ vidyāt //

vṛkṣac.chedane daṃya.raśmi.haraṇe catuṣpadānām adānta.sevane vāhane vā kāṣṭha.loṣṭa.pāṣāṇa.daṇḍa.bāṇa.bāhu.vikṣepaṇeṣu yāne hastinā ca smaghaṭṭane "apehi" iti prakośann adaṇḍyaḥ //

hastinā roṣitena hato droṇa.annaṃ madya.kuṃbhaṃ mālya.anulepanaṃ danta.pramārjanaṃ ca paṭaṃ dadyāt //

aśva.medha.avabhṛtha.snānena tulyo hastinā vadha iti pāda.prakṣālanam //

udāsīna.vadhe yātur uttamo daṇḍaḥ //

śṛṅgiṇā daṃṣṭriṇā vā hiṃsyamānam amokṣayataḥ svāminaḥ pūrvaḥ sāhasa.daṇḍaḥ, pratikruṣṭasya dvi.guṇaḥ //

śṛṅgi.daṃṣṭribhyām anyonyaṃ ghātayatas tac ca tāvac ca daṇḍaḥ //

deva.paśum ṛṣabham ukṣāṇaṃ go.kumārīṃ vā vāhayataḥ pañca.śato daṇḍaḥ, pravāsayata uttamaḥ //

loma.doha.vāhana.prajanana.upakāriṇāṃ kṣudra.paśūnām adāne tac ca tāvac ca daṇḍaḥ, pravāsane ca, anyatra deva.pitṛ.kāryebhyaḥ //

chinna.nasyaṃ bhagna.yugaṃ tiryak.pratimukha.āgataṃ pratyāsarad vā cakra.yuktaṃ yātā paśu.manuṣya.saṃbādhe vā hiṃsāyām adaṇḍyaḥ //

anyathā yathā.uktaṃ mānuṣa.prāṇi.hiṃsāyāṃ daṇḍam abhyāvahet //

amānuṣa.prāṇi.vadhe prāṇi.dānaṃ ca //

bāle yātari yānasthaḥ svāmī daṇḍyaḥ, asvāmini yānasthaḥ, prāpta.vyavahāro vā yātā //

bāla.adhiṣṭhitam apuruṣaṃ vā yānaṃ rājā haret //

kṛtya.abhicārābhyāṃ yat.param āpādayet tad.āpādayitavyaḥ //

kāmaṃ bhāryāyām anicchantyāṃ kanyāyāṃ vā dāra.arthino bhartari bhāryāyā vā saṃvadana.karaṇam //

anyathā.hiṃsāyāṃ madhyamaḥ sāhasa.daṇḍaḥ //

mātā.pitror bhaginīṃ mātulānīm ācāryāṇīṃ snuṣāṃ duhitaraṃ bhaginīṃ vā^adhicaratas tri.liṅgac.chedanaṃ vadhaś ca //

sakāmā tad eva labheta, dāsa.paricāraka.āhitaka.bhuktā ca //

brāhmaṇyām aguptāyāṃ kṣatriyasya^uttamaḥ, sarva.svaṃ vaiśyasya, śūdraḥ kaṭa.agninā dahyeta //

sarvatra rāja.bhāryā.gamane kuṃbhī.pākaḥ //

śva.pākī.gamane kṛta.kabandha.aṅkaḥ para.viṣayaṃ gacchet, śva.pākatvaṃ vā śūdraḥ //

śva.pākasya^āryā.gamane vadhaḥ, striyāḥ karṇa.nāsa.ācchedanam //

pravrajitā.gamane catur.viṃśati.paṇo daṇḍaḥ //

sakāmā tad eva labheta //

rūpa.ājīvāyāḥ prasahya.upabhoge dvādaśa.paṇo daṇḍaḥ //

bahūnām ekām adhicaratāṃ pṛthak catur.viṃśati.paṇo daṇḍaḥ //

striyam ayonau gacchataḥ pūrvaḥ sāhasa.daṇḍaḥ, puruṣam adhimehataś ca //
KAZ04.13.41ab/ maithune dvādaśa.paṇas tiryag.yoniṣv anātmanaḥ /
KAZ04.13.41cd/ daivata.pratimānāṃ ca gamane dvi.guṇaḥ smṛtaḥ //
KAZ04.13.42ab/ adaṇḍya.daṇḍane rājño daṇḍas triṃśad.guṇo^aṃbhasi /
KAZ04.13.42cd/ varuṇāya pradātavyo brāhmaṇebhyas tataḥ param //
KAZ04.13.43ab/ tena tat pūyate pāpaṃ rājño daṇḍa.apacārajam /
KAZ04.13.43cd/ śāstā hi varuṇo rājñāṃ mithyā vyācaratāṃ nṛṣu //E
(Infliction of secret punishment)