Ahoratravratakathā · Verses 101-121

ye jātamātrāḥ prabhutāṃ prayānti śreṣṭhīkule janma sadaiva yeṣām /
hastyaśvayānaiś ca paribhramanti kṛtvātra te caityavarapraṇāmam

akāra-m-ādyakṣaramantrarājair balyūpahāraṃ khalu yo hi dadyāt /
tasmai sudevāḥ sagaṇāḥ sutṛptā dāsyanti satkarmaphalābhilāṣam

yasmin sudhālepam udācaranti te rogaśokādivimuktadehāḥ /
dhaneśvarā dīrghatarāyuṣas te narāmarāṇāṃ subhagā bhavanti

ye buddham uddiśya mahānti nityaṃ kurvanti mṛdgomayalepanāni /
bhaktyā suśuddhā jalamaṇḍalaṃ vā labhanti te rājabalaṃ subhāgyāḥ

stūpāṅgaṇaṃ dhātuvaraṃ vihāraṃ ye śodhayantīha narāḥ prayatnaiḥ /
nirmālyam ebhyaś ca samuddharanti te hemavarṇāḥ sudṛśo bhavanti

pradakṣiṇāṃ ye vitaranti tasmin bhavanti jātismaralābhinas te /
suvarṇavarṇā bahuputrapautrāḥ pūjyā manuṣyāmaranāthasaṃgḥaiḥ // Avk_106
ālasyenāpi yaḥ kuryāj jinālayapradakṣiṇām /
pade pade suvarṇaikakarṣadānaphalaṃ labhet

brahmakṣatriyavaiśyānāṃ sacchūdrāṇāṃ prapūjanam /
tebhyo vihīnajātīnām adhikāro na pūjane

gandhapuṣpadvijātīnāṃ ... ca pūjayet /
gandhapuṣpadvijātīnāṃ viśeṣeṇa prakathyate

chattrāvarohaṇaṃ rājñāṃ vaiśyānāṃ tv annaḍhaukane /
dhvajapātākavastreṣu śudrāṇāṃ ca pracakṣyate

svarṇakārā lohakārāḥ kāṃsyakṛtkṛṣikādayaḥ /
eteṣāṃ ceha hastena caityapuṃgavapūjanam

taṇḍulī vyañjanī cāpi krayavikrayakāriṇaḥ /
etaiḥ svavṛttivastūni ḍhaukanīyāni bhaktitaḥ

śaulinī dhvananavartī māṃsavartī tathā surī /
etair dīpaḥ pradātavyaḥ kuladharmapramāṇataḥ

carmakāraś ca mātaṅgo niyogī rajako dhvajī /
etaiś ca dūrataḥ sthitvā vandanīyo jinālayaḥ

ṣaṭtriṃśajjātibhir evaṃ svakulavṛtticāraṇaiḥ /
anyaiś ca vividhair nityaṃ pūjyo mānyo jinālayaḥ

yeṣāṃ vratavikāro na pūjane jinapuṃgave /
etaiḥ pradakṣiṇāṃ kṛtvā vandanīyaḥ svabhaktitaḥ

evaṃ bhūyaś cared dharmī vratarājam aharniśam /
tasya puṇyaṃ yathā proktaṃ kuṣṭhavyādhikṣayaṃ vrajet

pañcānantaryapāpāni yāsyanty api na saṃśayaḥ /
kiṃ punaś cānyapāpāni janmāntarakṛtāny api

na hī sa vidyate rājan sarvatra bhuvaneṣv api /
ahorātravrataṃ puṇyaṃ yo 'nyathātvaṃ kariṣyati

śravād api haret pāpaṃ darśanāt puṇyam āpnuyāt /
anumodāt tathā caivaṃ vratināṃ tu kim ucyate

vratināṃ saptabhāgāni kṛtvā puṇyaṃ viśāradaḥ /
ekabhāgaṃ labhed rājā caikaṃ tu sārathījanaḥ /
sarvasattvasya caikaṃ hi tac cheṣaṃ labhate vratī