Ahoratravratakathā · Verses 1-20

Ahorātravratakathā
Oṃ namaḥ śrīdharmadhātave /
ākāśanirmalo bhūto niṣprapañcaguṇāśrayaḥ /
pañcaskandhātmakaḥ śāntas tasmai stūpātmane namaḥ

evaṃ mayā śrutam ekasmin samaye buddho bhagavāñ chrāvastyāṃ viharati sma jetavane 'nāthapiṇḍadasyārāme mahatā bhikṣusaṃghena sārdham anekair devanāgayakṣagandharvāsuragaruḍakinnaramahoragaiḥ sthavirabhikṣuvītarāgasaṃghair bodhisattvaśatasahasraiḥ saṃbahulaiś ca śrāvakair daśabhir lokapālaiś caturmahārājakāyikair anekaiś caturvarṇakair manuṣyair anekaśatasahasraiḥ parivāraiḥ parivṛtaiḥ / tasmin sabhāmaṇḍale sarve dharmaśravaṇikā lokā bhagavantam abhivīkṣya caityavratakathām anudhyāyantaḥ samāsthitāḥ / atha khalu subhūtiḥ sthaviraḥ svāsanāt samutthāyaikāṃsam uttarāsaṅgaṃ kṛtvā triḥ pradakṣiṇīkṛtya savyajānubimbaṃ bhuvi sthāpya bhagavantaṃ praṇamyaitad avocat /
ahorātravrataṃ nātha kasmin kāle pravartate /
tadvidhiṃ ca kathaṃ brūhi tat sarvaṃ jagatāṃ prabho

bhagavān āha /
sādhu sādhu subhūte tvaṃ śṛṇu sattvānukampaka /
ahorātravrataṃ nityaṃ tadvidhiṃ kathitaṃ mayā

āsīt pūrvavideheṣu nāmnā gandhavatī purī /
tasyāṃ rājā mahātejā indrapṛṣṭo mahāprabhuḥ

so 'ntaḥpure sabhāṃ kṛtvā vasubandhuṃ jagadgurum /
praṇamya sahasotthāya papraccha vidhivan mudā

śrotum icchāmi tat sarvaṃ yad vratānāṃ samuttamam /
yasya puṇyaprabhāvena sattvā yānti sunirvṛtim

tat sarvaṃ gadatāṃ dhīra sarvasattvānukampaka /
bhavatā cānupālyo 'yaṃ lokaś ca duṣkṛtākulaḥ

vasubandhur uvāca /
śṛṇu rājan mayā khyātaṃ vratānāṃ vratam uttamam /
ahorātravrataṃ pūrvaṃ vipaśyinā prabhāṣitam

aśvinīpūrṇamāsyāṃ tu vrataṃ kuryād mahodayam /
caityaṃ saṃpūjayec chuddhaḥ ṣoḍaśair vidhibhis tathā

bhojanānte trayodaśyāṃ kuryād dantādiśodhanam /
caturdaśyāṃ viśeṣeṇa kṣurakarmāṇi kārayet

snānaṃ kṛtvā ca tīrtheṣu śucivastrāvṛtaḥ sudhīḥ /
madhyāhne pūjayec caityaṃ pradīpaṃ ca pradāpayet

sūrye ṣaṣṭhagate bhāge prāśayec ca kṣīrodanam /
punar śaucādikaṃ kṛtvā dharmaṃ ca śruṇuyān mudā

pratyūṣe pūrṇamāsyāṃ tu snātvā vrataṃ samārabhet /
ādau bhūmitalaṃ śodhya dharmaśālāṃ prakārayet

gandhodakaiḥ suśītaiś ca caityapuṃgavaṃ snāpayet /
gokṣīraiḥ pañcaratnaiś ca śilābhasmābhilepayet

catvāraś ca dhvajāḥ sthāpyā vitānaṃ saha cāmaraiḥ /
digmālā vividhaiḥ puṣpair lambayec ca jinālaye

tadanu vratam ārabhya guruṃ vajradharaṃ namet /
triratnaśaraṇaṃ kṛtvā dhyāpayed dharmadhātukam

dharmadhātumayaṃ caityaṃ jinānāṃ gṛham uttamam /
anādibuddha-m-ākhyātaṃ sarvatathāgatālayam /
sarvadevālayaṃ caityam ārādhya vratam ācaret

sahasradalapadmasthaṃ candrabimbaprabhāsvaram /
raktaṃ bhoḥkārasaṃbhūtaṃ caturmukhaṃ virājitam

raktagauramukhaṃ mūlaṃ dakṣiṇe kuṅkumāruṇam /
paścime padmaraktaṃ ca [!] uttare pītaraktakam

aṣṭabhujaṃ virājantaṃ vāgīśvaraṃ jagadgurum /
dhanurbāṇadharaṃ dvābhyāṃ pāśāṅkuśadharaṃ tathā /
prajñāpustaṃ tathā khaḍgaṃ vajraghaṇṭāṃ tathāparaiḥ