Ahoratravratakathā · Verses 81-100

naivedyam asmai pradadāti loke yo bhaktiyuktaḥ surasaṃ sugandhim /
balī viśiṣṭo naracakracūḍāmaṇyarcitāṅghrī nṛpasevyamānaḥ

phalamūlādikaṃ dattvā caityeṣu bhaktimānasaḥ /
yatheṣṭaṃ phalam āpnoti nirogī sukhavān sadā

rogādibhiḥ prabaladuḥkhakarair vimuktāḥ snigdhānanāḥ kanakatulyamanojñavarṇāḥ /
rājyaṃ hi yad vigatakaṇṭakam āpnuvanti bhaiṣajyadānavidhinā tad uśanti caitye

tāmbūlādigaṇaṃ dattvā rūpavān sukhavāñ chuciḥ /
divyāṅganā manohārī rājalakṣmīm avāpnuyāt

vitānam uccair vitanoti caitye dhanyas triloke paripūjanīyaḥ /
viśālavaṃśo guṇarakṣaṇīyo jāto mahādīptaśarīrabhāsaḥ

dhvajān patākān abhiropayanti ye caityabimbe khalu bhaktiyuktāḥ /
mahīśvarās te jitaduṣṭasaṃghā bhavanti nāthā divi bhūtale ca

chattrāṇi nānāmaṇibhir mahārhaiḥ saṃpādayanty āttamanā dadanti /
caityeṣu bhūmīśvaravṛndavandyāḥ śrīsaṃyutā dharmaratā bhavanti

vīṇādibhir ghaṇṭamṛdaṅgavādyaiḥ śṛṅgaiś ca śaṅkhādisudivyaghoṣaiḥ /
saṃghoṣaṇāṃ ye vitaranti caitye te 'bhijñayā pañcabhir āśrayante

mahotsāhakarair gītaiḥ sumanojñasvarair jine /
nṛtyaṃ ca kārayen nityaṃ kuryāc ca divyaghoṣaṇām

te narāḥ susvarā bhonti sundarā divi bhūtale /
divyaśrotrā mahāvijñāḥ suśabdaṃ śṛṇuyuḥ sadā

nṛtyagītādikaṃ kṛtvā caityabimbe jinālaye /
vandyamānāḥ sugotrāś ca niṣpāpāś ca bahuśrutāḥ

dīrghāyuṣkāḥ sahasrākṣā nirāpadāḥ guṇāśrayāḥ /
grahavyādhivimuktāṅgā bhavanti te śubhākarāḥ

trāsāya duṣṭasattvānāṃ rakṣārthaṃ ca jinālaye /
śastrahastāḥ sthitā ye ca jinabhaktisamanvitāḥ

āyuṣmanto nirogāś ca putrapautrīsamanvitāḥ /
bhāgyavanto dhanāḍhyāś ca gacchanty ante jinālayam

dūrvākundākṣatān puṣpān lājayā saha bhaktimān /
prakṣipej jinacaityeṣu svastivākyam udāharan

durgatiṃ nābhijānāti sukulī lokanandanaḥ /
sarvavidyāgurur vandyaś cānte mokṣam avāpnuyāt

ye ramamuktāmaṇivajrahemaṃ rūpyaṃ suvarṇādikadhātudānāt /
vinaṣṭaśokāḥ subhagāḥ suvaṃśāḥ pūrṇendriyāḥ pūrṇamanorathāḥ syuḥ

ye śuddhacittāḥ stutim ācaranti gadyātmikāṃ padyamayīṃ vicitrām /
te śabdasaṃghān bahuvādyajātān śṛṇvanti gītān surabhāminīnām

yāvatī bhūmir ākrāntā hy adhaḥ kāñcanacakrataḥ /
yojanānāṃ sahasrāṇi rāśibhyaḥ parikīrtitāḥ

yāvatyo vālukās tatra tāvatyaḥ parisaṃkhyayā /
rājā bhavati vīreśaś cakravartī mahītale