Ahoratravratakathā · Verses 21-40

sarvarasasamāyuktaṃ lalitāsanasaṃsthitam /
divyābharaṇabhūṣāṅgaṃ pañcabuddhamukūṭinam

vāgīśvaraṃ mahāśuklaṃ sarvadharmapratiṣṭhitam /
evaṃ svahṛdi saṃbhāvya puraḥ sthāpya prapūjayet

pādyācamanam arghaṃ ca dattvā bhaktisamanvitaḥ /
jalajaiḥ sthalajaiḥ puṣpaiḥ sugandhaiḥ pañcagandhakaiḥ

sāṃyojikaiḥ sugandhaiś ca sudhūpair dhūpanais tathā /
ghṛtaprayuktadīpaiś ca naivedyair divyabhojanaiḥ

chattradhvajapatākābhir nṛtyagītasuvādanaiḥ /
phalamūlādibhiḥ pattraiḥ pūgatāmbūlakais tathā

nānauṣadhisamāyuktair divyair mānuṣyakais tathā /
kundapuṣpākṣatair dūrvair lājayā pañcaratnakaiḥ

kṣīraiḥ śaṃkhasupuṣpārghaṃ pradadyāc caityapuṃgave /
dhāraṇīṃ caiva stotraṃ ca paṭhed gītaṃ ca gāyayet

pradakṣiṇāsahasraṃ ca yāvat kuryāt pramoditaḥ /
rātriṃ divā susaṃpūrṇaṃ pracarec ca pradakṣiṇām

yatra devālaye tīrthe sarvān devān prapūjayet /
hīnajātiprasaṅgaṃ ca sparśanaṃ naiva kārayet

sparśite saṃcaret snātvā pañcagavyena śodhayet /
asparśe 'pi caret snānaṃ trisaṃdhyaṃ saṃcared vratī

{CD add the following after 'śodhayet' :
śucikrama tathā dharmam uttamam ahorātravrataṃ //
vāravṛddhau na kartavyaṃ samarthenāpi kārayet //
nidrāsevitaṃ nidrāṃ kṛtvā viśrāmasevitaṃ viśrāmaṃ kṛtvā rājan
tathā vrataṃ kārayed doṣakam 'sti tasmān na kārayet // Avk_30* //}
ahorātraṃ susaṃpūrṇaṃ na nidrāṃ kārayed vratī /
caityadhyānasamāyuktaḥ japan stotraṃ paṭhaṃś caret

nānāgītamahotsāhair nṛtyair vādyaiḥ sughoṣakaiḥ /
hāhākāraiḥ samullāsaiḥ kārayet saṃpradakṣiṇām

viśrāmaṃ vā na kuryāc ca khedaṃ vā vratamānasaḥ /
ahorātre susaṃpūrṇe prātaḥ snātvā vrataṃ caret

caityapūjāṃ yathā kṛtvā gurupūjāṃ samācaret /
annaṃ vastraṃ suvarṇaṃ ca vrīhiratnāni bhūṣitān

ācāryāya pradātavyā yathāśakti subhaktitaḥ /
yajñaṃ kuryāt tato vajrī vrataṃ pūrṇaṃ prapūrayet

abhiṣekaṃ tato dattvā pañcasūtraṃ ghaṭaṃ tathā /
pratyekaṃ vratināṃ dattvā āśīrvādyaṃ pradāpayet

kaumārīpūjanaṃ kṛtvā śeṣānnaṃ ca prabhuñjayet /
dadhiśarkarasaṃyuktaṃ pañcāmṛtaṃ subhojanam

gaṇacakraṃ tataḥ kuryād vidhijñas tadvidhiṃ yathā /
ity evaṃ vratarājaṃ tad yaḥ kuryāc chuddhamānasaḥ

vipulaṃ bhogam ābhujya sarvasukhasamanvitaḥ /
paratra sukham āpnoti dharmaloke mahīpate

indrapṛṣṭa uvāca /
bhagavan sarvavin nātha punar vaktuṃ tvam arhasi /
saṃsāre bahudhā jātis teṣāṃ pracāraṇaṃ katham