Scripture Library

Ānandakanda · Chapter 2.3

2.3.1

Āk, 2, 3
śrībhairavaḥ /
<silver:: synonyms>
raupyaṃ śubhraṃ vasuśreṣṭhaṃ ruciraṃ candralohakam /
rajataṃ taptarūpyaṃ ca candrabhūtistu raupyakam

2.3.2

kaladhautaṃ ca saudhaṃ ca candrahāsaṃ ca tārakam /
<rajatabhedāḥ>
sahajaṃ khanisaṃjātaṃ kṛtrimaṃ ca tridhā matam

2.3.3

rajataṃ pūrvapūrvaṃ hi svaguṇairuttarottaram /
kailāsādyadrisambhūtaṃ sahajaṃ rajataṃ bhavet

2.3.4

tatspṛṣṭaṃ hi mahāvyādhināśanaṃ dehināṃ bhavet /
himācalādikūṭeṣu yadrūpyaṃ jāyate hi tat

2.3.5

khanijaṃ kathyate tajjñaiḥ paramaṃ hi rasāyanam /
śrīrāmapādukānyastaṃ vaṅgaṃ yadrūpyatāṃ gatam

2.3.6

tatpādarūpyamityuktaṃ kṛtrimaṃ sarvaroganut /
<grāhyāgrāhyarajatasvarūpam>
ghanaṃ snigdhaṃ guru snigdhaṃ dāhe chede sitaṃ mṛdu

2.3.7

varṇāḍhyaṃ candravatsvacchaṃ dāhe chede samaprabham /
śaṅkhābhaṃ masṛṇaṃ sphoṭarahitaṃ rajataṃ śubham

2.3.8

dāhe raktaṃ ca pītaṃ ca kṛṣṇaṃ rūkṣaṃ sphuṭaṃ laghu /
sthūlāṅgaṃ karkaśāṅgaṃ ca rajataṃ tyājyamaṣṭadhā

2.3.9

kaṭhinaṃ kṛtrimaṃ rūkṣaṃ vivarṇaṃ samalaṃ dalam /
dāhe chede ghane naṣṭaṃ madhyamaṃ rajataṃ matam

2.3.10

karoti tāpaṃ viḍbhedaṃ kṣayaṃ śuklabalāyuṣām /
na śuddhaṃ na mṛtaṃ tāraṃ tasmācchuddhaṃ ca mārayet

2.3.11

<rajataśuddhi>
nāgena ṭaṅkaṇenaiva drāvitaṃ śuddhimṛcchati /
tāraṃ trivāraṃ nikṣiptaṃ taile jyotiṣmatībhave

2.3.12

taptaṃ taptaṃ tārapatraṃ secayecchuddhim āpnuyāt /
piśācasaṃbhave yadvā prakṣiptaṃ śuddhimāpnuyāt

2.3.13

rajataṃ doṣanirmuktaṃ nāgottīrṇaṃ samāharet /
śvetakumbhodbhave nīre ḍhālayetsaptavārakān

2.3.14

<rajatabhasma (1, 2, 3)>
kuraṇḍamunipuṣpotthasalilaiḥ saṃpramardayet /
tārapatrāṇi liptāni puṭayecca vanotpalaiḥ

2.3.15

mriyate nātra sandehaḥ liptaṃ vā rasabhasmanā /
amlavargapraliptena pūrvavatpuṭayogataḥ

2.3.16

mriyate tālakaṃ sūtaṃ vaṅgamamlena peṣayet /
tārapatrāṇi saṃlipya puṭitvā bhasmatāṃ nayet

2.3.17

mriyate gandhayogādyair vaiṣṇavena vipadyate /
<rajatabhasma (4)>
snuhīkṣīraiḥ pacettāpyaṃ tārapatrāṇi lepayet

2.3.18

ruddhvā gajapuṭe paktvā pūrvoktaiḥ pācayetpunaḥ /
catvāriṃśatpuṭairevaṃ pacettāraṃ mṛtaṃ bhavet

2.3.19

<rajatabhasma (5)>
bhūdhātrīṃ mākṣikaṃ tulyaṃ pippalīṃ saindhavāmlakaiḥ /
liptvā tārasya patrāṇi ruddhvā saptapuṭaiḥ pacet

2.3.20

dravaiḥ punaḥ punaḥ piṣṭvā mriyate nātra saṃśayaḥ /
<rajatabhasma (6)>
likucadravasūtābhyāṃ tārapiṣṭīṃ prakalpayet

2.3.21

ruddhvādho gandhakaṃ dattvā mūṣāgarbhe nirudhya ca /
svedayed vālukāyantre dinamekaṃ dṛḍhāgninā

2.3.22

svāṅgaśītalatāṃ piṣṭiṃ sāmlatālena marditam /
puṭeddvādaśavārāṇi bhasmībhavati rūpyakam

2.3.23

<rajatabhasma (7)>
mākṣikaṃ cūrṇaluṅgāmlamarditaṃ puṭitaṃ śanaiḥ /
triṃśadvāreṇa tattāraṃ nirutthaṃ bhasma jāyate

2.3.24

rāgaḥ syāt sarvalohānāṃ puṭādhikye na saṃśayaḥ /
<rajatabhasma (8)>
tārapattraṃ caturbhāgā bhāgaikaṃ śuddhatālakam

2.3.25

mardyaṃ jambīrajairdrāvaistārapatrāṇi lepayet /
śoṣayedandhayettaṃ ca triṃśadvanotpalaiḥ puṭet

2.3.26

caturdaśapuṭairevaṃ nirutthaṃ mriyate dhruvam /
<rajatabhasma (9)>
raupyapatraṃ caturbhāgā bhāgaikaṃ mṛtavaṅgakam

2.3.27

athavā gandhabhāgaikaṃ lepyaṃ jambīrapeṣitaiḥ /
ruddhvā tribhiḥ puṭaiḥ pācyaṃ pañcaviṃśadvanotpalaiḥ

2.3.28

mriyate nātra sandeho gandho deyaḥ punaḥ punaḥ /
<rajatabhasma (10)>
rasagandhau samaṃ kṛtvā kākatuṇḍasya mūlakam

2.3.29

mardayenmahiṣīkṣīraiḥ piṣṭiṃ tāṃ kṣālayejjalaiḥ /
haridrāgolake kṣiptvā golaṃ hayapurīṣake

2.3.30

kṣiptvā dinaikaviṃśacca tadgarbhād uddharetpunaḥ /
tatpiṣṭvā tārapatrāṇi lepyamamlena kenacit

2.3.31

puṭair viṃśatibhir bhasma jāyate nātra saṃśayaḥ /
bhasmanā hyamlapiṣṭena limpettāmramayaṃ kṣuram

2.3.32

jāyate taṃ mṛtaṃ vidyādbhasma hāṭakatārayoḥ /
<rajatasya guṇāḥ>
raupyaṃ snigdhaṃ kaṣāyāmlaṃ vipāke madhuraṃ rasam

2.3.33

vayasaḥ sthāpanaṃ śītaṃ lekhanaṃ vātapittajit /
vṛṣyaṃ rucikaraṃ balyaṃ jaṭharāgnipradīpanam

Original text: Ānandakanda · Edition: S.V. Radhakrishna Sastri, Srirangam: Sri Vilasam Press, 1952. · Data entry Oliver Hellwig · GRETIL (Göttingen) · CC BY-NC-SA 4.0