Ahoratravratakathā · Verses 41-60

vratapūjāphalaṃ sarvaṃ kālaṃ ca samayaṃ dinam /
kutra sthāne vrataṃ kāryaṃ tat sarvaṃ vada sāṃpratam

vasubandhur uvāca /
śṛṇu rājan mahābhāga saṃkṣepād gaditaṃ mayā /
svayaṃbhuvo viśeṣeṇa sthāne puṇyaṃ mahottamam

tadabhāve svadeśeṣu sthāvare caityapuṃgave /
tadabhāve svayaṃ kṛtvā kārayitvāparais tathā

suvarṇena kṛte vāpi ratnaiś cānyaiś ca dhātubhiḥ /
pāṣāṇena tathā kāṣṭhair iṣṭikāmṛnmayais tathā

vālukaudanapiṇḍena kṛte paṭṭe ca citrite /
devālaye nadītīre tīrthe puṇye mahītale

dharmaśālāṃ viśodhyādau yathāvidhi vrataṃ caret /
puṣpākṣatasugandhaiś ca vāriṇā caityapuṃgave

arghaṃ dadyād raveḥ pūrvaṃ puṣpaṃ kṣipet salājakam /
maṇḍalaṃ pañcadevānāṃ likhed gomayavāriṇā

avandhyākṣarayuktena adbhir vratīn susiñcayet /
havargāntākṣarair mantrair vratimūrdhni pratiṣṭhitam

oṃ āḥ hūm iti mantreṇa diśobandhaṃ satarjitam /
aṅganyāsaṃ karanyāsaṃ kṛtvā guruṃ ca vandayet

puṣpākṣataṃ kare dhṛtvā kṣipet puṣpāñjalitrayam /
pañcabhūtasamutpannaṃ padmakarṇikasaṃsthitam

āvāhayed dharmadhātuṃ vāgīśvaraṃ samujjvalam /
jñānarūpaṃ samākṛṣya saṃsthāpya samaye 'rcayet

āvāhayāmi tvaṃ nātha tiṣṭha tatra manohare /
sthiro bhava sadā mā gāḥ sāṃnidhyaṃ kuru sthāvare

dugdhākṣatāmbusaṃyuktaṃ navaratnāni hāṭakaiḥ /
śaṅkhasthaṃ pratigṛhṇātu arghaṃ dattaṃ mayā mudā

paṭṭavastrāṇi divyāni cīvarāṇi mahāprabho /
nānāraṅgavicitrāṇi pratigṛhṇātu modatām

candanaṃ malayodbhūtaṃ kastūrikuṅkumādikam /
śaileyaṃ ghanasāraṃ ca gṛhyatām anumodatām

jalajān sthalajān divyān pañcavarṇena granthitān /
sumodavāsanāyuktān puṣpān gṛhya pramodatām

dhūpo 'yaṃ ghrāṇasaṃtarpo divyagandhasuyojitaḥ /
pradattas tava toṣārthaṃ gṛhyatāṃ bhaktavatsala

dīpo 'yaṃ harati dhvāntaṃ sarvatimiranāśakaḥ /
ghṛtatailasamujjvālo mayā dattaḥ pragṛhyatām

annaṃ caturvidhaṃ nātha rasānāṃ ṣaḍvidhaṃ tathā /
ghṛtādyān śarkarāhārān bhuñjatāṃ ca sukhaṃ mama

nānāphalasumodyaṃ ca koṣakāraṇḍavādikam /
skandhamūlādikaṃ pattraṃ gṛhāṇa pratimodatām