Scripture Library

Ānandakanda · Chapter 2.2

2.2.1

Āk, 2, 2
śrībhairavaḥ /
svarṇādisarvalohānāmutpattyādikramaṃ bruve /
<gold:: synonyms>
svarṇaṃ suvarṇakanakojjvalakāñcanāni kalyāṇahāṭakahiraṇyamanoharāṇi /
gāṅgeyagairikamahārajatāgnivīryarukmāni hematapanīyakabhāsvarāṇi

2.2.2

jāmbūnadāṣṭāpadajātarūpapiñjānacāmīkarakarburāṇi /
kārtasvarāpiñjaravarṇabhūritejāṃsi dīptāmaladīpipītakāni

2.2.3

maṅgalyasaumeravaśātakumbhaśṛṅgāracandrārajajāmbavāni /
āgneyaniṣkāgniśikhāni ceti netrābdhinirdhāritahemanāma

2.2.4

<svarṇabhedāḥ>
prākṛtaṃ sahajaṃ vahnisambhūtaṃ khanisambhavam

2.2.5

rasendravedhasaṃjātaṃ svarṇaṃ pañcavidhaṃ smṛtam /
brahmāṇḍaṃ saṃvṛtaṃ yena rajoguṇabhuvā khalu

2.2.6

tatprākṛtamiti proktaṃ devānāmapi durlabham /
brahmā yenāvṛto jātaḥ suvarṇaṃ sahajaṃ hi tat

2.2.7

visṛṣṭamagninā śaivaṃ tejaḥ pītaṃ suduḥsaham /
abhūtsvarṇaṃ taduddiṣṭaṃ suvarṇaṃ vahnisaṃbhavam

2.2.8

etatsvarṇatrayaṃ divyaṃ varṇaiḥ ṣoḍaśabhiryutam /
dhāraṇādeva tatkuryāccharīramajarāmayam

2.2.9

girīṇāṃ khanisambhūtaṃ tatsvarṇaṃ khanijaṃ smṛtam /
taccaturdaśavarṇāḍhyaṃ bhakṣitaṃ sarvarogahṛt

2.2.10

rasendravedhasambhūtaṃ tadvedhajamudāhṛtam /
rasāyanaṃ mahāśreṣṭhaṃ pavitraṃ vedhajaṃ hi tat

2.2.11

raktābhaṃ pītavarṇaṃ ca dvividhaṃ kāñcanaṃ bhavet /
<grāhyāgrāhyasvarṇarūpa>
dāhe raktaṃ sitaṃ chede nikaṣe kuṅkumaprabham

2.2.12

guru snigdhaṃ mṛdu svacchaṃ nirdalaṃ raktapītakam /
hema ṣoḍaśavarṇāḍhyaṃ śasyate dehalohayoḥ

2.2.13

śvetāṅgaṃ kaṭhinaṃ rūkṣaṃ vivarṇaṃ samalaṃ dalam /
dāhe śvetāsitaṃ śvetaṃ nikaṣe laghu ca vrajet

2.2.14

na śuddhaṃ na mṛtaṃ svarṇaṃ rogavargaṃ karoti ca /
saukhyaṃ vīryaṃ balaṃ hanti tasmācchuddhirudīryate

2.2.15

<svarṇaśuddhi>
valmīkamṛttikā dhūmaṃ gairikaṃ ceṣṭakā paṭu /
ityete mṛttikāḥ pañca jambīrair vāranālakaiḥ

2.2.16

piṣṭvā limpetsvarṇapatraṃ bhasmacchannaṃ tu karpare /
yāvaddravaṃ puṭaṃ tāvatkuryāttena viśudhyati

2.2.17

mṛttikāṃ mātuluṅgāmlaiḥ pañcavāsarabhāvitām /
sabhasmalavaṇaṃ hema śodhayet puṭapākataḥ

2.2.18

bhāvayenmātuluṅgāmlaistridinaṃ pañcamṛttikām /
saindhavaṃ bhūmibhasmābhiḥ svarṇaṃ śudhyati pūrvavat

2.2.19

taile takre gavāṃ mūtre hyāranāle kulutthake /
kramānniṣecayet taptaṃ saptavāraṃ dravair dravaiḥ

2.2.20

svarṇādilohapatrāṇāṃ śuddhireṣā praśasyate /
drāvitau nāgavaṅgau ca tadvatsiñcedviśuddhaye

2.2.21

suvarṇaṃ ḍhālayet pūrvaṃ kāñcanārodbhave rase /
saptavāraṃ tataḥ karmayogyaṃ hema bhaved dhruvam

2.2.22

<svarṇabhasma (1)>
nāgacūrṇaṃ śilāyuktaṃ vajrīkṣīrasamanvitam /
lepanātpuṭayogācca hemapatrāṇi lepayet

2.2.23

mṛtaṃ nāgaṃ snuhīkṣīrair athavāmlena kenacit /
piṣṭvā lepyaṃ svarṇapatraṃ ruddhvā gajapuṭe pacet

2.2.24

ādāya peṣayedamle mṛtanāgaṃ cāṣṭamāṃśakam /
pacedgajapuṭe ruddhvā pūrvavannāgasaṃyutam

2.2.25

evaṃ punaḥ punaḥ pākādaṣṭadhā mriyate dhruvam /
<svarṇabhasma (2)>
śuddhasūtasamaṃ gandhaṃ mākṣikaṃ ca sahāmlakaiḥ

2.2.26

aṣṭabhiśca puṭairhema mriyate pūrvavatkriyā /
<svarṇabhasma (3)>
śuddhasūtasamaṃ svarṇaṃ khalve kuryācca golakam

2.2.27

ūrdhvādho gandhakaṃ dattvā sarvatulyaṃ nirudhya ca /
triṃśadvanotpalair dadyāt puṭānevaṃ caturdaśa

2.2.28

nirutthaṃ jāyate bhasma gandhaṃ deyaṃ punaḥ punaḥ /
<svarṇabhasma (4)>
svarṇamāvartya tolaikaṃ māṣaikaṃ śuddhanāgakam

2.2.29

kṣiptvādāya tu taccūrṇaṃ tattulye gandhamākṣike /
amlena mardayedyāmaṃ ruddhvā laghupuṭe pacet

2.2.30

gandhaṃ punaḥ punardeyaṃ mriyate daśabhiḥ puṭaiḥ /
<rasādibhiḥ svarṇamāraṇam>
hemapatrāṇi kurvīta vilimpedrasabhasmanā

2.2.31

amlapiṣṭena puṭayeddhema nirjīvatāṃ vrajet /
athavā tāpyapuṭitaṃ svarṇaṃ gacchati bhasmatām

2.2.32

yadvā mṛtena kariṇā śilāyogena bhasmayet /
athavā mṛtavajreṇa yoginyaṃśavilepitam

2.2.33

bhasmatāṃ yātyuparasai rasaiścaiva mahārasaiḥ /
amlapiṣṭair viliptaṃ ca puṭitaṃ yāti bhasmatām

2.2.34

<svarṇamāraṇa (5)>
svarṇasya dviguṇaṃ sūtaṃ yāmamamlena mardayet /
āroṭaṃ mākṣikaṃ kṣiptvā mūṣāyāṃ svarṇatulyakam

2.2.35

tatpṛṣṭhe marditaṃ hema tatpṛṣṭhe śuddhamākṣikam /
deyaṃ svarṇasamaṃ tacca pṛṣṭhe gandhaṃ ca tatsamam

2.2.36

sarvaṃ ca cūrṇitaṃ dadyād ruddhvā mūṣāṃ dhameddṛḍham /
svabhāvaśītalaṃ grāhyaṃ bhasma tadbhāgapañcakam

2.2.37

ṭaṅkaṇaṃ śvetakācaṃ ca bhāgaikaikaṃ prapeṣayet /
tritayaṃ madhunājyena melakaṃ golakīkṛtam

2.2.38

dhānyābhrasya ca bhāgaikamadhaścordhvaṃ ca dāpayet /
nirudhya taddhamedgāḍhaṃ mūṣāyāṃ ghaṭikādvayam

2.2.39

nirutthaṃ jāyate bhasma tattadyogeṣu yojayet /
<svarṇamāraṇa (6)>
hemnaḥ pādaṃ mṛtaṃ sūtaṃ piṣṭamamlena kenacit

2.2.40

patre liptvā puṭe pacyādaṣṭabhirmriyate dhruvam /
śuddhānāṃ sarvalohānāṃ māraṇe rītirīdṛśī

2.2.41

<svarṇamāraṇa (7)>
śuddhamākṣīkabhāgaikaṃ bhāgaṃ cāroṭamākṣikam /
dvibhāgaṃ sūtakaṃ kṣiptvā trayamamlena mardayet

2.2.42

bhāgaikaṃ hemapatraṃ ca liptvā cāmlena mardayet /
tadgolaṃ pātanāyantre haṭhād yāmatrayaṃ pacet

2.2.43

ityevaṃ mriyate svarṇaṃ nirutthaṃ nātra saṃśayaḥ /
<svarṇamāraṇa (8)>
yavaciñcārajovṛkṣabhallātaiṣṭaṅkaṇena ca

2.2.44

liptvā svarṇasya patrāṇi ruddhvā gajapuṭe pacet /
tair dravaiḥ piṣṭyā mriyate saptadhā puṭaiḥ

2.2.45

pīlukaṅkuṣṭhabukkāṇasauvarcalam apeṣitam /
liptvā svarṇasya patrāṇi mriyate saptabhiḥ puṭaiḥ

2.2.46

<svarṇasya guṇāḥ>
suvarṇaṃ bṛṃhaṇaṃ snigdhaṃ madhuraṃ rasapākayoḥ /
viṣadoṣaharaṃ śītaṃ sakaṣāyaṃ satiktakam

2.2.47

hṛdyaṃ kāntipradaṃ balyaṃ saṃrasanaṃ guru lekhanam /
buddhimedhāsmṛtikaraṃ vraṇaghnaṃ vāgviśuddhidam

2.2.48

kṣayonmādapraśamanaṃ cakṣuṣyaṃ ca rasāyanam /
tridoṣaśamanaṃ saumyamāyuṣyaṃ ruciraṃ śuci

2.2.49

prajñāvīryasvarakaram aiśvaryaṃ dhāraṇādbhavet

Original text: Ānandakanda · Edition: S.V. Radhakrishna Sastri, Srirangam: Sri Vilasam Press, 1952. · Data entry Oliver Hellwig · GRETIL (Göttingen) · CC BY-NC-SA 4.0