Ānandakanda · Chapter 2.4

Āk, 2, 4
śrībhairavaḥ /
<tāmra>
tāmraṃ mlecchamukhaṃ śulbaṃ tapaneṣṭamudumbaram /
tryambakaṃ cāravindaṃ ca ravilohaṃ ravipriyam

raktaṃ naipālakaṃ caiva raktadhātuḥ karendudhā /
mlecchaṃ nepālakaṃ ceti tayornepālamuttamam

nepālād anyakhanyutthaṃ mlecchamityabhidhīyate /
susnigdhaṃ mṛdulaṃ śoṇaṃ ghanaghātakṣayaṃ guru

nirvikāraṃ guru śreṣṭhaṃ tāmraṃ nepālamucyate /
sitakṛṣṇāruṇacchāyaṃ vāmabhedi kaṭhorakam

kṣālitaṃ ca punaḥ kṛṣṇam etanmlecchakatāmrakam /
pāṇḍuraṃ kṛṣṇaśoṇaṃ ca laghu sphuṭanasaṃyutam

rūkṣāṅgaṃ sadalaṃ tāmraṃ neṣyate rasakarmaṇi /
utkledamohabhramadāhabhedāḥ tāmrasya doṣāḥ khalu durdharāste /
viśodhanāt tadvigatasvadoṣaṃ sudhāsamaṃ syādrasavīryapāke

vāntimūrcchābhramonmādanānārukkuṣṭhaśūlakṛt

āyuḥkāntibalabhraṃśakaraṃ dhātupradūṣaṇam /
nu śuddhaṃ na mṛtaṃ tāmraṃ tena saṃśodhya mārayet

<tāmraśuddhi>
tāmraṃ kṣārāmlasaṃyuktaṃ drāvitaṃ taptagairikam /
nikṣiptaṃ mahiṣītakrachagaṇe saptavārakam

pañcadoṣavinirmuktaṃ saptavāreṇa jāyate /
tāmranirdalapattrāṇi liptvā nimbavasindhunā

dhmātvā sauvīrake kṣepādviśudhyatyaṣṭavārataḥ /
nimbvambupaṭuliptāni tāpitānyaṣṭavārakam

viśudhyantyarkapatrāṇi nirguṇḍīrasamardanāt /
kumārīpatramadhye tu śulvapatraṃ niveśitam

puṭitaṃ doṣanirmuktaṃ pāṇḍuraṃ ca prajāyate /
itthaṃ viśodhitaṃ tāmraṃ sarvadoṣavivarjitam

bhavedrasāyanakaraṃ dehalohakaraṃ param /
imāṃ śuddhiṃ vijānīyācchivo vā nandikeśvaraḥ

balinā nihataṃ tāmraṃ saptavāraṃ samutthitam /
sarvadoṣavinirmuktaṃ bhavedamṛtasannibham

snuhyarkakṣīralavaṇakāñjikais tāmrapatrakam /
liptvā pratāpya nirguṇḍīrasaiḥ siñcyāt punaḥ punaḥ

vārān dvādaśataḥ śuddhaṃ lepāttāpācca secanāt /
khaṭikāṃ lavaṇaṃ takrairāranālaiśca peṣayet

tena liptaṃ tāmrapatraṃ taptaṃ taptaṃ niṣecayet /
ṣaḍvāram amlatakrāntar nirguṇḍyāśca viśuddhaye

taptāni tāmrapatrāṇi secayettiktakārasaiḥ /
liptvāmlatakralavaṇakāñjikena punaḥ punaḥ

taptaṃ taptaṃ tridhā siñcyācchuddhimāyāti niścayam /
gomūtreṇa pacedyāmaṃ tāmrapātraṃ dṛḍhāgninā

śudhyate nātra sandeho māraṇaṃ cāpyathocyate /
<tāmrabhasma (1)>
gandhena tāmratulyena hyamlapiṣṭena lepayet

kaṇṭavedhīkṛtaṃ patramandhayitvā puṭe pacet /
uddhṛtya cūrṇayettasminpādāṃśaṃ gandhakaṃ kṣipet

jambīrair āranālair vā mṛgadūrvāthavā dravaiḥ /
piṣṭvā piṣṭvā pacedruddhaṃ sagandhaṃ ca catuṣpuṭaiḥ

mātuluṅgadravaiḥ piṣṭvā puṭamekaṃ pradāpayet /
sitaśarkarayāpyekaṃ puṭaṃ deyaṃ mṛtaṃ bhavet

<tāmrabhasma (2)>
pāṣāṇabhedimatsyākṣīdravair dviguṇagandhakam /
tāmrasya lepayet piṣṭiṃ ruddhvā gajapuṭe pacet

samāṃśena punargandhaṃ dattvā drāvaiśca lolayet /
evaṃ saptapuṭaiḥ pakvaṃ tāmrabhasma bhaved dhruvam

<tāmrabhasma (3)>
tāmrasya triguṇaṃ sūtaṃ jambīrāmlena mardayet /
ādau mūṣāntare kṣiptvā dhuttūrasya tu patrakam

tatpṛṣṭhe tāmratulyaṃ ca gandhakaṃ cūrṇitaṃ kṣipet /
tatpṛṣṭhe marditaṃ tāmraṃ pūrvatulyaṃ ca gandhakam

ācchādya dhūrtapatraistu ruddhvā gajapuṭe pacet /
svāṅgaśītaṃ tataścūrṇaṃ mṛtaṃ bhavati niścitam

<tāmrabhasma (4)>
kiṃcidgandhena vāmlena kṣālayettāmrapatrakam /
tāmrapādena sūtena sārdraṃ patraṃ pralepayet

tāmradviguṇagandhena cāmlapiṣṭena tatpunaḥ /
liptvā hyadhordhvagaṃ deyā supiṣṭā cāmlaparṇikā

tatpiṇḍaṃ bhāṇḍagarbhe tu ruddhvā cullyāṃ vipācayet /
yāmaikaṃ tāmrapākena bhasmībhavati niścitam

<tāmrabhasma (5)>
sūtamekaṃ dvidhā gandhaṃ yāmaṃ kanyā vimardayet /
dvayos tulye tāmrapatre sthālyā garbhe nirodhayet

samyaṅmṛllavaṇaiḥ sandhiṃ pārśve bhasma nidhāpayet /
caturyāmaṃ paceccullyāṃ pātrapṛṣṭhe sagomayam

jalaṃ punaḥ punardeyaṃ svāṅgaśītaṃ vicūrṇayet /
mriyate nātra sandehaḥ sarvayogeṣu yojayet

<tāmrabhasma (6)>
jīrṇaṃ tāmraṃ samādāya tatra caitānvinikṣipet /
vaṅgaṃ ghoṣaṃ gajaṃ tīkṣṇasāraṃ kāntaṃ ca ṣaṭ samān

pratyekaṃ tāmramānena sarvānekatra dhāmayet /
vaṅkanālena tāvattadyāvadarko'vaśiṣyate

tamarkaṃ ḍhālayetpūrvaṃ nirguṇḍīsalilāntare /
saptavārāṃśca tanmūlacūrṇamarke pravāpayet

tena tāmreṇa kurvīta vaṭikāmavraṇāṃ śubhām /
dviguṇaṃ gandhakaṃ liptvā balestryaṃśaṃ ca pāradam

śuddhaṃ hiṅgulajaṃ vāpi mardayedbījapūrakaiḥ /
jambīrajairvā likucanīraiḥ samyak pramardayet

tridinaṃ tadviśoṣyātha bhāṇḍāntastanniveśayet /
upariṣṭāttāmraghaṭīm adhovaktrāṃ nidhāya ca

dṛḍhaṃ vilepayetpaścāt kaṭorīṃ mṛṇmayīṃ kṣipet /
atiprayatnāllimpet tāṃ yathā vārā na bhidyate

adhiculli tato dattvā pūrayitvā jalairadhaḥ /
prajvālayedvītihotraṃ mṛdumadhyottamakramāt

dināni ṣaṭ samādāya svāṅgaśītaṃ tu pātrakam /
nirbhidya śulvaṃ gṛhṇīta mṛtaṃ sūtena yatnataḥ

tataḥ khalve vicūrṇyaitad yatheṣṭaṃ viniyojayet /
<tāmrabhasmaśuddhiḥ>
nānāvidhaṃ mṛtaṃ tāmraṃ śuddhyarthaṃ bhāgapañcakam

bhāgaikaṃ śvetakācaṃ ca bhāgaṃ śvetaṃ ca ṭaṅkaṇam /
mūṣāyāṃ miśritaṃ kṣiptvā bhāgaikaṃ cābhrapatrakam

ūrdhvaṃ dattvā nirudhyātha dhmāte grāhyaṃ suśītalam /
nirdoṣaṃ tu bhavettāmraṃ sarvarogaharaṃ bhavet

athavā māritaṃ tāmram amlenaikena mardayet /
tadgolaṃ sūraṇasyāntaḥ ruddhvā sarvatra lepayet

śuṣkaṃ gajapuṭe pacyātsarvadoṣaharaṃ bhavet /
vāntiṃ bhrāntiṃ virekaṃ ca na karoti kadācana

<tāmrabhasma (7)>
vilipya likucadrāvapiṣṭagandhāśmapaṅkataḥ /
tāmrapatrāṇi saṃchādya sthālīmadhye nirudhya ca

yāmamātraṃ pacetsamyak śītānyākṛṣya cūrṇayet /
tadbhasma vallamātraṃ hi tāmbūlīdalaveṣṭitam

bhakṣitaṃ vāmayitvātha recayitvā dviyāmataḥ /
jvaraṃ vināśayennḥṇāṃ śūlādhmānasamanvitam

viṣaṃ garaṃ ca vegena vāmayatyeva niścitam /
pathyamatra pradātavyaṃ gavyaṃ takraṃ ca bhaktakam

atireke'tivāntau ca samohe cātimātrake /
tattadaucityayogena kuryācchītāṃ pratikriyām

ativāntau bhajed bhraṣṭam ikṣudaṇḍaṃ suśītalam /
yadvā bilvabhavaṃ kvāthaṃ sitayā saha pācayet

barbūratvagrasaḥ peyo vireke takrasaṃyutaḥ /
<tāmrabhasma (8)>
śulbatulyena sūtena balinā tatsamena ca

tadardhāṃśena tālena śilayā ca tadardhayā /
vidhāya kajjalīṃ ślakṣṇāṃ bhinnakajjalasannibhām

yantrādhyāyavinirdiṣṭagarbhayantrodarāntare /
kajjalīṃ tāmrapatrāṇi paryāyeṇa vinikṣipet

prapacedyāmaparyantaṃ svāṅgaśītaṃ vicūrṇayet /
tattadrogaharānupānasahitaṃ tāmraṃ dvivallonmitaṃ sallīḍhaṃ pariṇāmaśūlamudaraṃ śūlaṃ ca pāṇḍujvaram /
gulmaplīhayakṛtkṣayāgnisadanaṃ mehaṃ ca mūlāmayaṃ duṣṭāṃ ca grahaṇīṃ hareddhruvamidaṃ sarvāmayadhvaṃsanam

tāmraṃ tiktakaṣāyakaṃ ca madhuraṃ pāke'tha vīryoṣṇakaṃ koṣṇaṃ pittakaphāpahaṃ jaṭhararukkuṣṭhāmajūrtyantakṛt /
ūrdhvādhaḥpariśodhanaṃ ca viṣahṛtsthaulyāpahaṃ kṣutkaraṃ durnāmakṣayapāṇḍurogaśamanaṃ netryaṃ paraṃ lekhanam