અહોરત્રવ્રતકથા · શ્લોક 81-100

નૈવેદ્યમ્ અસ્મૈ પ્રદદાતિ લોકે યો ભક્તિયુક્તઃ સુરસં સુગન્ધિમ્ ।
બલી વિશિષ્ટો નરચક્રચૂડામણ્યર્ચિતાઙ્ઘ્રી નૃપસેવ્યમાનઃ

ફલમૂલાદિકં દત્ત્વા ચૈત્યેષુ ભક્તિમાનસઃ ।
યથેષ્ટં ફલમ્ આપ્નોતિ નિરોગી સુખવાન્ સદા

રોગાદિભિઃ પ્રબલદુઃખકરૈર્ વિમુક્તાઃ સ્નિગ્ધાનનાઃ કનકતુલ્યમનોજ્ઞવર્ણાઃ ।
રાજ્યં હિ યદ્ વિગતકણ્ટકમ્ આપ્નુવન્તિ ભૈષજ્યદાનવિધિના તદ્ ઉશન્તિ ચૈત્યે

તામ્બૂલાદિગણં દત્ત્વા રૂપવાન્ સુખવાઞ્ છુચિઃ ।
દિવ્યાઙ્ગના મનોહારી રાજલક્ષ્મીમ્ અવાપ્નુયાત્

વિતાનમ્ ઉચ્ચૈર્ વિતનોતિ ચૈત્યે ધન્યસ્ ત્રિલોકે પરિપૂજનીયઃ ।
વિશાલવંશો ગુણરક્ષણીયો જાતો મહાદીપ્તશરીરભાસઃ

ધ્વજાન્ પતાકાન્ અભિરોપયન્તિ યે ચૈત્યબિમ્બે ખલુ ભક્તિયુક્તાઃ ।
મહીશ્વરાસ્ તે જિતદુષ્ટસંઘા ભવન્તિ નાથા દિવિ ભૂતલે ચ

છત્ત્રાણિ નાનામણિભિર્ મહાર્હૈઃ સંપાદયન્ત્ય્ આત્તમના દદન્તિ ।
ચૈત્યેષુ ભૂમીશ્વરવૃન્દવન્દ્યાઃ શ્રીસંયુતા ધર્મરતા ભવન્તિ

વીણાદિભિર્ ઘણ્ટમૃદઙ્ગવાદ્યૈઃ શૃઙ્ગૈશ્ ચ શઙ્ખાદિસુદિવ્યઘોષૈઃ ।
સંઘોષણાં યે વિતરન્તિ ચૈત્યે તે ઽભિજ્ઞયા પઞ્ચભિર્ આશ્રયન્તે

મહોત્સાહકરૈર્ ગીતૈઃ સુમનોજ્ઞસ્વરૈર્ જિને ।
નૃત્યં ચ કારયેન્ નિત્યં કુર્યાચ્ ચ દિવ્યઘોષણામ્

તે નરાઃ સુસ્વરા ભોન્તિ સુન્દરા દિવિ ભૂતલે ।
દિવ્યશ્રોત્રા મહાવિજ્ઞાઃ સુશબ્દં શૃણુયુઃ સદા

નૃત્યગીતાદિકં કૃત્વા ચૈત્યબિમ્બે જિનાલયે ।
વન્દ્યમાનાઃ સુગોત્રાશ્ ચ નિષ્પાપાશ્ ચ બહુશ્રુતાઃ

દીર્ઘાયુષ્કાઃ સહસ્રાક્ષા નિરાપદાઃ ગુણાશ્રયાઃ ।
ગ્રહવ્યાધિવિમુક્તાઙ્ગા ભવન્તિ તે શુભાકરાઃ

ત્રાસાય દુષ્ટસત્ત્વાનાં રક્ષાર્થં ચ જિનાલયે ।
શસ્ત્રહસ્તાઃ સ્થિતા યે ચ જિનભક્તિસમન્વિતાઃ

આયુષ્મન્તો નિરોગાશ્ ચ પુત્રપૌત્રીસમન્વિતાઃ ।
ભાગ્યવન્તો ધનાઢ્યાશ્ ચ ગચ્છન્ત્ય્ અન્તે જિનાલયમ્

દૂર્વાકુન્દાક્ષતાન્ પુષ્પાન્ લાજયા સહ ભક્તિમાન્ ।
પ્રક્ષિપેજ્ જિનચૈત્યેષુ સ્વસ્તિવાક્યમ્ ઉદાહરન્

દુર્ગતિં નાભિજાનાતિ સુકુલી લોકનન્દનઃ ।
સર્વવિદ્યાગુરુર્ વન્દ્યશ્ ચાન્તે મોક્ષમ્ અવાપ્નુયાત્

યે રમમુક્તામણિવજ્રહેમં રૂપ્યં સુવર્ણાદિકધાતુદાનાત્ ।
વિનષ્ટશોકાઃ સુભગાઃ સુવંશાઃ પૂર્ણેન્દ્રિયાઃ પૂર્ણમનોરથાઃ સ્યુઃ

યે શુદ્ધચિત્તાઃ સ્તુતિમ્ આચરન્તિ ગદ્યાત્મિકાં પદ્યમયીં વિચિત્રામ્ ।
તે શબ્દસંઘાન્ બહુવાદ્યજાતાન્ શૃણ્વન્તિ ગીતાન્ સુરભામિનીનામ્

યાવતી ભૂમિર્ આક્રાન્તા હ્ય્ અધઃ કાઞ્ચનચક્રતઃ ।
યોજનાનાં સહસ્રાણિ રાશિભ્યઃ પરિકીર્તિતાઃ

યાવત્યો વાલુકાસ્ તત્ર તાવત્યઃ પરિસંખ્યયા ।
રાજા ભવતિ વીરેશશ્ ચક્રવર્તી મહીતલે